Ejikele 14 - Bibilia Buk na Ŋun nagon koti luŋu a

Ŋutu logon twoju nyömuejin a piyuŋdye ŊUN ko nebi i kutuk kulo a ’duŋöki putet

¹ A kulye temejik ti Yisaraele poŋdi köyö ni, a si ’dakine köyö i komor.

² A kulyaet lo MATAT poki köyö adi,

³ Ŋuro lo ŋuto, kilo ŋutu aje tiŋdu nyömuejin kase logon a ŋunyen kase i töilyet, a tiŋdi ŋo narok kase i komor nagon tiŋdu se i ’doro kune. Nan ŋona bubulö rukökiŋdyö ŋutu gwoso kilo i pija na nan le?

⁴ Nyenagon jambi ko lepeŋat, ko taki se adi, MATAT ŊUN lo kulya adi, Ko lele ŋuto lo kötumit na Yisaraele a tiŋdu nyömuejin logon a ŋunyen kanyit i töili, a tiŋdi ŋo narok kanyit i komor nagon tiŋdu nye i ’doro kune, a iti ko nebi. a nan MATAT ko mugun nio mo ruköki-ŋdye lepeŋ gwoso i tojore na nyömuejin kanyit,

⁵ anyen nan böŋö morga töilyet ti ŋutu ti kötumit na Yisaraele, logon liŋ gwe pajo köyö kogwon nyömuejin kase logon a ŋunyen kulo.

⁶ Nyenagon taki ŋutu ti kötumit na Yisaraele adi, MATAT ŊUN lo kulya sona adi, Löpuŋge ta töilyet, löpukuŋdye ta kaŋo i nyömuejin kasu logon a ŋunyen kulo, löpukuŋdye ta komorsikan kasu kaŋo i ŋo kasu liŋ na mamana kine.

⁷ Ko lele ŋuto lo kötumit na Yisaraele, kode lele lo Lwaka lo si ’da i Yisaraele kulo, logon koraddu mugun kaŋo köyö, a tiŋdi nyömuejin kanyit logon a ŋunyen kulo kanyit i töili, a tiŋdi ŋo narok kanyit i komor nagon tiŋdu lepeŋ i ’doro kune a ko ŋuto gwoso ŋilo a tu ko nebi anyen pikiŋdya mugun nan, a nan MATAT ko mugun nio mo tiŋdi lepeŋ ruket.

⁸ Kweja adi nan mo tiŋdu komor nio a naron ko ŋilo ŋuto, a nan mo koŋdi lepeŋ a kweyet ko a giriset, a nan mo ’duŋöddi lepeŋ kaŋo i kiden na ŋutu kwe; a ta mo dene den adi nan logon a MATAT.

⁹ A ko nebi a mumuluka a jamuŋdye kulya keet, ŋilo a nan MATAT lo mumulugga ŋilo nebi, a nan mo riöddi könin lio i tukaŋu na lepeŋ i kiden na ŋutu kwe Yisaraele.

¹⁰ Nebi se ko ŋuto lo piyuŋdya kulya ko lepeŋ lo mo ŋoŋga riŋet na toronjin kase, kogwon se murek liŋ a koŋdya toron.

¹¹ A kötumit na Yisaraele mo köti tine girara kaŋo köyö, a se mo tine toluddya ’börik köti i laŋgu na saresi kwe, a se mo gwe a ŋutu kwe a nan mo gwe a ŊUN lose. Ŋilo a kulyaet lio lo MATAT ŊUN.

ŊUN a lo rigwo i riŋga na Yerusalema

¹² A kulyaet lo MATAT poki köyö adi,

¹³ Ŋuro lo ŋuto, ko ŋutu ti jur ’bukuluŋ a toroŋdya nan a iŋge kö ’yu twöju na nan, a nan mo riöddi könin lio a nyökuŋdye kinyo lose a lo ’dit logon töggu se lo, a nan mo sunyukiŋdye lepeŋat dyaŋ, a tukaŋi ŋutu se ko toro ’bo.

¹⁴ Nyena ma ’di kilu ŋutu musala logon a ko Noa, ko Daniele, se ko Eyobo ködyö gwolor nyu, lepeŋat ködyö lwökuŋdyö ru nase tuŋ kogwon torigwo nase. Ŋilo a kulyaet lio lo MATAT ŊUN.

¹⁵ A ko nan a soŋdu kijakwa ti mu ’diŋ i ŋilu jur kata, a se köŋi lepeŋ a iŋge kon a murwö, anyen ŋutu gwon ’bayin lo lwöpöddu nyin kogwon kulya ti kijakwa;

¹⁶ nan MATAT ŊUN lo kulya adi, ’Diri ’diri gwoso na gwoŋdi nan na, ma ’di kilo ŋutu musala ködyö gwolor nyu, lepeŋat ka ’de mo lo lwökö, a se ködyö tine lwökuŋdyö ŋwajik kase lulyan kode nawate, ama a jur ködyö konani a murwö.

¹⁷ A ko nan a soŋdu ŋutu logon ko baŋdujin i mörö ko ŋilu jur, a sarakiŋdye lepeŋat anyen wöröji ’e ŋilu jur ’bukuluŋ a ködyö tukaŋi ŋutu se ko toro ’bo—

¹⁸ nan MATAT ŊUN lo kulya adi, ’Diri ’diri gwoso na gwoŋdi nan na, ma ’di kilo ŋutu musala ködyö gwolor nyu, lepeŋat ka ’de mo lo lwökö, a se ködyö tine lwökuŋdyö ŋwajik kase lulyan kode nawate.

¹⁹ A ko nan a soŋdu twanti iŋgo i ŋilu jur, a ’bukökiŋdye woran nio kata i tatuja na ŋutu ko toro ’bo—

²⁰ nan MATAT ŊUN lo kulya adi, ’Diri ’diri gwoso na gwoŋdi nan na, ma ’di ko Noa, ko Daniele, se ko Eyobo ködyö gwolor nyu, lepeŋat ködyö lwökuŋdyö ru nase tuŋ kogwon torigwo nase, a se ködyö tine lwökuŋdyö ŋwajik kase lulyan kode nawate.

²¹ Nan MATAT ŊUN lo kulya adi, A naron bia parik ko nan a sunyukin Yerusalema kine riŋesi iŋwan narok parik nagon nan riŋge ŋutu, kweja adi. baŋdu, ko dyaŋ, ko kijakwa ti mu ’diŋ, se ko twanti iŋgo anyen tukaŋu ŋutu se ko toro ’bo!

²² Ama ko ködyö kulye pitönö a pitöki anyen lupe kaŋo i lukata nanyit kweja adi lyan ko wate, a ko lepeŋat a tu kasu yu, a ta iŋge met gwiliŋisi kase se ko konesi kase, a töilyet kasu mo kö ’yi delya kogwon ŋo narok liŋ nagon nan a jakin Yerusalema kune.

²³ A töilyet kasu mo kö ’yi delya na meddi ta gwiliŋisi kase se ko konesi kase nu; a ta mo dene den adi, ŋo liŋ nagon nan a kon i lukata nanyit kune nan a ko koŋdya ’bak kwe na kulya. Ŋilo a kulyaet lio lo MATAT ŊUN.