Ejikele 19 - Bibilia Buk na Ŋun nagon koti luŋu a

Koli delyaet i kulya ti kasarak ti Yisaraele

¹ Nyenagon do Ejikele, yo ’yi köli delyaet kogwon temejik ti Yisaraele,

² taki lepeŋat adi, Ŋote nasu köju a kömiru nakwan i kiden na kömiruöt! Lepeŋ piriki i kiden na kömiruöt lo ’di ’dik a tunöggi torela kanyit.

³ A lepeŋ wowoji lele lo torela kanyit, a ’duŋe a titinti, a jujumbi koja lokore, a nyesi ŋutu.

⁴ A jurön sirani sira kogwon kulya kanyit, a lepeŋ iŋge ’dukin kase i meyi, a se jiŋge lepeŋ ko jabadalan tojo i jur lo Ejipeto.

⁵ A na meddi ŋote adi yenet nanyit aje ’baka a iŋge kakaŋu nu, a lepeŋ köti ’dumuŋdye lele lo torela kanyit a wowoji lepeŋ a kömiru titinti.

⁶ A pilu wöröni abur i kiden na kömiruöt, a iŋge ’duŋö a kömiru titinti, a jujumbi koja lokore, a nyesi ŋutu.

⁷ A lepeŋ tuŋe kadijik kase ti tumatyanjin kak, a koŋdi köjinö kase a rubajin. A jur se ko ŋutu liŋ lo si ’da kata kulo iŋge söŋu ko kujönö parik i yiŋga na rumön nanyit.

⁸ A ŋutu ti jurön lo gwon i mödöria-jin i swötön liŋ kulo ŋiki i mörö ko lepeŋ, a se lorgi lepeŋ ko birya nase, a lepeŋ iŋge ’dukin kase i meyi.

⁹ A se jiŋge lepeŋ ko jabadalan, a rerekakiŋdye lepeŋ i saŋduk kata, a jakiŋdye mor lo Babela, a mor gubakiŋdye lepeŋ i kadi rereket, anyen rumön nanyit ködyö köti gwon ti yiŋa kwöŋ i merya ti Yisaraele loki.

¹⁰ riuti köju gwon gwoso ködini lo binyo logon a ’yutuki nyona ko kare. A nye iŋge radan ludweki jore, a kenia kanyit iŋge gara jore kogwon kulya ti pioŋ najore.

¹¹ A kenia kanyit iŋge wora a nago nagon jujukin gwon a puriet ti ŋutu kasarak. A ŋilo ködini iŋge ’duröddu ki a lojo i kiden na kaden ti rudu logon a ’dija, lepeŋ memeta pajo i tojolan nanyit ko kenia kanyit jore.

¹² Ama a lepeŋ iŋge gwunye kaŋo ko woran, a gubakine kak i kujöŋ, a köbuŋöt lo ’yure toliliŋge lepeŋ, a ludweki kanyit ’do ’done kak, a kenia kanyit nago kune iŋge teteyon, a kimaŋ totumbe se.

¹³ Soŋinana lepeŋ aje nyökö ’yutuki i yöbu, i jur logon a loteyon ko a kure.

¹⁴ A kimaŋ tuleŋ kaŋo kanyit i kenia, a totumbe kenia se ko ludweki kanyit, anyen kene nago gwon ’bayin na pituŋdyö a puri lo ŋuto kasaranit. Ŋilo a köli delyaet, logon ŋutu yeŋ gwon i yo ’yu na lepeŋ.