Ejikele 17 - Bibilia Buk na Ŋun nagon koti luŋu a

¹ A kulpet lo MATAT poki köyö adi,

² Ŋuro lo ŋuto, pine kötumit na Yisaraele ko tolupet, jamaki lepeŋat lilim;

³ taki lepeŋat adi, MATAT ŊUN lo kulya adi, Yuku logon a duma ko köpukön a nagalaŋak ko kupir a lojo, ko wuwuresi jore lo a po Libanon yu, a morgi kwe na ködini logon gwoso tika,

⁴ A lepeŋ ’doŋaddi pilya nanyit a joŋgi i jur lo katujarak, a ’yuddi nye i köji na katugwörök.

⁵ A lepeŋ köti ’dumuŋdye nyomotti lo jur a ’yutukin-dye lepeŋ i kujöŋ na ’but nagon nyona ko kare logon ko pioŋ jore, a ’yutukiŋdye lepeŋ gwoso ki ’bi.

⁶ A lepeŋ wile wilan, a suluje ririkörö a ködini lo binyo. Lepeŋ a lorutut a kenia kanyit ririkörö kaŋo komorga ŋilo yuku, a kokori kanyit ’bekoddi kak i pirit na ’yutuki ’e nye na. Nyena a lepeŋ gole golon a gwe a ködini lo binyo, a kenia kanyit ririkörö kaŋo a wile wilan koropo jore.

⁷ Ama lele yuku kata logon ko köpukön a nagalaŋak ko kupir jore; mete, a kokori ti ŋilo ködini lo binyo ririkörö i kujöŋ komorga lepeŋ, a ririköddi kenia kanyit ko lepeŋ yu suluja i pirit na ’yutukiŋdye nye a kokwe nu, anyen ŋilo yuku tomurek böŋö popogga nye ko pioŋ.

⁸ Lepeŋ köju a ’yutuki i kujöŋ na ’but nyona ko kare logon ko pioŋ jore, anyen wilan kenia a rade ludweki, a gole golon a ködini lo binyo lo ’but lokwekwelen.

⁹ Taki lepeŋat adi, MATAT ŊUN lo pija ta adi, Ködini lo binyo gwoso ŋilo ŋona mo ’du ’duŋö a lo ’but le? Kokori kanyit ŋona mo ti ’dutwe kaŋo le? Ŋona ludweki kanyit mo ti ’deya kaŋo anyen koropo kanyit liŋ nadök na wilan kune lilikara? Kweja adi ŋutu jore ti ’dutun kokori kanyit kaŋo, köti ti ’dutun ko riŋit duma.

¹⁰ A ko lepeŋ a nyökö ’yutuki i nene pirit, lepeŋ ŋona mo ’du ’duŋö a lo ’but le? Lepeŋ mo ti lilikara asut i dili na ’yutuki ’e nye nu ko köbuŋöt lo wukuŋdyö i swöt lo ’yure a tolilik lepeŋ?

¹¹ A kulyaet lo MATAT poki köyö adi,

¹² Pine kötumit na karerenyak adi, Ta ŋona a ko den ko kine kulya kweja nyo? Taki lepeŋat adi, Mete ta, mor lo Babela a po Yerusalema, a joŋgi mor se ko ŋutu temejik kanyit yu Babela.

¹³ A lepeŋ ’dumuŋdye lele ŋuto lo kötumit na mor lo Yuda, a teteŋdi tomoret ko lepeŋ a tiŋdi lepeŋ i nyesu na milye, i mukök nagon nye aje joŋga ŋutu temejik ti jur kaŋo nu,

¹⁴ anyen ŋutu ti ŋina tumatyan ködyö gwon a lokoyokak, a tine ’bilikiŋdya ’börik ki i renya na lepeŋ, ama kulye kase tuŋ gwon i tiju na tomoret.

¹⁵ Ama a ŋilo mor lo Yuda renyani sara ko lepeŋ, a soŋdi luyökie kanyit Ejipeto yu i mu-luŋdyö na kusanjin se ko kamörök jore. Ŋuto gwoso ŋilo ŋona jujukin te ’ya le? Ŋuto lo koŋdya ŋo gwoso kine lo ŋona bubulö kölöki ’bak konaki arabat le? Lepeŋ ŋona bubulö ’beleŋgu tomoret a tine riŋa le?

¹⁶ Nan MATAT ŊUN lo kulya adi, ’Diri ’diri gwoso na gwoŋdi nan na, ŋilo ŋuto mo twatwan Babela yu i jur lo mor lo tiŋdu nye i si ’daet na tumatyan lo, logon nye a lanu milye lonyit a ’beleŋgi tomoret nanyit lo.

¹⁷ Paro ko yodom na ŋutu kanyit walan kamorok mo ti parakin lepeŋ i gor; a se mo tine ’du ’yu lipo a ’domio a moriesi ti köji, a mo tine teteŋdya takajin a tumesi, a se mo tine tolikiŋöyo ru na ŋutu jore.

¹⁸ Kogwon mor lo Yuda a lauŋdya milye a ’beleŋgi tomoret; lepeŋ köju a kwekiŋdya twöyit ama kölumbö lepeŋ kökon kine ŋo liŋ. Lepeŋ mo ti kölöki ’bak riŋet kwöŋ.

¹⁹ Nyenagon nan MATAT ŊUN lo kulya adi, ’Diri ’diri gwoso na gwoŋdi nan na, nan mo roropakin milye lio logon nye a lanu lo kanyit i kwe, iŋkoi, tomoret nio nagon nye a ’beleŋ na.

²⁰ A nan mo gubakiŋdye birya nio kanyit loki, a boyi nio mo morgi lepeŋ, a nan mo joŋgi lepeŋ Babela yu i jambu na putet, kogwon toron nagon nye a konakin nan na.

²¹ A ŋutu kanyit kamo-rök lo nyunyumwe kulo mo totokoni kak liŋ ko baŋdujin, a pitono kulo mo reki i swötön liŋ; a ta mo dene den adi nan MATAT lo jambu kine kulya.

²² Nan MATAT ŊUN lo kulya adi, Nan ko mugun nio mo koti ’du ’duŋun kene i kwe na ködini lojo logon gwoso tika, a mo ’yuddi lepeŋ; nan mo ’do ’do-ŋun kene namunyan na wilun i pilya nanyit, a nan mo ’yutukiŋdye i pilya na mere lojo;

²³ iŋkoi, nan mo ’yutukin nye i kwe na mere lojo lo Yisaraele, a kenia kanyit mo garani gara, a rade ludweki a mo worani a ködini lo ’but lokwewelen. A gweyajin liŋ ti kwen mo sakani i kenia kanyit, iŋkoi, lepeŋat mo yukan i tölimot na kenia kanyit.

²⁴ A kaden liŋ ti mu ’diŋ mo dene den adi nan MATAT nyönyokun ködini lojo ki kak, a to ’duŋe ködini lorutut a lojo ki, a toliliŋge ködini lodon, a tiŋdi ködini loteyon i wilan. Nan MATAT aje jambu kine kulya, a nan mo kone kon se.