Ejikele 29 - Bibilia Buk na Ŋun nagon koti luŋu a

Nebi Ejikele a kikiŋdyö ŋutu ti Ejipeto kulya narok

¹ A i perok puök wot murek ti yapa topuök, i kiŋa topuök, a kulyaet lo MATAT poki köyö adi,

² Ŋuro lo ŋuto, komorgi Paro mor lo Ejipeto ko keŋ kulya narok i kulya kanyit ko i Ejipeto liŋ.

³ Tambi jambu, ko taki lepeŋ adi, MATAT ŊUN lo kulya adi, Do Paro mor lo Ejipeto, do kinyop duma logon piriki i kiden na kinasi ti Supiri, mete, nan a miriku ilot. Do kulya adi, Supiri ilot a ilot lomore, do lo teteŋdya lepeŋ.

⁴ A nan mo tiŋdi jabadalan konut i lukalaya, a mo tiŋdi somot ti kinasi kulök i ’depakiŋdya konut i ’böriköt, a nan mo pikuŋdye do kaŋo i kiden na kinasi kulök ti Supiri, se ko somot liŋ ti kinasi kulök logon a ’depakiŋdya konut i ’böriköt kilo.

⁵ A nan mo gubaddi do mu ’diŋ, do se ko somot liŋ ti kinasi kulök; a do mo ’dorone i pirit nagon a ’dar kana, a öpu inot mo tine ’dume i nuka; a nan mo tiŋdi do a kinyo lo kijakwa se ko lo kwen.

⁶ A kirut ŋutu liŋ logon si ’da Ejipeto kulo mo deŋdi adi nan a MATAT, kogwon do aje gwon a ture pa ’duŋi i kötumit na Yisaraele;

⁷ i diŋit na morgi se do go nu, a do iŋge ’deŋgu kase i könisi, a kidyö kase iŋge ’du ’duŋötu; iŋkoi, i diŋit nagon lepeŋat tökökiŋdyö ’börik konut nu, a do ’deŋgi ’deŋgu, a tiŋdi mokosi kase i böböŋdu.

⁸ Nyenagon nan MATAT ŊUN lo kulya adi, Mete, nan mo jajakin do baŋdujin, a mo tokoddi ŋutu se ko kijakwa kaŋo konut.

⁹ A jur lo Ejipeto mo gwe a murwö ko a ruba, a ŋutu ti lu jur mo deŋdi adi nan logon a MATAT, kogwon do a jambu adi Supiri a ilot. do lo teteŋdya lepeŋ.

¹⁰ Nyenagon mete, nan a miriku ilot do se ko kinasi kulök ti Supiri, a nan mo koŋdi jur lo Ejipeto a ruba ko a murwö, suluja Migedola tojo ko Sewene, köti tojo ko lokökorit lo Etiopia.

¹¹ A ŋutu mo tine lwöpöddu kata, a kijakwa mo köti tine wörö kata; a nye mo tine si ’darikin ko kiŋajin merya iŋwan.

¹² A nan mo koŋdi jur lo Ejipeto a murwö i kiden na jurön logon a murwöki, a köjinö kanyit mo gwe a murwöki ko kiŋajin merya iŋwan i kiden na köjinö nagon a rubajin. A nan mo torekiŋdye ŋutu ti Ejipeto i jurön, a nan mo gwögwölökiŋdye lepeŋat i kiden na jurön.

¹³ Kogwon nan MATAT ŊUN lo kulya adi, I ’dutet na kiŋajin merya iŋwan, a nan mo momoruŋdye ŋutu ti Ejipeto suluja i ŋutu ti jurön logon lepeŋat a tore aji kata kulu.

¹⁴ A nan mo nyökuŋdye ŋutu ti Ejipeto lo gwon i to ’dupien kulu, a nan mo joŋdi lepeŋat bot i jur lo Patorosa logon se a pipiluŋdya kata lu, nyu a lepeŋat mo gwe ko tumatyan nagon a namunyan.

¹⁵ A ŋina tumatyan mo gwe a namunyan lwölwöŋ kunie tumatyanjin, a mo köti tine bulakiŋdya mugun ki lwölwöŋ kulye jurön, a nan mo tiŋdi ŋutu ti Ejipeto i gwon ku ’dik parik, nyena a lepeŋat mo köti kwöŋ tine saŋu jurön.

¹⁶ A kötumit na Yisaraele mo tine yinikin ’börik i Ejipeto köti kwöŋ; a kine kulya mo toyiyikiŋdye kötumit na Yisaraele toron nase nagon se a tu i pija na Ejipeto anyen parakiŋdya lepeŋat na. A kirut lepeŋat mo deŋdi adi nan logon a MATAT ŊUN.

¹⁷ A gwe sona i lor geleŋ lo yaŋa togeleŋ, i kiŋa tomerya murek wot buryo, a kulyaet lo MATAT poki köyö adi,

¹⁸ Ŋuro lo ŋuto, Nebukadaresar mor lo Babela a tiŋdu ŋutu kanyit kamörök i kita parik anyen mörö ko Turo, tojo ko kusik kase liŋ a jeja ko ’doko, a ködyö kase liŋ iŋge jeja a ’dikasin. Ama lepeŋ se ko ŋutu kanyit kamörök a ko ryeju ’bulit Turo yu na möröri se ko diŋit a najo nu.

¹⁹ Nyenagon nan MATAT ŊUN lo kulya adi, Mete, nan titikin Nebukadaresar mor lo Babela jur lo Ejipeto, a nye mo ’dokoddi tukwörien nanyit, a köŋi nye, a ryaggi nye; a ŋina tukwörien mo roparikin ŋutu kanyit kamörök.

²⁰ Nan aje tikin lepeŋ jur lo Ejipeto anyen roparikin kita nanyit na mörö, kogwon ŋutu kanyit kamörök a kitakiŋdya nan. Kilo a kulyaesi kwe ti MATAT Ŋun.

²¹ A i pilu lor a nan mo tiŋdi uŋguri i punun kaŋo i kötumit na Yisaraele, a nan mo tiŋdi do ŋuro lo ŋuto i jambu kase kiden. A kirut lepeŋat mo deŋdi adi nan logon a MATAT.