Ejikele 27 - Bibilia Buk na Ŋun nagon koti luŋu a

Köli delyaet i kulya ti Turo

¹ A kulyaet lo MATAT poki köyö adi,

² Do ŋuro lo ŋuto, yo ’yi köli delyaet i kulya ti Turo.

³ Kulyani ko Turo adi, Do na gwon i kijit na tör, do nagon tujarakiŋdya ŋutu ti jurön lo gwon i tikönyö na, nan MATAT ŊUN lo kulya ko do adi, Do Turo, do aje kulya adi do kwe-kwelen bia parik lwölwöŋgu.

⁴ Lokökoritan kulök gwon i kiden na tör duma na ’balaŋ, katetenak kulök a teten do a ki ’bo lokwekwelen bia parik lwölwöŋgu.

⁵ Lepeŋat a teteŋdya baulan kunök liŋ i kaden saru lo jwe Senir, a lepeŋat joŋdi ködini logon gwoso tika Libanon yu a tetenakiŋdye do a ködini logon toraki ’e boŋgo nagon wuköji ’e do.

⁶ A lepeŋat tetenakiŋdye do layat i kaden temejik ti Basan; lepeŋat aje tetenakiŋdya do ’baŋ lo ki ’bo i kaden teasur lo gwon i tikönyö ti Kitim, kilo kaden a ’bikiki tupesi ti kala ti tomya anyen gwon a tokwelenyesi.

⁷ Boŋgo na wuköji ’e do na a boŋgo na ’but na jwe Ejipeto nagon a ripaki minyojin kata, a nye gwe gwoso beret inot. Boŋgwat nagon tiŋdu tölimöt i ’baŋ ilot lo ki ’bo a naŋem kune ko a na ’bule. Kine boŋgwat jwe i tikönyö ti Elisa.

⁸ A ŋutu lo si ’da Sidona se ko lo si ’da Arewada kulo gwe a kakamak kulök. Do Turo gwoso ki ’bo, ŋutu logon a bodwat kata konut logon kambu do.

⁹ A ŋutu temejik lo po Gebala logon a bodwat gwe kata konut logon ’di ’dija piritön nagon a tutulujö konut i mara. Ki ’bojin liŋ logon wörö i tör duma na ’balaŋ kiden se ko kakitak kase gwo ’dan konut i kijit i togwöja na tito kase.

¹⁰ A ŋutu ti Parasa, ko ti Luda, se ko ti Put kitari do gwoso kamörök walan se ko ŋutu kulök i pirit na geleŋ; a lepeŋat iŋge lilikiŋdyö ’bukwö kase ko terebukan kase logon a witiöt kulo konut i mariŋ loki. Kilo a se logon jakiŋdya do minyo.

¹¹ A ŋutu ti Arewada se ko ŋutu kulök kamörök gwe i loki na goroma kunök nagon a mariŋan, a ŋutu ti Gamada gwe i bililyat kulök tiyisi; a lepeŋat leleji ’bukwö kase lolorga goroma kunök liŋ; kilo a se logon tokweleŋdu do bia parik lwölwöŋgu.

¹² Ŋutu lo po Tarasisa po konut ni i tujaŋu kogwon tukwörien inot duma na ŋo liŋ ka ’de ka ’de; kweja adi pödö, ko witiöt, ko bödili, se ko risasi, anyen togwouŋdya ŋo kunök na tutugwörö.

¹³ Ŋutu lo po Yawan, ko lo po Tubala, se ko lo po Meseke kulo po konut ni i tujaŋu joŋdya ŋutu se ko tito nagon a mölwö anyen togwouŋdya tito kunök.

¹⁴ Ŋutu lo po Bete-togarema kulo tugwörökiŋdyö do kusanjin, ko kusanjin ti gor, se ko kaineki dumalak.

¹⁵ Ŋutu ti Dedan po konut ni i tujaŋu; jurön jore lo gwon i tikönyö a piritön kunök tujaresi, a ŋutu kase iŋge jakiŋdya do kala ti tomya, se ko kaden na luŋu a pöyitiöt.

¹⁶ Ŋutu lo po Edom po konut ni i tujaŋu kogwon tito kunök jore parik, a lepeŋat togwouŋdye ŋo kunök ko ŋurupö nakwekwelen na luŋu a antarak, ko boŋgwat na ’bule, ko boŋgwat nagon a ripaki minyojin, ko boŋgwat naparere, ko ŋurupö nakwekwelen na luŋu a muŋan, se ko ŋurupö na luŋu a aŋatiso.

¹⁷ A ŋutu ti jur lo Yuda se ko ti jur lo Yisaraele iŋge po konut ni i tujaŋu, a jakiŋdye do ’bolot Minit yu, se ko ’bolot na rarayaka, ko siwatat, ko welet, se ko memelan nagon a winikö.

¹⁸ Ŋutu ti Damaseke po konut ni i tujaŋu kogwon tito kunök jore pa rik, kogwon tukwörien inot duma na ŋo liŋ ka ’de ka ’de; kweja adi binyo na jwe Kelebon, ko kupir lokwe ti köbilu,

¹⁹ se ko binyo na jwe Ujala, a lepeŋat togwouŋdye tito kunök. A lepeŋat iŋge joŋdya witiöt lo ninitö, ko kida na mon ’bura se ko lomuryeje anyen togwouŋdya tito kunök.

²⁰ A ŋutu lo po Dedan poŋdi konut ni i tujaŋu joŋdya boŋgwat na peta i ki ’dirinö ti kusanjin anyen ŋutu jojo si ’daki i loki nase.

²¹ A ŋutu lo po i jur lo Arabi se ko temejik liŋ ti Kedar poŋdi konut ni i tugwörökiŋdyö na do na yisi, ko köbilu lopijoki se ko yidin; kweja adi ŋina a tujaŋu nase se ko do.

²² A katujarak ti Seba se ko ti Rama poŋdi konut ni i tujaŋu, a lepeŋat togwouŋdye ŋo kunök ko ŋo kase liŋ ka ’de ka ’de lo nyunyume lo mon ’bura kulo, ko ŋurupö liŋ nakwekwelen na gwörö go se ko dakap.

²³ Ŋutu lo po Karan, ko lo po Kane, ko lo po Edene, ko katujarak lo po Seba, ko lo po Asur, se ko lo po Kilemada yu kulu po konut ni i tujaŋu.

²⁴ Kilo a ŋutu logon po konut i piritön tugwöriesi i tugwörökiŋdyö na do boŋgwat nakwekwelen parik, ko na ’bule, ko nagon a ripaki minyojin kata, ko boŋgwat nagon a ti gweyarijin ka ’de ka ’de nagon a ŋudula a iŋge tora ’bura ko patala.

²⁵ A ki ’bojin logon dööddu Tarasisa kulo ’dokoddi tito kunök na tutugwörö. Nyena do Turo gwon gwoso ki ’bo logon a tojore ko a sopa pömöni i kiden na tör duma na ’balaŋ.

²⁶ Ŋutu kulök kakamak a kamara do i kiden na tör, a köbuŋöt lo wukuŋdyö i swöt lo ’yure iŋge ’be ’beleŋ do nyu i kiden na tör duma na ’balaŋ.

²⁷ A tukwörien inot, ko tito kunök, ko ŋo kunök na tutugwörö, ko kakitak kulök, ko ŋutu logon tuwöröju do ki ’bo, ko ŋutu kulök logon ’di ’dija piritön nagon a tutulujö konut i mara, ko ŋutu kulök katujarak, ko ŋutu kulök liŋ walan kamörök lo gwon konut lukata, se ko teŋon ti ŋutu kulök liŋ lo gwon konut lukata kulo iŋge ’dirön i kiden na tör duma na ’balaŋ i lor lo tukarari do lu.

²⁸ A nagon ŋutu logon tuwöröju do kulo lulujö nu, a tör köbuŋe köbuŋö a ya ’yi ya ’yu parik.

²⁹ A ŋutu liŋ kakamak kiuŋdye kaŋo kase i ki ’bojin. A kakitak ti ki ’bojin se ko ŋutu lo tuwöröju ki ’bojin kulo gwo ’de i kijit,

³⁰ a luluje parik kogwon kulya kunök, a gwine gwien parik. A lepeŋat raddi kujöp kase i kusik, a gwugwuluŋge ’börik i kurök ti kimaŋ;

³¹ a lepeŋat ’bariŋdi kusik kase kogwon kulya kunök, a jupuni boŋgwat terekesi, a lepeŋat gwine do ko töilyet lupötwör ko delya a duma parik.

³² A na luluje se nu, a se yoloni köli lo twan i kulya kunök, a delyani adi, Woidio do Turo nagon a toyipa asut i kiden na tör duma na ’balaŋ!

³³ I diŋit nagon köju tito kunök ’duma kaŋo i ki ’bojin kata nu, kine tito a temakiŋdya i gweyajin jore ti ŋutu, a do iŋge tukwörieŋdu moran ti kak ko tukwörien inot duma se ko po kunök na tutugwörö kune.

³⁴ Nyena söŋinana yalajin ti tör aje ’beleŋ do i piritön nagululök ti tör; tito kunök na tutugwörö se ko kakitak kulök liŋ aje ’dirön ko do i pirit na geleŋ.

³⁵ A ŋutu liŋ logon si ’da i jurön lo gwon i tikönyö kulo iŋge lwö ’yu kase i töilyet ko do; a moran kase iŋge kujönö parik, a komorsikan kase gwe a nagusu-lak.

³⁶ A katujarak lo gwon i jurön ka ’de ka ’de kulo iŋge kweni ’ye do, do aje wora a po tokujönöet, do aje likin asut.