Ejikele 22 - Bibilia Buk na Ŋun nagon koti luŋu a

Toronjin ti Yerusalema

¹ A kulyaet lo MATAT poki köyö adi,

² Ŋuro lo ŋuto, do ŋona gwon ajo i ’dupökiŋdyö na köji putet nagon ŋutu kanyit a katatuak? Do ’diri ’du ’dupökin lepeŋ putet a kwekiŋdye lepeŋ po kanyit liŋ na mamana na kon ŋutu kanyit kune le?

³ Kulyani adi, MATAT Ŋun lo kulya adi, Wöidiö köji nagon ŋutu kanyit lukata a katatuak, aje jakiŋdya mugun karan! Wöidiö köji nagon ŋutu kanyit tetenakiŋdya ’börik nyömuejin logon a punyen a tolutesi kanyit!

⁴ Do ŋina köji gwon ko toron kogwon rima na ’bukörö ŋutu kulök kune, a do iŋge toluta ko nyömuejin lo teten ŋutu kulök kulo. Do aje ’duŋgö perok kulök ku ’dik, kipajin kulök ti ’dutet gwe nyona. Nyenagon nan aje kon do a po nagon gweyajin ti ŋutu ’dö ’dö ko a po nagon jurön kwekweni ’e.

⁵ Do köji nagon karin kunök jamaji arabat, nagon ŋutu kulök wowopon parik na, ŋutu lo gwon pajo ko lo gwon nyona kulo mo kwekweni ’e do.

⁶ Mete, kasarak ti Yisaraele liŋ lo gwon i lukata inot kilo a kitari riŋit nase na tumatyan i ’buköddu na rima.

⁷ ŋutu a lauŋdya komonye kase se ko kopote kase konut lukata, se a ru ’ya ŋutu lo mömönuŋdyö, a konakiŋdye kikijikö se ko karu ’bejin arabat konut lukata.

⁸ ŋutu kulök a lanu po kwe nake na rurwan, a iŋge kör sabatajin kwe.

⁹ Do Yerusalema, ŋutu kata konut kiden logon yegga kulya ’burönö anyen ’buköddu rima; ŋutu kata konut kiden logon nyesu i piritön kwakwasesi na gwon i ko ’dulan ti merya kune; ŋutu kata konut kiden logon koŋdya ko towutön.

¹⁰ ŋutu kata konut kiden logon laŋgu dotoesi kase komonye; ŋutu kata konut kiden logon doto ko ŋutu nagon lolokia.

¹¹ A kulye ŋutu dotoni ko wate ti kulye ŋutu, a kulye toluddye wate ti ŋwajik kase i koŋdya na towutön; kulye kata konut kiden logon yoyoja kiasirik nagon a ŋwajik kase monye anyen dodotori.

¹² ŋutu kata konut kiden logon wuju ropesi nagon wuki a lwön anyen ’buköddu rima, a ta luŋgi ’yalet ko ŋutu lo kuröddu po kasu, a ri ’di-kiŋdye lepeŋat i robba ko wöli, a ta iŋge böŋö nan. Ŋilo a kulyaet lio lo MATAT ŊUN.

¹³ Nyenagon mete, nan a naŋgu könisi dedelya kogwon ’bulit na ryö ŋutu kulök i kikolin lorok, koti kogwon rima nagon a ’buköŋ konut kiden kune.

¹⁴ Töilyet ti ŋutu kulök ŋona mo yeŋon a purwat i lor logon nan mo tu i meddya na kulya kasu lu? Könisi kase ŋona mo yeŋon a iŋgo le? Nan MATAT aje jambu, a, nan mo kone kon.

¹⁵ Nan mo ririkörö ŋutu kulök i kiden na gweyajin ti ŋutu, a toreaddi se pajo i kiden na jurön, a nan mo tu ’baka ’yi tolutan nasu konut lukata.

¹⁶ Do mo lalawe a ŋutu ti jurön memeddya; a ŋutu kulök mo dene den adi nan logon a MATAT.

¹⁷ A kulyaet lo MATAT poki köyö adi,

¹⁸ Ŋuro lo ŋuto, kötumit na Yisaraele aje wora köyö gwoso pödö nagon a po ’ya ko kunie po; lepeŋat liŋ a po ’ya ko mölwö, ko bödili, ko witiöt, se ko risasi i tuka.

¹⁹ Nyenagon nan MATAT ŊUN lo kulya adi, Kogwon ta liŋ gwe a pödö nagon a ŋo ’ya ko kunie ŋo na, nyena mete ta, nan mo tutunakin ta Yerusalema lukata,

²⁰ gwoso nagon ŋutu tutunakiŋdye pödo, ko mölwö, ko witiöt, ko risasi, ko bödili i tuka na, a yuŋge kimaŋ anyen kine ŋo totolu-sökö. Nyena a nan mo pepenakiŋdye ta Yerusalema lukata ko woran se ko ŋoma nio anyen totolusökö.

²¹ iŋkoi, nan mo pepenakin ta lukata a yukö-kiŋdye kimaŋ na woran nio kasu loki, a ta mo lusoköni lusokö i lukata na tuka.

²² Nyena a ta mo tolusököni tolusökö gwoso na tolusökörikin pödö i tuka na, a ta mo dene den adi nan MATAT lo ’bukökiŋdyö woran nio kasu loki.

²³ A kulyaet lo MATAT poki köyö adi,

²⁴ Ŋuro lo ŋuto, taki Yerusalema adi, lepeŋ a ’jur logon lilima a ko lilimba kata, a kudu gwe a ko ’don nyin i lor lo woran.

²⁵ Ŋutu kasarak i lukata nanyit gwon gwoso kömiruöt lo rumön i koja na kijakwa; lepeŋat aje tatuja ŋutu, a ryaggi tukwörienjin kase se ko ŋo na gwörö go, a iŋge tiŋdu karu ’bejin wora jore i lukata nanyit.

²⁶ Koanejin kanyit aje gubakin saresi kwe ti MATAT kak, a iŋge toluddya ŋo kwe nake na rurwan; a lepeŋat gwe a ko koŋa ŋo nake na rurwan ko ŋo nagon abur kana, a se gwe a ko todini-kiŋdyö tuka ’de na kinyojin logon a loke logon a ’buruki anyen nyenyei ko logon ’bayin a loke, a se gwe a ko ’debba sabatajin kwe, a nan kirut iŋge lawe kase kiden.

²⁷ Ŋutu lokukwön i lukata nanyit gwon gwoso lujin lo koja kijakwa; lepeŋat ’buköddu rima a tukaŋi ŋutu, anyen wuju ’bulit na rye i kikolin lorok.

²⁸ A nebijin lo gwon i lukata nanyit kulo gwe gwoso ŋutu logon we ’ya gorom ko buya, a meta-kiŋdye se ŋo nagon a köpuröt kana kase i töilyet, a konakiŋdye se to ’bunun nagon a ’burönö kana, tuggö adi ŋilo a nan MATAT ŊUN lo kulya, a ki ’doŋ nan MATAT a ko jambu.

²⁹ A ŋutu ti jur ’bukuluŋ yeŋe ru ’ya, a ryaggi ryaggu, a se yöyöŋgi lomerika se ko ŋutu lo yöŋö ŋo kulo, a se ru ’ye ŋutu lo mömönuŋdyö.

³⁰ A nan iŋge ga ’yu ŋutu kase kiden logon gwoso ŋuto logon ködyö teteŋdya gorom nagon a mariŋ, a gwo ’de i piritön nagon a tutulujö i tiju na jur köyö i komor, anyen nan ködyö gwon ti lupö i tukaŋu na ŋilo jur, ama nan a ko ryö ŋuto gwoso ŋilo.

³¹ Nyenagon nan aje ’bukökin woran nio kase loki, a iŋge totum lepeŋat ko kimaŋ na woran nio na pape. Nyena nan aje ropakin konesi kase kase i kusik. Ŋilo a kulyaet lio lo MATAT ŊUN.