Ejikele 34 - Bibilia Buk na Ŋun nagon koti luŋu a

Nebi Ejikele a kikiŋdyö kayukuk ti Yisaraele kulya narok

¹ A kulyaet lo MATAT poki köyö adi,

² ŋuro lo ŋuto, keŋ keju kulya narok i kulya ti kayukuk ti Yisaraele, keŋ keju ko taki lepeŋat adi, Ta kayukuk, MATAT ŊUN lo kulya adi, Wöidiö, ta kayukuk ti Yisaraele logon deŋdya tunyeju ’börik kilo! Kayukuk ködyö ti tunyeju yidin le?

³ Ta möju le, a ta tojubbi ’börik ko boŋgwat na gweya ko kupir ti köbilu, a ta ’duŋge köbilu lopir, ama a ta tine tunyeju köbilu.

⁴ Ta a ko rurugga se nagon a namunyak kune, ta a ko toke ’ya nagon a gilö kune, ta a ko doggu nagon a boböpöji kune, ta a ko nyökuŋdyö bot nagon a girara kaŋo kune, ta a ko ga ’yu nagon a likin kune, ta aje yuggu se ko tukaŋan ko woran.

⁵ Nyena a lepeŋat iŋge rekin kogwon kayukunit ’bayin, a lepeŋat iŋge kölöki i nyei ko gwuruŋin.

⁶ Köbilu kwe aje rekin, a lepeŋat wirte wirtö i loki na merya liŋ, ko i lurwat liŋ lojo. Iŋkoi, köbilu kwe aje rekin i kak ’bukuluŋ, a ŋutu gwe ’bayin lo pipija kode galaddu se.

⁷ Nyena ta kayukuk, yiŋge ta kulyaet lio lo MATAT.

⁸ Nan MATAT ŊUN lo kulya adi, ’Diri ’diri gwoso na gwoŋdi nan na, kogwon köbilu kwe aje kölöki i kokoa, iŋkoi, köbilu kwe aje nyei ko gwuruŋin, kogwon kayukunit ’bayin; köti kogwon ŋutu kwe logon a kayukuk a ko galaddu köbilu kwe, ama lepeŋat deŋdi tunyeju ’borik, a gwe a ko tunyeju köbilu kwe;

⁹ nyenagon ta kayukuk, yiŋge ta kulyaet lio lo MATAT.

¹⁰ Nan MATAT ŊUN lo kulya adi, Mete ta, nan a miriku losu lo kayukuk; a nan mo luŋgi köbilu kwe kasu i konisi; a nan mo teŋgi ta i tunyeju na köbilu; a ta kayukuk köti mo tine tunyeju ’borik asut; a nan mo ryakuŋdye köbilu kwe kaŋo kasu i kutusen anyen gwon ’bayin a kinyo losu.

¹¹ Kogwon nan MATAT ŊUN lo kulya adi, Mete, nan ko mugun nio mo kekeŋ mukök na köbilu kwe, iŋkoi, nan mo gagalara se.

¹² Nyena gwoso nagon kayukunit galaddi köbilu kanyit i diŋit nagon köbilu kanyit liŋ aje reara pajo nu, nyena a nan mo iti i galaddu na köbilu kwe; a nan mo lwokuŋdye se kaŋo i piritön liŋ nagon se a reara kata kunu i lor lo ’dikolo ko lo mudwe logon adi ’dii.

¹³ A nan mo joŋdi lepeŋat kaŋo i gweyajin ti ŋutu, a nan mo pepenuŋdye lepeŋat i jurön, a nan mo toyituŋdye lepeŋat i lukata na jur lose; a nan mo tunyeji lepeŋat i loki na merya ti Yisaraele nyona ko karya ko i piritön liŋ ti jur nagon sisi ’darikin kune.

¹⁴ A nan mo tunyeji lepeŋat i pi-riton nagon a leme, a merya lojo ti Yisaraele mo gwe a piritön nagon lepeŋat nyesu kata. Nyu a lepeŋat mo pere kak i pirit nagon döru a duma kata, lepeŋat mo nyesu i loki na merya ti Yisaraele.

¹⁵ A nan ko mugun nio mo lo gwe a kayukunit lo köbilu kwe,

¹⁶ a nan mo tiŋdi se i peron kak, ŋilo a nan MATAT ŊUN lo kulya. A nan mo galaddi nagon a likin kune, a nan mo nyökuŋdye bot nagon a girara kaŋo kune, a nan mo doggi nagon a böböŋoji kune ko rubatan, a nan mo ruruŋge se nagon a namunyak kune, a nan mo meddi napir ko nago; a nan mo tunyeji se ’bura.

¹⁷ Nan MATAT ŊUN lo kulya adi, Ko gwe gwoso ta köbilu kwe, mete ta, nan mo ’duŋgö putet i kiden na köbilu ko köbilu, ko na köbilu lopijoki ko na melon lopijoki.

¹⁸ Ta ŋona a ko nyesu leme tojo i yimönö a iŋge ryoryok lele leme le? Ta ŋona a ko möju pioŋ nake tojo i yimöno a iŋge kökobur kunie le?

¹⁹ Nyo nagon köbilu kwe nyesu ŋo nagon ta a ryoryok ko mokosi kasu, a möji pioŋ nagon ta a kökobur ko mokosi kasu?

²⁰ Nyenagon nan MATAT ŊUN lo kulya ko se adi, Mete ta, nan ko mugun nio mo ’du ’duŋökin putet i kiden na köbilu napir ko nasok.

²¹ Ta a sioddu köbilu liŋ nagon a namunyak kune ko mara se ko gelya kasu, a ta soji lepeŋat ko oŋgwora kasu tojo ta a toreara lepeŋat pajo.

²² Nyena nan mo Iwolwök teŋ na köbilu kwe, a lepeŋat köti mo tine ryaka kwöŋ; a nan mo ’duŋökiŋdye putet i kiden na köbilu ko köbilu.

²³ A nan mo tiŋdi ŋuto geleŋ logon a Dawidi köliŋönit lio a kayukunit lose, a lepeŋ mo lo tunyeji se, iŋkoi, lepeŋ mo lo tunyeju se a gwe a kayukunit lose.

²⁴ A nan MATAT mo gwe a ŊUN lose, a koliŋonit lio Dawidi mo gwe a kasaranit kase kiden. Nan MATAT aje jambu.

²⁵ A nan ko se mo teteŋdi tomoret na taliŋ; a nan mo tu ’baka ’yi gwuruŋin i jur, anyen ŋutu kwe böŋö gwolor ’bura i yöbu a dotoni ’bura i ruduö.

²⁶ A nan mo tiŋdi se i si ’da lorga mere lio, a nan mo sunyukiŋdye lepeŋat kudu i diŋit na ’but, kweja adi kudu logon a ’boriet.

²⁷ A kaden ti mu ’diŋ mo rade ludweki kase, a kak mo topunuŋdye ŋo kanyit, a lepeŋat mo gwe ’bura kase i jur. Lepeŋat mo deden adi nan logon a MATAT i diŋit na ’be ’beleŋgi nan kaden gwolor kase i murutö nu, a lwökuŋdye lepeŋat i könisi ti ŋutu lo ri ’dikiŋdya se i gwon a ’dupi kulu.

²⁸ A jurön mo tine ryaggu lepeŋat köti, a gwuruŋin ti mu ’diŋ mo köti tine koja lepeŋat; a lepeŋat mo si ’dani ’bura lele ŋo ’bayin lo tokujöŋdu se.

²⁹ A nan mo tiŋdi lepeŋat meleseno nagon gwon ko kujöŋ na ’but, anyen lepeŋat mo gwon ti twatwa ko magor kase i jur, a ŋutu ti jurön köti mo tine tomijö se ko ’dö ’dö-yösi.

³⁰ A lepeŋat mo deŋdi adi nan MATAT ŊUN lose gwon ko se, köti adi se kötumit na Yisaraele gwon a ŋutu kwe, nan MATAT ŊUN aje jambu.

³¹ Ta a teŋ na köbilu kwe, ta a ŋutu kwe, iŋkoi ta a teŋ na köbilu nagon nan lo tunyeju, a nan gwe a ŊUN losu. Kilo a kulyaesi kwe ti MATAT ŊUN.