Ejikele 31 - Bibilia Buk na Ŋun nagon koti luŋu a

’Dutet na Paro ko ŋutu kanyit

¹ A i lor geleŋ lo yapa tomusala, i kiŋa topuök wot geleŋ, a kulyaet lo MATAT poki köyö adi,

² Ŋuro lo ŋuto, pine Paro mor lo Ejipeto se ko ŋutu kanyit logon jore parik kulo adi. Do gwoso nyo i todumalan inot?

³ Mete Asura. Lepeŋ a ködini logon gwoso tika Libanon yu, logon kenia kanyit a na ’but a muŋge rudu ko tölimöt nanyit, a gwe a lojo, a kwe nanyit tulöddi kaŋo i kiden na kaden ti rudu.

⁴ A pioŋ na gwon i luruki wowoji lepeŋ, a pioŋ na gwon i togulu na kak kune to ’duŋe lepeŋ a lojo, a pioŋ ti luruki ’doke lolorga pirit na ’yutuki ’e nye na, a ’buköddi kaŋo i kaden liŋ ti rudu.

⁵ Nyena a lepeŋ ’duröddi ki lwö-lwöŋ kaden liŋ ti rudu, a kenia kanyit gwe jore, a garani gara a najo; kogwon pioŋ jore aje ’dur kata.

⁶ A kwen liŋ ’duŋge kadijik kase i kenia kanyit; a kijakwa liŋ ti mu ’diŋ yuŋweni torela kase i mukök na ŋilo ködini, a jurön liŋ logon a temejik kulo sakani i tölimöt nanyit.

⁷ Ŋilo ködini kwekwelen kogwon a duma parik, a kenia kanyit garani gara a najo, kogwon kokori kanyit a ’bekoddu kak i pioŋ najore.

⁸ A kaden logon gwoso tika lo gwon i melesen nio na ŊUN kulo tine bulö mupö lepeŋ, a kaden araja tine töjowe ko kenia kanyit, a kaden aremon tine bulö töjowe asut ko kenia kanyit, kweja adi, kaden liŋ lo gwon i melesen nio na ŊUN kulo ti bulö lwöŋgu kwelen nanyit.

⁹ Nan MATAT aje gweja lepeŋ kwekwelen i kenia kanyit nagon jore kune, nyena a kaden liŋ ti Edene nagon a melesen nio na ŊUN kulo be ’yi lepeŋ.

¹⁰ Nyenagon nan MATAT ŊUN lo kulya adi, Kogwon ŋilo ködini aje ’duröddu ki parik, a kwe nanyit tulöddi kaŋo i kiden na kaden ti rudu, a lepeŋ iŋge ’du ’duŋga kanyit i töili kogwon tojolan nanyit,

¹¹ nyena a nan mo pa-kiŋdye lepeŋ i könin lo kasaranit lo riŋit lo jurön, a nye mo riŋge lepeŋ gwoso nagon toronjin kanyit jujukin i riŋa na. Nan aje gubara lepeŋ mu ’diŋ.

¹² A ŋutu lepelok logon a kipajin logon mörö ’bak pitönö lwölwöŋ ŋutu ti jurön liŋ kulo mo tukukiŋdye lepeŋ kak, a kölökiŋdye lepeŋ. A kenia kanyit mo ’do ’done i merya loki se ko i piritön liŋ na ’dir, a kenia kanyit mo parasake kak a ’bi ’biliŋiki i luruki liŋ ti jur, a gweyajin liŋ ti ŋutu ti kak mo iti kaŋo i tölimöt nanyit, a kö ’yi lepeŋ.

¹³ A kwen liŋ mo si ’dani i kumut nanyit, a kijakwa liŋ ti mu ’diŋ mo ryoryöggi kenia kanyit nagon gwe kak kune.

¹⁴ Nyena a kaden liŋ lo gwon nyona ko kare kulo mo köti tine ’duröddu ki a lojo parik, kode kusik kase tulöddu kaŋo i kiden na kaden ti rudu. Iŋkoi, a kaden logon möju pioŋ jore kulo mo tine ’duröddu ki a lojo gwoso se; kogwon lepeŋat liŋ aje paki i tatua anyen tu i pirit na gwon i lukak na kak, i kiden na ŋutu logon a liŋo kana, kweja adi kilo a ŋutu logon tu kak i dili nagon ’bak ’dutet.

¹⁵ Nan MATAT Ŋun lo kulya adi, I diŋit na tiri lepeŋ kak i pirit na mulökö nu, a nan mo muŋge lepeŋ ko pioŋ ti tör nagon a nagulu, a mo tiŋdi se i delya na lepeŋ, a mo teŋgi pioŋ ti luruki, iŋkoi, a kine pioŋ najore mo wereyone wereyo. A nan mo tiŋdi Libanon i delya na lepeŋ, a kaden liŋ ti mu ’diŋ mo nopara nopara kogwon kulya kanyit.

¹⁶ A nan mo tiŋdi ŋutu ti jurön i böböŋdu i wopon na ’doro nanyit adi yurum, i diŋit na gubaddi nan lepeŋ kak i pirit na mulökö nu se ko ŋutu logon tu kak i dili nagon ’bak ’dutet kulo; a kaden liŋ ti Edene, logon a kaden ti Libanon lokwekwelen parik, kweja adi kaden liŋ logon a möju pioŋ najore kulo mo sukani suka i pirit na gwon i lukak na kak nu.

¹⁷ A lepeŋat köti mo iti kak i pirit na mulökö ko lepeŋ i pirit na geleŋ, i ŋutu logon a tatua ko baŋdujin kulo, kweja adi kilo a jurön logon köju parakiŋdya lepeŋ a sakani i tölimöt nanyit kulu.

¹⁸ I kiden na kaden ti Edene, lon logon gwoso do i kwelen ko i todumalan? Do mo jopa kak se ko kaden ti Edene i pirit na gwon i lukak na kak; a do mo topirikine i kiden na ŋutu logon a lawe a ko tawero, i pirit na geleŋ ko ŋutu logon a tatua ko baŋdujin kulo. Kine kulya kweja adi ŋilo a Paro se ko ŋutu kanyit logon jore parik kulo. Kilo a kulyaesi kwe ti MATAT ŊUN.