Ejikele 26 - Bibilia Buk na Ŋun nagon koti luŋu a

Nebi Ejikele a kikiŋdyo ŋutu ti Turo kulya narok

¹ A ko gwe sona i kiŋa topuök wot geleŋ i lor geleŋ lo yaŋa, a kulyaet lo MATAT poki köyö adi,

² Ŋuro lo ŋuto, kogwon Turo a ’dö ’döju i kulya ti Yerusalema adi, Aha! Nye nagon a kötumit na tiri ŋutu ti jurön na aje ’beleŋo, kötumit nanyit aje paki nan; lepeŋ aje kona a murwö, a nan mo worani a kwörinit.

³ Nyenagon nan MATAT ŊUN lo kulya adi, Do Turo, mete, nan a miriku ilot, nan mo totopikin do jurön jore i möro ko do, gwoso nagon tör duma na ’balaŋ topikiŋdye yalajin i ya ’yu ko riŋit konut i mara na.

⁴ A se mo köŋi goroma nagon a mariŋan kunök do Turo, a mo dukakiŋdye bililyat kulök kak, a nan mo woroddi kujöŋ kunök kaŋo, a koŋdi do a lele nagon gwon kana ’bak nene ŋo,

⁵ a do mo gwe a pipi i kiden na tör duma na ’balaŋ, a ŋutu mo loji ku ’yilan kase konut loki; kogwon nan aje jambu sona, ŋilo a nan MATAT ŊUN lo kulya. A do mo worani a po ryakat ti jurön,

⁶ a ŋwajik kunök na gwon i jur kaŋo kune mo totokoni kak ko baŋdujin, a ŋutu liŋ mo dene den adi nan logon a MATAT.

⁷ Nan MATAT ŊUN lo kulya adi, Mete, nan jajakin do nagon a Turo Nebu-kadaresar mor lo Babela, logon a mor lo moran. Lepeŋ mo po i swöt lo lobot ko kusanjin lo jiggo arabiajin, ko kamörök lo wörö ko kusanjin, se ko yodom duma lo kamörök.

⁸ A nye mo totoggi ŋwajik kunök na gwon i jur kaŋo kunu ko baŋdujin. A lepeŋ mo teteŋdi takajin najo ki a tumesi kunök, a mo ’du ’yi ’domio dumalak ti liŋo anyen mörörikin do, a na poŋdi ŋutu kanyit kamörök i mörö ko do nu, a se mo ’bilikiŋdye ’bukwö kase temejik nagon ’di ’dilu kase i kusik anyen gaju se.

⁹ A nye mo tiŋdi ŋutu kanyit i jogga na goroma kunök nagon a maripan ko tito jokesi lobot anyen duka-kiŋdya se kak, a ŋutu kanyit logon ko tuluö mo tukukiŋdye bililyat kulök kak.

¹⁰ A nye mo muŋge do ko ŋutut na topiun ŋutu lo wörö ko kusanjin aliŋan na, a goroma kunök mo böböŋdi böböŋdu i wopon na arabiajin lo jikö ko kusanjin se ko na kajopak kase, i diŋit na lupöri se konut i kötu-mitön gwoso na lupöddi ŋutu i köji nagon goroma kanyit a tutulujö nu.

¹¹ A sulukwakan ti kusanjin kanyit mo ryoryoŋgi kikolin kulök liŋ ti köji, a lepeŋat mo totoggi ŋutu kulök kak ko baŋdujin, a togwi ’diesi lobot logon ta kwakwaddu se kilo mo ’do ’done kak.

¹² A kilo merok mo ripaddi tukwö-rien inot, a mo ryaŋgi po kulök lo tutugwörö, a mo duyömbi kak goroma kunök nagon a mariŋan kine, a mo duŋge kak kadijik kunök nakwekwelen, a se mo gubaddi i tör duma na ’balaŋ kata ŋurupö kulök ti köji se ko baulan, ma ’di tupesi ti liŋo na pituŋdyö kune.

¹³ A nan mo toyipaji kölisi kulök i yolo, a woŋon na arabiajin kunök mo köti tine yiŋa kwöŋ.

¹⁴ A nan mo tiŋdi do i gwon a lele nagon gwon kana ’bak nene ŋo, a ŋutu mo loji ku ’yilan kase konut loki; a do mo gwe ti nyökö ’duko kwoŋ; kogwon nan MATAT aje jambu sona. Kilo a kulyaesi kwe ti MATAT ŊUN.

¹⁵ Nan MATAT ŊUN lo kulya ko do Turo adi, Ŋutu ti jurön lo gwon i tör duma na ’balaŋ nyona kulo mo böböŋdu i woŋon na ’doro inot adi yurum, i diŋit na ’duari ŋutu lo böböŋöji se ko i tatua konut kiden nu!

¹⁶ A kirut moran liŋ ti kilo jurön lo gwon i tör duma na ’balaŋ nyona kulo mo kiuŋdye kak i si ’daesi kase ti tumatyanjin, a mo rusuŋdye kaŋo boŋgwat kase najo nagon a muisi se ko boŋgwat kase na ripaki minyojin kata kune; a böböŋdu mo muluje lepeŋat gwoso boŋgwat; a se mo si ’dani i kujöŋ a mo böböŋdi böböŋdu diŋitan liŋ, a mo söŋi söŋu ko do ko kujönö.

¹⁷ A lepeŋat mo yo ’yi köli delyaet kogwon kulya kunök adi, Wöidiö do köji na kukwön, do aje likin i kiden na tör duma na ’balaŋ! Do köju a wa i tör kata, a do se ko ŋutu kulök köju iŋge tokujöŋdu ŋutu lo si ’da i tör nyona kulo.

¹⁸ Soŋinana jurön lo gwon i tör duma na ’balaŋ nyona kulo böböŋdu ko lor lo ’doro ’yi do lu, iŋkoi, tikönyö kukujönö ko tu ’ba-kala inot.

¹⁹ Kogwon nan MATAT ŊUN lo kulya adi, I diŋit nagon nan mo koŋdi do a köji nagon a ruba, gwoso köjinö nagon ti si ’darikin, i diŋit nagon nan toŋiuŋdye pioŋ i togulu na tör i muluja na do nu,

²⁰ a kirut nan mo rudaddi do kak i pirit na geleŋ ko ŋutu logon a tu kak i dili nagon ’bak ’dutet kulo tojo i ŋutu lo twatwa i diŋitan ti köju kunu. A nan mo tiŋdi do i si ’da i pirit na gwon i lukak na kak i pirit nagon ’beron a ko si ’darikin, mora ko ŋutu logon a tu kak i dili nagon ’bak ’dutet kulu. Nyena a do mo köti tine si ’darikin asut, a do mo gwe ’bak pirit i jur lo ŋutu lo gwon jörun. gwe ’bak pirit i jur lo ŋutu lo gwon jörun.

²¹ A nan mo tukaŋi do a ŋo sörit, a do mo gwe ’bayin asut, ma ’di ŋutu ködyö a ga ’yu do, ama a do mo köti tine rye kwöŋ. Kilo a kulyaesi kwe ti MATAT ŊUN.