Ejikele 33 - Bibilia Buk na Ŋun nagon koti luŋu a

Kita na katiyunit i kunyaŋu na ŋutu

¹ A kulyaet lo MATAT poki köyö adi,

² Ŋuro lo ŋuto, jambi ko ŋutu kasu ti jur. Kulyani ko lepeŋat adi, Ko nan a soŋdu merok i jur a ŋutu ti jur wuluŋdye ŋuto kase kiden a tiŋdi lepeŋ a katiyunit i gwögwöŋu na merok.

³ A ko lepeŋ meddya merok i po, a lepeŋ kuddye tore i toŋiju na ŋutu, adi, Kunyar ta, merok kilo popo!

⁴ A kirut ko ŋuto logon a yiŋ woŋon na tore, ama a tine ŋien a ko merok a mok lepeŋ a tatuje lepeŋ, a kine gwe a kulya kanyit.

⁵ Iŋkoi, lepeŋ aje yiŋ woŋon na tore, a gwe a ko ŋien, a kine gwe a kulya kanyit. Ama ko lepeŋ ködyö a ŋien, a lepeŋ ködyö aje lwöggu ru nanyit.

⁶ Ama ko katiyunit a met merok i po, a gwe a ko kuddya tore anyen toŋiju ŋutu, a ko merok a po a morgi lele lose, ŋilo ŋuto tatua nyuŋ gwon ko toron, ama a nan mo luŋgi rima kanyit ko katiyunit i könin.

⁷ Nyena do ŋuro lo ŋuto, nan aje kon do a katiyunit lo kötumit na Yisaraele. Ko do yiyiŋ kulya na jam nan kine, a kirut ti do taki lepeŋat adi, MATAT lo kulya adi, Kunyar ta!

⁸ A ko nan ’dek kulya ko ŋuto loron adi nye a loron, nye ’diri mo twatwan, ama a do ködyö gwe a ko takin lepeŋ adi, Kunyar! anyen lepeŋ löpukuŋdyö kaŋo i kikolin kanyit, ŋilo ŋuto loron mo twan nyuŋ gwon ko toron, ama a nan mo luŋgi rima kanyit konut i könin.

⁹ Ama ko do a kunyaŋu ŋuto loron anyen lepeŋ löpukuŋdyö kaŋo i kiko lonyit, a lepeŋ gwe a ko löpuggö i kiko lonyit, a lepeŋ mo twane twan nyuŋ gwon ko toron, ama a do mo lwöggi ru inot.

Kiko lo ŊUN a lo rigwo

¹⁰ Do ŋuro lo ŋuto, kulyani ko kötumit na Yisaraele adi, Ta ŋupi jambu adi, Lyaŋesi kaŋ se ko toronjin kaŋ gwon kayaŋ i kusik, a yi kakaŋi kakaŋu kogwon se, a yi ŋona bulöni bulö gwon jörun ada?

¹¹ Kulyani ko lepeŋat adi, MATAT ŊUN lo kulya adi, ’Diri ’diri gwoso na gwoŋdi nan na, nan ’bak lyöŋön i twan na ŋuto loron, ama nan ’de ’dekan adi ti ŋuto loron löpuŋge löpuggö i kiko lonyit, ko ti rune ru. Nyena löpukwene ta bot, iŋkoi, wöripuŋdye ta kaŋo i kikolin kasu lorok kilo. Ta ŋutu ti kötumit na Yisaraele, ko nyo ta ’de ’dekan twatwa?

¹² Do ŋuro lo ŋuto, jambi ko ŋutu kasu adi, Löti lo ’but lo ŋuto lo rigwo ti bulö lwöggu lepeŋ i diŋit na toroŋdi nye nu; a toron na ŋuto loron mo tine to ’doro ’yu lepeŋ i diŋit na löpukuŋdye nye kaŋo kanyit i toronjin nu. A ko ŋuto lo rigwo a toroŋdya, a löti lonyit lo rigwo tine bulö lwöggu ru nanyit.

¹³ Ma ’di ko nan a kulya ko ŋuto lo rigwo adi lepeŋ ’diri mo gwon jörun, ama ko lepeŋ yinikiŋdyö mugun adi nye a lo rigwo a koŋdi toron, a konesi kanyit na rigwo kune tine yeyeo kwöŋ, ama a lepeŋ mo twane ko toron nagon nye a kon na.

¹⁴ Ma ’di köti ko nan a kulya ko ŋuto loron adi nye ’diri mo twatwan, ama ko nye a löpuggö i toron nanyit, a koŋdi ŋo nagon a na ’but i saret ko a gwak,

¹⁵ a ko ŋilo ŋuto a nyököro ŋo nagon nye a ’duma-ra a togwoet na, a nyököddi bot ŋo nagon nye aje ryakun kune, a wöröni i saresi logon ko ŋuto a ’dep se a rune ru, a tine koŋdya toron; lepeŋ ’diri mo ruru, a nye mo tine twan.

¹⁶ A toronjin nagon lepeŋ köju a kon kune mo tine yiyiki lepeŋ arabat kwöŋ lepeŋ aje koŋdya po nagon a na ’bu i saret ko a gwak, a nye ’diri mo rune ru

¹⁷ Ama ŋutu ti jur losu kulya adi Kiko lo MATAT ti gwon jojo; ama kölumbö kikolin kase logon ’bayin jojo

¹⁸ A ko ŋuto lo rigwo a löpukuŋdyö kaŋo i torigwo a iŋge toroŋdya, lepeŋ mo twatwan kogwon ŋina toron.

¹⁹ A ko ŋuto loron a löpukuŋdyö kaŋo i po narok nagon nye kökon kune, a koŋdi po nagon a na ’but i saret ko a gwak, a nye mo rune ru kogwon kine kulya.

²⁰ Ama ta kulya adi, Kiko lo MATAT ti gwon jojo. Ta kötumit na Yisaraele, nan mo ’du ’dupökin ta liŋ geleŋ geleŋ putesi gwoso i kikolin kasu.

Loŋe lo ’doro na Yerusalema

²¹ A i perok mukanat ti yapa topuök, i kiŋa topuök wot murek, lo gwoŋdi yi i to ’dupien lu, a ŋuto logon aje rwösu-ŋdyö kaŋo i Yerusalema yu lo poŋdi köyö ni, a takiŋdye nan adi, Köji nu aje ’doro ko merok i könisi.

²² Nyena a riŋit na MATAT gwe köyö i mugun suluja i koriri i ŋerot na poŋdi ŋuto logon a rwösuŋdyo lo; a nye iŋge tiŋdu nan riŋit nagon nan jajambi i ŋerot na diŋit nagon ŋilo ŋuto po köyö ni ko ’bure nu. Nyena a nan bulöni bulo jambu a nan köti gwe ’bayin a mumut.

²³ A kulyaet lo MATAT poki köyö adi,

²⁴ ŋuro lo ŋuto, ŋutu lo si ’da i kunu piritön murwöki i jur lo Yisaraele kulu yeŋon kulya adi, Abarayama köju a ŋuto geleŋ ama lepeŋ a wuju lu jur a lonyit; ama kölumbö yi jore; lo jur ’diri aje tiki yi a lomore likaŋ.

²⁵ Nyenagon taki lepeŋat adi, MATAT ŊUN lo kulya adi, Ta nyesu lokore nagon nyuŋ gwon ko rima, a ’bi ’yi konyen kasu ki i twöju na nyömuejin kasu logon a punyen kilo, a tatuje ŋutu; ta ŋona ’diri mo wuwu ŋilo jur a lomore losu le?

²⁶ Ta yinikiŋdyö ’börik i baŋdujin, a ta koŋdi po na mamana, a ta liŋ geleŋ geleŋ ŋuto geleŋ dotoni ko nakwan na marate lonyit; ta ŋona ’diri mo wuwu ŋilo jur a lomore losu le?

²⁷ Taki lepeŋat kine kulya adi, MATAT ŊUN lo kulya adi, ’Diri ’diri gwoso na gwoŋdi nan na, ’diri ŋutu logon gwon i piritön nagon a murwöki kulo mo totoko ko baŋdujin. a nan mo tiŋdi ŋutu logon si ’da i yöbu nagon a ’dar kana kulo i koa ko gwurupin; a ŋutu lo ’dana i dilyö ko i kuggiet kulo mo twatwane ko twanti iŋgo.

²⁸ A nan mo koŋdi jur a murwö ko a ruba; a riŋit nagon ŋilo jur bu ’ye mugun na mo ’bakani ’baka, a merya ti Yisaraele mo gwe a rubajin, anyen po gwon ’bayin lo lwöpöddu kata.

²⁹ A kirut lepeŋat mo deŋdi adi nan logon a MATAT, i diŋit nagon nan aje koŋdya jur a murwö ko a ruba nu, kogwon po kase liŋ na mamana nagon lepeŋat aje kon kune.

³⁰ Ama do ŋuro lo ŋuto, ŋutu kasu logon jambu i pirit na geleŋ i kulya kunök logon gwo ’dan i tölimösi ti goroma ko i kötumiten ti kadijik kulo, tujamakin ko ’börik lele takiŋdya luŋaser adi, Po ko yiŋge ko kulyaet lo po ko MATAT lo a nyo?

³¹ A lepeŋat mo poŋdi konut ni gwoso nagon ŋuto po i meddya na nebi na, a lepeŋat mo si ’dakine konut i komor gwoso ŋutu kwe, a lepeŋat mo yiŋge ko do jambu nyo, ama a lepeŋat mo tine kon po na jam do kune. Lepeŋat kwekiŋdya nyaŋu duma ko kutusen kase kana, ama a töilyet kase gwi ’diki i po nagon mo jakiŋdya se ’bulit.

³² Nyena mete, do gwon kase ni gwoso ŋutu logon yo ’yu kölisi lo ’but logon pupurarikin ŋuro nakwan, a gwe ko gworo lo ’but i yolo, ko a diniki ju ’yö tito gwoesi. Kogwon lepeŋat yiyiŋ po na jam do kine, ama a lepeŋat mo tine kon se.

³³ A i diŋit nagon kine ŋo mo popori nu, iŋkoi, se ’diri mo popo, a kirut lepeŋat mo deŋdi adi nebi aje gwon kase kiden.