Ejikele 25 - Bibilia Buk na Ŋun nagon koti luŋu a

Nebi Ejikele a kikiŋdyö ŋutu ti Amon kulya narok

¹ A kulyaet lo MATAT poki köyö adi,

² Ŋuro lo ŋuto, ko-morgi ŋutu ti Amon ko keŋ kulya narok i kulya kase.

³ Tambi ko ŋutu ti Amon adi, Yiŋge ta kulyaesi ti MATAT ŊUN. MATAT ŊUN lo kulya adi, Kogwon ta aje ’dö ’döju na meddi ta pirit nio nake na rurwan i körö nu, a ta iŋge ’dö ’döju jur lo Yisaraele i diŋit nagon nye aje kona a murwö nu, a ta iŋge ’dö ’döju kötumit na Yuda i diŋit nagon se aje joŋa i to ’dupien nu,

⁴ nyenagon nan mo puŋutukin ta a rutat i ŋutu ti swöt lo ’yure, a se mo ’beggi merajin kase i kiden na jur losu, a se mo si ’dani kata; a se mo nyesi ludweki kasu; a se mo möji le kasu.

⁵ A nan mo koŋdi Raba a pirit yukit na kamilojin, kweja adi nan mo kökon jur lo ŋutu ti Amon a goro lo yidin, a ta mo dene den adi nan logon a MATAT.

⁶ Nyena nan MATAT ŊUN aje jambu adi, Kogwon ta aje naŋgu könisi kasu, a lame lam, a lyöŋi lyöŋön ko ’dö ’döju kasu i töilyet i maŋdu na jur lo Yisaraele,

⁷ nyenagon mete ta, nan aje riöddu könin lio kasu loki, a nan mo ŋutukiŋdye ta i könisi ti ŋutu ti jurön gwoso ŋo ryakat, a nan mo tu ’baka ’yi ta i gweyajin liŋ ti ŋutu, a nan mo tiŋdi ta i tatua i kilu jurön, a nan mo tukaŋi ta. A kirut ta mo dene den adi nan logon a MATAT.

Nebi Ejikele a kikiŋdyö ŋutu ti Moaba kulya narok

⁸ Nan MATAT ŊUN lo kulya adi, Kogwon Moaba a kulya adi, Mete, kötumit na Yuda gwon jojo ko kulye jurön liŋ,

⁹ nyenagon nan mo ŋaŋa swötön ti Moaba suluja i köjinö na gwon i lokökoritan kanyit. Kine a köjinö nakwekwelen, kweja adi, Bet-yesimot, ko Bala-meon, se ko Kiryataim.

¹⁰ A nan mo ŋutukiŋdye Moaba se ko Amon i pirit na geleŋ a rutat i ŋutu ti swöt lo ’yure, anyen ŋutu ti Amon mo gwon ti yeyeo i kiden na jurön,

¹¹ a nan mo ’duŋökiŋdye ŋutu ti Moaba putet. A kirut lepeŋat mo dene den adi nan logon a MATAT.

Nebi Ejikele a kikiŋdyö ŋutu ti Edom kulya narok

¹² Nan MATAT ŊUN lo kulya adi, Kogwon Edom aje ropakiŋdya kötumit na Yuda ŋo naron, ko aje toroŋdya parik i ropakiŋdya na lepeŋat,

¹³ nyenagon nan MATAT ŊUN lo kulya adi, Nan mo ririörö könin lio i jur lo Edom, a mo tu ’baka ’yi ŋutu se ko kijakwa i lukata nanyit. A nan mo koŋdi lepeŋ a murwö suluja Teman ma ’di tojo ko Dedan, a se mo totokoni kak ko baŋdujin.

¹⁴ A nan mo tiŋdi ŋutu kwe Yisaraele i ropakiŋdya na ŋutu ti Edom ko ropet nio; a lepeŋat mo konakiŋdye ŋutu ti Edom gwoso i woran nio ko gwoso i ŋoma nio; a se mo dene den ko nan ropakiŋdya toron ada. Kilo a kulyaesi kwe ti MATAT ŊUN.

Nebi Ejikele a kikiŋdyö ŋutu ti Pelesete kulya narok

¹⁵ Nan MATAT ŊUN lo kulya adi, Kogwon ŋutu ti Pelesete aje ropakiŋdya toronjin ko aje robba ko töilyet lorok se ko tomirikulan nagon ti ’duddyö,

¹⁶ nyenagon nan MATAT ŊUN lo kulya adi, Mete, nan mo ririörö könin lio kaŋo i ŋutu ti Pelesete, a nan mo tu ’baka ’yi ŋutu ti Kereti, a tukaŋi pitönö ti ŋutu logon si ’da nyona ko tör kulo.

¹⁷ A nan mo ropakiŋdye se ko ropesi temejik, a mo riŋge se parik ko ŋoma. A kirut lepeŋat mo dene den adi nan logon a MATAT, i diŋit nagon nan mo ropakiŋdye se toron nase nu.