Ejikele 2 - Bibilia Buk na Ŋun nagon koti luŋu a

Luŋu na Ejikele anyen gwon a nebi

¹ A na meddi nan ŋina parara nu, a nan ’dorone kak rupu, a nan yiŋge gworo i jambu, adi, ŋuro lo ŋuto, ŋine ki! Nan ’dek jambu ko do.

² A nagon nye jambu ko nan nu, a mulökötyo lo po ko ŋun lupökine köyö i mugun, a ’biluŋdye nan ki i gwo ’dan; a nan yiŋge lepeŋ jajambu ko nan.

³ A lepeŋ kulyani ko nan adi, ŋuro lo ŋuto, nan ŋilo soŋdu do i ŋutu ti Yisaraele logon a kötumit na ŋutu karerenyak logon a renya nan. Lepeŋat se ko merenyejin kase a toroŋdya nan ma ’di tojo ko lo lor.

⁴ Kilo ŋutu kusik kase a nago ko töilyet kase a iŋgo. Nan ŋilo soŋdu do ko lepeŋat yu, a do takiŋdye lepeŋat adi, Kulo a kulyaesi ti MATAT ŊUN.

⁵ A na jambi do sona nu, a lepeŋat mo kuruŋdye adi nebi kata kase kiden, ma ’di ko se nyanyar yiŋga kode se ti ’bön yiŋga (kogwon se a kötumit na karerenyak).

⁶ Ama do ŋuro lo ŋuto, an do ko kujönö lepeŋat, an do kujönö jamiat kase, ma ’di ködyö joju do gwoso kikwa ko kalelerök, kode koja do gwoso kitoni ko do a si ’daki kase loki; an do ko kujönö jamiat kase kode delya komorsikan kase najögitök, kogwon se a kötumit na karerenyak.

⁷ A do ködyö takiŋdye lepeŋat kulyaesi kwe kode se yiyiŋ kode se ti ’bön yiŋga, kogwon se a kötumit na karerenyak.

⁸ Ama do ŋuro lo ŋuto, yiŋge kulya nagon nan jamakin do kine; an do ko gwon a karerenyanit gwoso ŋinu kötumit na karerenyak; ŋaji kutuk inot, nyesi po nagon nan titikin do na.

⁹ A na meddi nan nu, a nan meddi könin lo riyene kaŋo köyö ni ’debba buk na ŋudula.

¹⁰ A lepeŋ iŋge petakin köyö i komor; a ŋina waraga iŋge wurö swötön liŋ, a kulya na wuröki kata kune gwe a luluesi, ko delyaesi, se ko durweesi.