Ejikele 3 - Bibilia Buk na Ŋun nagon koti luŋu a

¹ A lepeŋ takiŋdye nan adi, ŋuro lo ŋuto, nyesi ŋo nagon a wuki do na; nyesi na buk na ŋudula, ko iti. jambi ko kötumit na Yisaraele.

² A kirut nan ŋaji kutuk nio, a lepeŋ tiŋdi nan buk na ŋudula na i nyesu.

³ A nye takiŋdye nan adi, ŋuro lo ŋuto, nyesi na buk na ŋudula nagon nan a tikin do na. Nyesi nye a yimönö. A kirut nan nyesi nyesu, a gwe paleleŋ köyö i kutuk gwoso siwatat.

⁴ A nye takiŋdye nan adi, ŋuro lo ŋuto, iti, jamaki ŋutu ti Yisaraele kulyaesi kwe.

⁵ Kogwon nan ’bayin soŋdu do i jur lo ŋutu logon jambu kutuk nago na Lwaka, ama nan soŋdu do i kötumit na Yisaraele.

⁶ Nan ’bayin soŋdu do i ŋutu ti jurön jore logon jambu kutusen nago ti Lwaka, logon do ti kurun jamesi kase. ’Diri, ko nan ködyö a son do ko ŋutu gwoso kilo yu, lepeŋat ködyö yiyiŋ do.

⁷ Ama kötumit na Yisaraele mo ti ’bön yiŋga do kogwon se ti ’dekan yiŋga nan; kogwon kötumit na Yisaraele liŋ gwon ko kusik a nago ko töilyet a iŋgo.

⁸ Mete, nan aje togulukin kwe inot i kusik kase, a nan aje togulukin komor inot i komorsikan kase gwoso dwönin lo mömörö.

⁹ Nan aje kon komor inot a nago gwoso ŋurupit logon lwöŋgu lele na wiyu. An do ko kujönö lepeŋat kode delya komorsikan kase najögitök, kogwon se a kötumit na karerenyak.

¹⁰ A lepeŋ takiŋdye nan adi, ŋuro lo ŋuto, yiŋe yiŋ kulya liŋ nagon nan jamakin do kine ko tiki se konut i töili.

¹¹ Iti ko ŋutu kasu lo gwon i to ’dupien yu kulu, ko jambi ko lepeŋat kulo ma ’di ko se ŋona yiyiŋ kode se ti ’bön yiŋga. Taki lepeŋat adi, Kulo a kulyaesi ti MATAT Ŋun.

¹² A kirut mulökötyo lo po ko Ŋun ’dukuŋdye nan ki, a nan yiŋge woŋon duma nagon wuŋun ko riŋit köyö i ki ’diŋ, i diŋit nagon minyo lo MATAT a pukun kaŋo kanyit i pirit gwiliŋit nu.

¹³ A nan iŋge yiŋ woŋon na köpukön ti ŋo lo gwon jörun kulo adi kapak kapak i to ’bo nase, se ko woŋon na mokosi logon a liteki lo gwon kase i mara kulo burunyuŋdya ko riŋit duma adi wunu.

¹⁴ A mulökotyo lo po ko Ŋun ’dukuŋdye nan ki a joŋgi nan i nene pirit, a nan iti ko woran na pape köyö i töili, ama a riŋit na MATAT gwe a duma köyö i mugun.

¹⁵ A kirut nan ’duröki ko ŋutu lo joŋa i to ’dupien kulo Tel-abiba yu, logon si ’da nyona ko kare Kebar. A nan iŋge si ’da ko lepeŋat i pirit na geleŋ ko perok buryo wawanya ’bak jambu.

Ŋun a wuluŋdyö Ejikele anyen gwon a katiyunit i kunyaŋu na Yisaraele

¹⁶ A i mukök na perok buryo, a kulyaet lo MATAT poki köyö adi,

¹⁷ Ŋuro lo ŋuto, nan aje kon do a katiyunit lo kötumit na Yisaraele; nyenagon ko do yiyiŋ kulya na jam nan kine, a ti do taki lepeŋat adi, MATAT lo kulya adi, Kunyar ta!

¹⁸ Ko nan ’dek kulya ko ŋuto loron adi, lepeŋ ’diri twatwan, a do ködyö gwe a ko takin lepeŋ adi, Kunyar! kweja adi ko do a ko jambu i kunyaŋu na ŋilo ŋuto loron i kö ’yu na kiko lonyit loron anyen lwöggu ru nanyit, nyena a ŋilo ŋuto loron mo twane twan nyuŋ gwon ko toron, ama a nan mo luŋgi rima kanyit konut i könin.

¹⁹ Ama ko do ködyö a takin ŋuto loron adi, Kunyar! a lepeŋ tine ’bön löpukuŋdyö kaŋo i toron nanyit, kode i kiko lonyit loron, lepeŋ mo twatwan nyuŋ gwon ko toron, ama a do mo lwöggi ru inot.

²⁰ Köti ko ködyö ŋuto lo rigwo a löpuköddu kaŋo i torigwo nanyit, a koŋdi toron, a nan iŋge tikin ŋurupit köpuket kanyit ŋerot, a lepeŋ mo twane twan; nyenagon kogwon do a ko takin lepeŋ adi, Kunyar! lepeŋ mo twatwan kogwon toron nanyit, a konesi kanyit na rigwo nagon nye a kon kune mo tine yeyeo kwöŋ; ama a nan mo luŋgi rima kanyit konut i könin.

²¹ Ama ko ködyö do a takin ŋuto lo rigwo adi, Kunyar! anyen lepeŋ gwon ti toroŋdya, a lepeŋ gwe a ko toroŋdya, ’diri nye mo ruru kogwon nye a yiŋ kunyaresi, nyena a do mo lwöggi ru inot.

Ŋun a kon nebi Ejikele a mumut

²² A riŋit na MATAT poki köyö i mugun i ŋinu pirit; a lepeŋ takiŋdye nan adi, Ŋine ki, iti i pirit nagon a ’dar; a nan mo tu jambi ko do nyu.

²³ Nyena a nan ŋine ŋien a iti i pirit nagon a ’dar, mete, a minyo lo MATAT gwo ’de nyu, gwoso minyo logon nan köju a met nyona ko kare Kebar lu; a nan ’dorone kak rupu.

²⁴ a kirut mulökötyo lo po ko Ŋun lupökine köyö i mugun a ’bilikiŋdye nan ki i gwo ’dan; a lepeŋ jambi ko nan a kulyani adi, Iti, kinuddi mugun konut kadi.

²⁵ Ama do ŋuro lo ŋuto mo totora ko patala, anyen do gwon ti bulö tu kaŋo i kiden na ŋutu.

²⁶ A nan mo tiŋdi ŋedep ilot i ’depakiŋdya konut i ’dako, anyen do gwon ti bulö jambu; a do mo tine bulo kunyaŋu lepeŋat, kogwon se a kötumit na karerenyak.

²⁷ Ama ko nan a jambu ko do, a nan mo paji kutuk inot a do mo takiŋdye se adi, Kulo a kulyaesi ti MATAT ŊUN. Ko ŋuto logon yiyiŋ a ti nye yiŋge, ko logon rerenya yiŋga, a ti nye renyani; kogwon se a kötumit na karerenyak.