Ejikele 20 - Bibilia Buk na Ŋun nagon koti luŋu a

Ŋo nagon Ŋun a konakin ŋutu ti Yisaraele

¹ A i kiŋa toburyo i perok puök ti yapa tomukanat, a kulye temejik ti Yisaraele iŋge po köyö ni i piyuŋdya na MATAT, a si ’dakine köyö i komor.

² A kulyaet lo MATAT poki köyö adi,

³ Ŋuro lo ŋuto, jambi ko kilo temejik ti Yisaraele ko taki lepeŋat adi, MATAT ŊUN lo pija adi, Ta po i piyuŋdya na nan le? Nan MATAT ŊUN lo kulya adi, ’Diri ’diri gwoso na gwoŋdi nan na, nan ti ’dekan ta i piyuŋdya na nan.

⁴ Ŋuro lo ŋuto, do ŋona ti lilija lepeŋat? Do ŋona ti ’duŋökiŋdyö lepeŋat putesi le? Ti lepeŋat dene den ŋo na mamana na kon merenyejin kase kune,

⁵ nyena taki lepeŋat adi, MATAT ŊUN lo kulya adi, I lor lo wuluŋdye nan Yisaraele köju lu, nan a ’doggu könin ki i mi-lyekiŋdyö na nyakwariat ti kötumit na Yakobo, a tiŋdi mugun i dena ko se i jur lo Ejipeto; a nan iŋge ’doggu könin ki a milyekiŋdye lepeŋat adi, Nan a MATAT ŊUN losu.

⁶ I ŋilu lor nan a ’doggu könin ki i milyekiŋdyö na se adi, Nan mo jojon ta kaŋo i jur lo Ejipeto tojo i jur logon nan aje galakin ta lu, ŋilu ajur logon ’dokon a le ko a siwatat, ko ajur lokwekwelen lwölwöŋ jurön liŋ.

⁷ Nan a takin se adi, Ta liŋ geleŋ geleŋ, gubara ta ŋo kasu na mamana kaŋo nagon tulyöŋgu konyen kasu kine, an ta ko toluddya ta ’börik ko nyömuejin logon a ŋunyen ti Ejipeto. Nan logon a MATAT ŊUN losu.

⁸ Kölumbö a se renyani nan, a tine ’bön yiŋga nan. A lepeŋat liŋ geleŋ geleŋ gwe a ko gumba ŋo kase na mamana kaŋo nagon tulyöŋgu konyen kase kune, a gwe a ko kölökiŋdyö nyömuejin logon a ŋunyen ti Ejipeto. A nan iŋge yeyeju ’bukökiŋdyo woran nio kase loki, a yeyeji ŋoma ko se asut i jur lo Ejipeto.

⁹ Ama a nan iŋge kita kogwon kulya ti karin kwe anyen ködyö gwon ti körö i metet na ŋutu ti jurön logon se ŋutu ti Yisaraele si ’da kase kiden kulu, logon nan a tikin mugun i dena kase i metet na joŋdi nan Yisaraele kaŋo i jur lo Ejipeto köju nu.

¹⁰ Nyena nan a nyömu-ŋdyö se kaŋo i jur lo Ejipeto, a joŋgi se tojo i yöbu.

¹¹ A nan tiŋdi se saresi kwe lo wurö, a kwekiŋdye se jujuwesi kwe logon ko ŋuto a ’dep se kulo a rune ru.

¹² Nan köti a tikin se sabatajin kwe, anyen gwon a kweyet nio ko se, anyen se ködyö deden adi nan MATAT lo geluŋdya se a ŋutu kwe loke.

¹³ A kölumbö kötumit na Yisaraele renyani nan i yöbu yu; a se gwe a ko wörö i saresi kwe lo wurö, a renyani jujuwesi kwe logon ko ŋuto a ’dep se kulo a rune ru; a se iŋge kör sabatajin kwe parik. A nan köti iŋge yeyeju ’bukökiŋdyö woran nio kase loki i yöbu yu anyen to ’duddyö se asut.

¹⁴ Ama a nan iŋge kita kogwon kulya ti karin kwe anyen ködyö gwon ti körö i metet na ŋutu ti jurön logon a met nan i joŋdya na se kaŋo kulu.

¹⁵ A nan köti köju iŋge ’doggu könin ki i milyekiŋdyö na se i yöbu yu adi, nan ködyö ti joŋga se i jur logon nan a tikin se lu, ŋilu a jur lo ’dokon a le ko a siwatat, ko a jur lokwekwelen lwölwöŋ jurön liŋ,

¹⁶ kogwon se a renya jujuwesi kwe a tine wörö i saresi kwe lo wurö, a koŋi sabatajin kwe, kogwon töilyet kase kepoddu nyomuejin kase logon a ŋunyen kulo.

¹⁷ Ma ’di sona konyen kwe a won se, a nan gwe a ko tukar se kode to ’duddyö se asut i yöbu kata.

¹⁸ A nan iŋge takin ŋwajik kase i yöbu yu adi, An ta ko wörö ta i saresi lo wurö ti komunyi, kode ’debba jujuwesi kase, kode toluddya ’börik ko nyomuejin kase logon a ŋunyen kulo.

¹⁹ Nan MATAT a ŊUN losu, wöröni ta i saresi kwe lo wurö, ’debbi ta jujuwesi kwe ’bura;

²⁰ ’debbi ta sabatajin kwe a loke anyen se böŋö gwon a kweyet i kiden nio ko ta, anyen ta böŋö deden adi nan MATAT a ŊUN losu.

²¹ Ama a ŋwajik kase renyani nan; a se gwe a ko wörö i saresi kwe lo wurö, a se gwe a ko ’debba jujuwesi kwe logon ko ŋuto a ’debba se kulo a rune ru; lepeŋat a kör sabatajin kwe. A nan köti iŋge yeyeju ’bukökiŋdyö woran nio kase loki, a yeyeji ŋoma ko se asut i yöbu yu.

²² Ama a nan goji könin lio, a nan iŋge kita kogwon kulya ti karin kwe, anyen ködyö gwon ti körö i metet na ŋutu ti jurön logon a met nan i joŋdya na se kaŋo kulu.

²³ Iŋkoi, a nan iŋge ’doggu könin lio ki i milyekiŋdyö na se i yöbu yu adi nan ködyö totorekin se i kiden na gweyajin ti ŋutu ti jurön,

²⁴ kogwon lepeŋat a ko koŋdya ŋo na yökije nan se na, a kölumbö renyani saresi kwe lo wurö, a köŋi sabatajin kwe, a konyen kase ’depakiŋdye i nyömue-jin logon a ŋunyen ti merenyejin kase.

²⁵ Iŋkoi, a nan iŋge tikin se saresi kwe lo wurö logon ’bayin a lo ’but se ko jujuwesi logon ko ŋuto a ’dep se kulo a tine ru;

²⁶ a nan iŋge tolut se i ’dokesi kase, anyen se ’yuŋa ŋwajik kase kayujin a rubaŋgajin, anyen nan ködyö tokujö-ŋdu se. Nan koŋdya sona anyen se ködyö deden adi nan logon a MATAT.

²⁷ Nyenagon ŋuro lo ŋuto, jambi ko kötumit na Yisaraele ko taki lepeŋat adi, MATAT ŊUN lo kulo adi, I ŋina ŋo merenyejin kasu köti a lauŋdya nan, lepeŋat a kö ’yu twöju nan.

²⁸ Kogwon na joŋdi nan se köju i jur logon nan a milyeju i tiŋdu na se lu, a se iŋge meddya lurwat liŋ lojo, se ko kaden liŋ logon ko koropo jore, a se wukiŋdye rubaŋgajin kase nyu, a tiŋdi ’dokesi kase nyu nagon towoŋa nan; köti a se wukiŋdye ’dokesi na mon paleleŋ a ’bukökiŋdye rubaŋgajin ’bu ’bukesi nyu.

²⁹ (A nan pipije se adi, Pirit na ’du nagon ta wörö kata i kwa-kwaddu nu a nyo? Nyena karin kanyit luŋu a Na ’du tojo ko lo lor.)

³⁰ Nyenagon taki kötumit na Yisaraele adi, MATAT ŊUN lo pija adi, Ta ŋona mo totolut ’börik gwoso na koŋdi merenyejin kasu köju nu i girara i kepo-ddu na ŋo kase na mamana le?

³¹ Na wukiŋdye ta ’dokesi se ko rubaŋgajin, a ’yuŋe ŋwajik kasu a rubaŋgajin nu, ta toluddya ’börik ko nyomuejin kasu liŋ logon a ŋunyen tojo ko lo lor. A kirut nan mo rukökiŋdye ta kötumit na Yisaraele i piyuŋdya na nan ada? Nan MATAT ŊUN lo kulya adi, ’Diri ’diri gwoso na gwoŋdi nan na, nan ti ’dekan ta i piyuŋdya na nan kwöŋ.

³² Ŋo nagon ta yeye kasu i töilyet adi, Ti yi gwe gwoso ŋutu ti gweyajin ti jurön logon kwakwaddu kaden se ko ŋurupö, ŋina ŋo mo ti kona kwöŋ.

³³ Nan MATAT ŊUN lo kulya adi, ’Diri ’diri gwoso na gwoŋdi nan na, nan mo tutumatyan ko ta ko könin a iŋgo lo riöji kaŋo se ko woran na baranyuŋdya kaŋo.

³⁴ Nan mo riöddu könin lio iŋgo kaŋo i joŋdya na ta kaŋo i jurön logon ta köju a tore aji kata kulu.

³⁵ A nan mo joŋgi ta i yöbu na gweyajin ti ŋutu, a nan mo jambi putet ko ta nyu a lokomor.

³⁶ iŋkoi, a nan mo jambi putet ko ta gwoso na jambi nan ko merenyejin kasu i jur lo Ejipeto koju nu. Ŋilo a kulyaet lio lo MATAT ŊUN.

³⁷ A nan mo keŋdi ta i lupö i goro lo tomoret ko ture lio lo kayukunit.

³⁸ A nan mo nyunyumbe katoronyak ko se lo toroŋdya nan kilo kaŋo kasu kiden. A nan mo joŋdi se kaŋo i jur logon se sisi ’dari a lepelok ŋilo, ama se mo ti lupö i jur lo Yisaraele kwöŋ. A kirut ta mo dene den adi nan logon a MATAT.

³⁹ Nyena ta kötumit na Yisaraele, nan MATAT Ŋun lo kulya adi, A na ’but, ti ta liŋ geleŋ geleŋ iti i kwakwaddu na nyömuejin kasu logon a punyen, ama i mukök ta ’diri mo yiyiŋ nan, a ta mo tine köŋu karin kwe nake ko ’dokesi kasu se ko nyömuejin kasu logon a punyen kilo.

⁴⁰ Nan MATAT Ŋun lo kulya adi, Ta kötumit na Yisaraele liŋ mo kitakiŋdya nan i jur losu i mere lio loke lo rurwan logon a mere lojo lo Yisaraele. A nan mo wuji ta nyu ko ’busan; a nan mo luŋgi ta anyen gwe-gwelakiŋdya nan ŋo kasu, ko ’dokesi kasu na nyunyumwe, se ko rubaŋgajin kasu liŋ loke.

⁴¹ A i diŋit na joŋdi nan ta kaŋo i kiden na gweyajin ti ŋutu, a tutunuŋdye ta kaŋo i jurön logon ta a tore aji kata kulu nu, a nan mo wuji ta gwoso rubaŋga lo mon paleleŋ; a nan mo kweji mugun a loke kogwon kulya kasu a ŋutu ti jurön memeddya.

⁴² A ta mo dene den adi nan a MATAT na joŋdi nan ta i jur lo Yisaraele nu, kweja adi ŋilo a jur logon nan koju a milyekin tiŋdu merenyejin kasu lu.

⁴³ Nyu a ta mo yeyeji kikolin kasu ko konesi kasu liŋ nagon ta koju a toluddye ’borik kune, a ta mo maŋdi ’börik kogwon po narok liŋ nagon ta köju a kon kune.

⁴⁴ Ta kötumit na Yisaraele, ta mo deden adi nan a MATAT i diŋit nagon nan mo ti konakiŋdya ta gwoso i kikolin kasu lorok, se ko i konesi kasu narok na kon ta kine, ama kölumbö a nan mo konakiŋdye ta gwoso nagon jujukin i karin kwe. Ŋilo a kulyaet lio lo MATAT ŊUN.

Nebi Ejikele a kikiŋdyö swöt lo loki kulya narok

⁴⁵ A kulyaet lo MATAT poki köyö adi,

⁴⁶ ŋuro lo ŋuto, löpuköddi komor inot komorga swöt lo loki, jamaki ŋutu ti swot lo loki adi se a lorok, keŋ kulya narok i kulya ti jur logon a rudu lo gwon i jur lo Loki.

⁴⁷ Taki rudu lo jur lo Loki adi, Yiŋge kulyaet lo MATAT, adi, Nan MATAT ŊUN lo kulya adi, Mete, nan mo mokakiŋdya kimap konut kiden, a ŋina kimaŋ mo totumbe kaden kulök liŋ lodök se ko kaden kulök liŋ loteyok; a kimaŋ na tutule mo tine pepa, a komo-ösikan ti ŋutu liŋ mo rölöni rölö suluja i swöt lo loki tojo i swöt lo lobot.

⁴⁸ A ŋutu liŋ mo meddi adi ŋilo a nan MATAT lo mokakiŋdya ŋina kimaŋ i ’yuŋa na ŋilo rudu; a ŋina kimaŋ mo tine pepa kwoŋ.

⁴⁹ A kirut nan kulyani adi, Pon MATAT ŊUN, ŋutu liŋ jambu i kulya kwe adi nan jambu lilimön ka ’de.