Ejikele 24 - Bibilia Buk na Ŋun nagon koti luŋu a

Lilim lo sape deret

¹ A kulyaet lo MATAT köti poki köyö i kiŋa tobuŋwan, i perok puök ti yapa topuök, adi,

² ŋuro lo ŋuto, wuröki karin ti ŋilo lor gwak kak ŋilo a lor gwak logon mor lo Babela aje tumba Yerusalema.

³ Tamakiŋdye kötumit na karerenyak lilim adi, Nan MATAT ŊUN lo kulya adi, ’Dukukiŋdye sape logon a mölwö i kimaŋ, köti ’buköki pioŋ i lukata nanyit;

⁴ tiki tupesi ti lokore i lukata nanyit, kweja adi tupesi liŋ na ’but, tojorene lepeŋ ko nyuti, ko gele, se ko kuyu liŋ lo nyunyumwe;

⁵ ’dumuŋdye turu ’buti geleŋ logon nyumwe i teŋ. Sone kaden i ŋilo sape mukök; deŋi po na gwon i lukata nanyit kune, ko ’duni ’du kuyu kanyit köti i lukata nanyit.

⁶ Nyenagon nan MATAT ŊUN lo kulya adi, Wöidiö köji nagon a jore ko katatuak! Wöidiö köji na gwon gwoso sape logon a mölwö logon a lo ’dokwe lukata, logon lo ’dokwe nanyit a ko lala aji kaŋo! ’Dume tupesi kaŋo i lukata nanyit abur ’bak nyunyumbö.

⁷ Kogwon köji gwon ko rima kanyit lukata, a nye iŋge ’bukökin se i lele nagon gwon kana ’bak nene ŋo, a nye gwe a ko ’bukökin kak anyen yiyik ko kujöŋ.

⁸ Ama nan köti aje ’bukökin rima na ’buk nye kune i lele nagon gwon kana anyen gwon ti yikö, anyen totule ’yu woran nio anyen nan roropakiŋdya.

⁹ Nyenagon nan MATAT ŊUN lo kulya adi, Woidio köji nagon a jore ko katatuak! Nan mo köti ’du ’du ’yu ’dome duma lo kaden anyen nanama.

¹⁰ ’Du ’duluki kaden nyin, to ’depaki kimaŋ, dere der lokore ’bura, yure yur kigwo a nadö ’dikök, ti kuyu noke nokan.

¹¹ A kirut ti do tiki sape logon a mölwö lo i kuk nagon a kimaŋ loki ’bak nene ŋo lukata, ti nambi nambu pape parik parik, anyen lut kanyit böŋö ’yuruŋdya kaŋo i lukata nanyit, iŋkoi, anyen lo ’dokwe nanyit ’ba’baka.

¹² Nan tuŋ tudaraju mugun kana, kimaŋ ti namun lo ’dokwe nanyit kaŋo.

¹³ Do ŋina köji, ŋina lo ’dokwe a towutön nagon toluddya do na, nan a möŋu toke ’ya do, a do gwe a ko kelan, nyenagon do mo köti ti kelan tojo woran nio a ’bakakin konut loki.

¹⁴ Nan MATAT aje jambu, kine ŋo mo kokona, ’diri nan mo kökon se; a nan mo tine kukutörö bot, a nan mo tine pitökiŋdyö kode löpuggö i ŋo nagon nan mo kökon na. Nan mo ’du ’duŋökin do putet gwoso i kikolin kulök ko i konesi kunök. Kilo a kulyaesi kwe ti MATAT ŊUN.

Twan na nakwan na Ejikele

¹⁵ A kulyaet lo MATAT poki köyö adi,

¹⁶ Ŋuro lo ŋuto, mete, nan gwe nyona ko jekaddu i daŋ geleŋ ŋo nagon konyen kulök a lyöŋgi na; ama ti do gwe ti delya, ti do gwe ti gwien, ti politan kunök ködyö gwe ti ’buköŋ kak.

¹⁷ ’Duani ’dua, ama ’bayin ko gworo logon yiyiŋa; ti do gwe ti delya nye na twan na. Dukukiŋdye ema konut i kwe, sukiŋdye kamuka konut i mokosi, ti do gwe ti muggö kutuk inot ko boŋgo a delyaet, ti do gwe ti nyesu kinyo lo ŋutu lo dedelya.

¹⁸ Nyena a i ko ’bure a nan nyönyö-kökiŋdye ŋutu kine kulya, a i tokotyaŋ a narakwan nio twane twan. Kotumalu a nan iŋge koŋdya gwoso na saraki ’e nan na.

¹⁹ A ŋutu pipije nan adi, Kine ŋo na kon do kine kweja nyo kayaŋ?

²⁰ A kirut nan takiŋdye lepeŋat adi, Kulyaet lo MATAT a pokin köyö adi,

²¹ Taki kötumit na Yisaraele adi, MATAT ŊUN lo kulya adi, Mete, nan mo kökör pirit nio nake na rurwan nagon ta bu ’ye ’borik adi ta a iŋgo ŋina, ko ŋo nagon konyen kasu a lyöŋgi na, se ko ŋo nagon töilyet kasu ’de ’deggi na; a ŋwajik kasu lulyan ko nawate nagon ta a kölökin yu kunu mo totokoni kak ko baŋdujin.

²² A ta mo koŋdi gwoso na koŋdi Ejikele na; a ta mo tine muggö kutusen kasu ko boŋgwat a delyaesi, a ta mo tine nyesu kinyo lo ŋutu logon dedelya.

²³ A ta mo dukukiŋdye emalan kasu i kusik, a mo sukiŋdye kamuka kasu i mokosi, a ta mo tine delya, a tine gwien, ama a ta mo sokara sokara kogwon toronjin kasu, a ta mo ’du ’duati ’du ’duatu ko ’börik.

²⁴ A Ejikele mo gwe a kweyet kasu; ŋo liŋ nagon nye a kon kine ta mo köti kökon se. Ko kine ŋo mo a pukun a ta mo kirut dene den adi nan logon a MATAT ŊUN.

²⁵ Ŋuro lo ŋuto, i ŋilu lor nan mo ’dumaddu kaŋo pirit nase nago na titiyu nagon se lyö lyöŋgi ko a minyo lose na, nagon konyen kase a lyöŋgi na, nagon töilyet kase ’de ’deggi na, se ko ŋwajik kase lulyan ko nawate.

²⁶ I ŋilu lor a ŋuto lo rwösuŋdyö lo mo poŋdi konut ni i takiŋdya na do na liŋio ti kine kulya.

²⁷ A i ŋilu lor a ŋedep ilot mo laggi laggu, a do mo jambi ko ŋuto lo rwösuŋdyö lo, a do mo tine gwon a mumut köti. Nyena a do mo gwe a kweyet kase, a se mo dene den adi nan logon a MATAT.