Ejikele 18 - Bibilia Buk na Ŋun nagon koti luŋu a

Ŋuto logon a toroŋdya kakaŋu

¹ A kulyaet lo MATAT köti poki köyö pija adi,

² Tolupet lo jam ta i jur lo Yisaraele adi, Komonye nyesu ludweki ti binyo lodök a kala ti ŋwajik jayine jayi, ŋilo tolupet kweja nyo?

³ Nan MATAT ŊUN lo kulya adi, ’Diri ’diri gwoso na gwoŋdi nan na, ta mo köti ti jambu ŋilo tolupet kwöŋ i Yisaraele.

⁴ Mete ta, ru na ŋutu liŋ a nio; kweja adi ru na monye se ko ru na tore a nio. Ŋuto logon a toroŋdya lo mo kakaŋu.

⁵ Ŋuto logon a lo rigwo koŋdya ŋo nagon a na ’but i saret ko a gwak.

⁶ Lepeŋ ti nyesu i piritön kwakwasesi na gwon i ko ’dulan ti merya kune, nye ti ’bilikiŋdya konyen kanyit ki i twöju na nyomuejin logon a ŋunyen ti kötumit na Yisaraele, nye ti toluddya narakwan na leŋe, kode doto ko ŋuto nagon lolo-kia.

⁷ Nye ti ru ’ya lele ŋuto, ama a lepeŋ nyökökiŋdye kakurönit ŋo nagon nye a kölökin a togwoet na, a tine ryaggu, a tunyeji ŋuto lo magora ko kinyo lonyit, a tojubbi ŋuto lo gwon ’busön.

⁸ Lepeŋ ti luŋgu ’yalet i ŋo na kuröji kanyit kode tiŋdu lepeŋ i robba ko wöli. Lepeŋ ti ’bulukiŋdyö könin lonyit i ŋo naron, a ’duŋge putet gwogwo i kiden na ŋuto ko ŋuto,

⁹ a wöröni i saresi kwe lo wurö, a tiji jujuwesi kwe. Ŋuto gwoso ŋilo a lo rigwo; lepeŋ ’diri mo gwon jörun. Ŋilo a kulyaet lio lo MATAT ŊUN.

¹⁰ A ko lepeŋ a yupuŋdyö ŋuro lula-let logon a karyakanit ko a katatuanit, logon ti mirakiŋdya kitajin ti monye i koŋdya na nene nase,

¹¹ ama a lepeŋ nyesi i piritön kwakwasesi na gwon i ko ’dulan ti merya kune, a toluddye narakwan na leŋe,

¹² a ru ’ye lomerika se ko ŋutu lo yöŋö ŋo, a gwe a karyakanit, a tine nyökökiŋdyö ŋo nagon a togwoet, a ’bilikiŋdye konyen ki i twöju na nyomuejin logon a ŋunyen kulo, a koŋdi ŋo na mamana,

¹³ a luŋgi ’yalet i ŋo na kuröji kanyit a tiŋdi kakurönit i robba ko wöli; ŋuto gwoso ŋilo ŋona gwon jörun le? ’Bayin, lepeŋ ti gwon jörun kwöŋ; lepeŋ ’diri twatwan kogwon nye aje koŋdya kine ŋo liŋ na mamana, a rima kanyit mo poki kanyit i kwe.

¹⁴ A ko ŋilo katoronyanit a yupuŋdyö ŋuro logon memet toronjin liŋ nagon monye a kon kune, a kujönöni kujönö, a tine mirakiŋdya lepeŋ,

¹⁵ a tine nyesu i piritön kwakwasesi na gwon i ko ’dulan ti merya kune, a tine ’bilikiŋdya konyen kanyit ki i twöju na nyomuejin logon a ŋunyen ti kötumit na Yisaraele, a tine toluddya narakwan na leŋe,

¹⁶ a tine toroŋdya lele ŋuto, a tine luŋgu ŋo nagon a togwoet, a tine ryaggu, ama a tunyeji ŋuto lo magora ko kinyo lonyit, a tojubbi ŋuto lo gwon ’busön,

¹⁷ a tine ’bulukiŋdyö könin lonyit i ŋo naron, a tine luŋgu woli kode ’yalet i po na kuroji kanyit kune, a tiji jujuwesi kwe, a wöröni i saresi kwe lo wuro— ŋuto gwoso ŋilo mo ti twan kogwon toronjin ti monye, lepeŋ ’diri mo gwon jorun.

¹⁸ A ko gwe gwoso monye lonyit, kogwon nye a karudanit a ryaggi kulye ŋutu, a koŋdi ŋo nagon ’bayin a na ’but i kiden na ŋutu kanyit, mete ta, lepeŋ aje twan kogwon toronjin kanyit.

¹⁹ Ama kölumbö a ta pipije adi, Ko nyo nagon ŋuro ti poŋga kogwon toron na monye? A ko ŋuro a koŋdya po nagon a na ’but i saret ko a gwak, a iŋge tiju saresi kwe liŋ lo wuro, lepeŋ mo ’diri gwon jörun.

²⁰ Ŋuto logon a toroŋdya lo mo kakaŋu. A ŋuro mo tine poŋga kogwon toron na monye, a monye mo tine poŋga kogwon toron na ŋuro. Ŋuto lo rigwo ropaki torigwo nanyit, a katoronyanit ropakine toron nanyit.

Kiko lo Ŋun a lo rigwo

²¹ Ama ko ŋuto loron a löpukuŋdyö kapo i toronjin kanyit liŋ nagon nye kökon kune, a ’debbi saresi kwe liŋ lo wuro, a koŋdi po na ’but i saret ko a gwak, ŋilo ŋuto ’diri gwon jorun, lepeŋ ti twan.

²² A nene na toronjin nagon nye köju a kon kune tine yiyiki lepeŋ arabat, a lepeŋ ködyö gwe jörun kogwon torigwo nagon nye a kon na.

²³ Nan MATAT Ŋun lo pija adi, Nan ŋona lyölyöpön ko ŋuto loron a twan le? Ti gwon adi nan ködyö ’de ’dekan adi ti nye lopu-kuŋdye kapo i kiko lonyit loron anyen gwon jörun le?

²⁴ Ama ko ŋuto loron a löpukuŋdyö kapo i torigwo nanyit a iŋge toroŋdya, a koŋdi po na mamana jojo ko nagon ŋuto loron kökon kune, lepeŋ ŋona gwon jörun le? Iŋkoi, nene na konesi kanyit na rigwo nagon nye a kon kune ’bayin nagon yeyeŋ; lepeŋ twatwan kogwon nye a ko ’yu twöju a iŋge koŋdya toron.

²⁵ Ama kölumbö a ta kulyani adi, Kiko lo MATAT ti gwon jojo. Nyena ta kötumit na Yisaraele, yiŋge ta; ’Diri kiko lio lo MATAT ti gwon jojo le? Ama kikolin kasu logon ’bayin jojo.

²⁶ A ko ŋuto lo rigwo a löpukuŋdyö kapo i torigwo nanyit a iŋge toroŋdya, lepeŋ twatwan kogwon ŋina toron; lepeŋ twan kogwon toron nagon nye kökon na.

²⁷ Köti ko ŋuto loron a löpukuŋdyö kapo ’i po narok liŋ nagon nye kökon kune, a koŋdi po nagon a na ’but i saresi ko a gwak, lepeŋ ’diri lwölwök ru nanyit.

²⁸ Lepeŋ ’diri ruru a tine twan, kogwon lepeŋ a yeyeju a iŋge löpukuŋdyö kapo i toronjin liŋ nagon nye köju a kon kune.

²⁹ Kölumbö kötumit na Yisaraele kulya adi, Kiko lo MATAT ti gwon jojo. Ta kötumit na Yisaraele, ’diri kikolin kwe ti gwon jojo le? Ama kikolin kasu logon ’bayin jojo.

³⁰ Nyenagon ta kötumit na Yisaraele, nan mo ’du ’dupökin ta putesi ŋutu liŋ gwoso i kikolin kase. Ŋilo a kulyaet lio lo MATAT ŊUN. Nyena löpuŋge ta töilyet, löpukuŋdye ta kapo i lauŋdya nasu na saresi kwe liŋ, anyen toron böŋö gwon ti to ’doro ’yu ta.

³¹ Gubara ta lauŋdya nasu na saresi liŋ kaŋo nagon ta a toroŋdi nan kine. Galakiŋdye ta ’börik töilyet ludukö se ko yeyeesi ludu-kö! Ta kötumit na Yisaraele, ko nyo nagon ta ködyö twatwa?

³² Kogwon nan ’bak lyöŋön i twan na lele ŋuto. Nyena, löpuŋge ta töilyet anyen ta ruru. Ŋilo a kulyaet lio lo MATAT ŊUN.