Ejikele 15 - Bibilia Buk na Ŋun nagon koti luŋu a

Yerusalema gwoso ködini lo binyo logon ’bak ’bulit

¹ A kulyaet lo MATAT poki köyö pija adi,

² Ŋuro lo ŋuto, ködini lo binyo ŋona a lo ’but ada lwölwöŋ kaden liŋ, ’busan nanyit ŋona a nyo i lwöŋgu na kenia liŋ ti kaden ti rudu?

³ Ködini nanyit ŋona bubulö tetena a nene ŋo le? Ŋutu ŋona bubulö tetepuŋdya kaleto kata nagon ’bikiki i gorom anyen leleyorikin tito le?

⁴ A ko lepeŋ a gubaki i kimaŋ anyen nanama; a ko ’dutesi kanyit liŋ murek aje tumön, a kiden nanyit iŋge ’yura, nye ŋona jujukin kitarikin nene kita le?

⁵ Mete, ko nye nyuŋ gwon ’buluŋ lepeŋ ti bulö tetena a nene ŋo; bia parik ko kimaŋ aje totum lepeŋ ko aje ’yur lepeŋ, nene ŋo ŋona bubulö kita ’e kata le?

⁶ Nyenagon nan MATAT ŊUN lo kulya adi, Nan kokonakin ŋutu ti Yerusalema gwoso na konakiŋdye nan ködini lo binyo, logon nan a korun kaŋo i kiden na kaden ti rudu a gubakine i kimaŋ anyen nanama lo.

⁷ A nan mo tiŋdi komor nio a naron ko lepeŋat; nyena ma ’di se ködyö a rwösöddu kaŋo i kimaŋ, ama kimaŋ mo nyuŋ tototum se; a ta mo dene den adi nan logon a MATAT na tiŋdi nan komor nio a naron ko lepeŋat nu.

⁸ A nan mo koŋdi jur a murwö kogwon se a kö ’yu twöju nan. Ŋilo a kulyaet lio lo MATAT ŊUN.