Ejikele 13 - Bibilia Buk na Ŋun nagon koti luŋu a

ŊUN a yuyuggö nebijin ’buronok

¹ A kulyaet lo MATAT poki köyö adi,

² Ŋuro lo ŋuto, keŋ kulya narok i kulya ti nebijin ti Yisaraele, iŋkoi, keŋ, ko taki se logon kekejutu ŋo nagon po kase i kusik kilo adi, Yiŋge ta kulyaet lo MATAT!

³ MATAT ŊUN lo kulya sona adi, Wöidiö i nebijin lu ’böŋ logon kekejutu ko mulökötyo keet logon a lose, a tine met nene ŋo kwöŋ kase i töilyet.

⁴ Do kötumit na Yisaraele, nebijin kulök gwoso gwekan i piritön nagon a rubajin.

⁵ Lepeŋat a ko kiyaddu ki i piritön na tutulujö i gorom nagon a mariŋ na lorga kötumit na Yisaraele, a gwe a ko ’di ’dijatu kine piritön, anyen ŋutu ti Yisaraele böŋö jojo gwo ’dan go i gor i lor lo MATAT.

⁶ Ŋo na met kilo nebijin kase i töilyet kune a köpuröt kana, ŋo na galun se i to ’bunun nase kune a ’burönö. Lepeŋat kulya adi nan MATAT lo jambu kine kulya, ama kudyakan nan MATAT a ko yökijö se; ama lepeŋat yen-du adi nan mo titikin kulyaesi kase wora a gwak.

⁷ Ta nebijin, ŋo na met ta kasu i töilyet kine ŋona ’bayin a köpuröt kana? Ŋo na galun ta i to ’bunun kune ŋona ’bayin a ’burönö le? Ta kulya adi ŋilo a nan MATAT lo jambu, ama ti gwon a nan lo jambu.

⁸ Nyenagon nan MATAT ŊUN lo kulya sona adi, Kogwon ta jambu kulya nagon a köpuröt kana, a ŋo na met ta kasu i töilyet kune gwe a ’burönö, nyenagon mete ta, nan mo gwon a miriku losu. Ŋilo a kulyaet lio lo MATAT ŊUN.

⁹ a nan mo möröni ko nebijin logon ŋo na met se kase i töilyet kune a köpuröt kana, a ŋo na galun se i to ’bunun kune gwe a ’burönö. Lepeŋat mo ti morakiŋdya i momoret na ŋutu kwe, a karin kase mo tine wuröki i wuret na kötumit na Yisaraele, a se mo tine lupö i jur lo Yisaraele. A ta mo dene den adi nan logon a MATAT ŊUN.

¹⁰ Iŋkoi, kogwon lepeŋat a tulyaŋgu ŋutu kwe, kulya adi, Taliŋ kata, ama taliŋ ’bayin; gwoso nagon ko ŋutu ’duggö gorom nagon a mariŋ a kilo nebijin poki i we ’ya ko buya.

¹¹ Do Ejikele, taki ŋutu lo we ’ya ŋina gorom ko buya kilo adi ŋina gorom mo ’do ’doro; kudu mo ’do ’don a duma parik logon mumuluja, logon ’don ko torok mora ko köbuŋöt wome logon wuköddu ko riŋit.

¹² A ko gorom nagon a mariŋ ’dorone ’doro, a ŋutu mo pipije se ’dö ’döju adi, Liya buya logon ta köju a we ’yi ŋina gorom lo?

¹³ Nyenagon nan MATAT ŊUN lo kulya sona adi, I woran nio na pape a nan mo kölöddi köbuŋöt wome, a i ŋoma nio a nan mo to ’doji kudu duma parik logon mumuluja, logon ’don ko torok i köŋu na ŋina gorom i woran nio.

¹⁴ A nan mo duyömökiŋdye ŋina gorom kak nagon ta aje we ’ya ko buya ŋina, a nan mo yayarakiŋdye lepeŋ kak, a pipilesi kanyit mo purune köke. Ko ŋina gorom a ’doro, a ta mo twatwane i lukata nanyit; a ta mo dene den adi nan logon a MATAT.

¹⁵ Nan mo tutuŋokin woran nio i ŋina gorom ko i ŋutu lo we ’ya lepeŋ ko buya kulo; a nan mo takiŋdye ta adi, Gorom nagon a mariŋ se ko ŋutu lo we ’ya lepeŋ ko buya kulo gwe ’bayin.

¹⁶ Kweja adi kilo a nebijin ti Yisaraele logon keju i kulya ti Yerusalema a meddi kulya kase i töilyet adi taliŋ nanyit kata, kudyakan taliŋ ’bayin. Ŋilo a kulyaet lio lo MATAT ŊUN.

¹⁷ Do ŋuro lo ŋuto, komorgi ŋutu wate ti kötumit nasu nagon kekejutu ŋo nagon po kase i kusik kune, keŋ kulya narok i kulya kase,

¹⁸ kulyani adi. MATAT ŊUN lo kulya adi, Wöidiö ta wate nagon goŋa ru na ŋutu i ripakin-dya na ŋo ti to ’bunun kase i könisi, a teteŋdi möŋdiliet a mukesi ti kusik ti ŋutu nagon ko kiŋajin ka ’de ka ’de! Ta ŋona togoŋa ru na ŋutu kwe a kölö-kiŋdye ru nasu jörun le?

¹⁹ Ta aje toluddya nan i kiden na ŋutu kwe anyen ryeju ’bolot saora ku ’dik logon sune ko könin kulo se ko tupesi ku ’dik ti ambata. A ta joŋdi twan i ŋutu logon ködyö ti twatwa kulo, a ta tiŋdi ru i ŋutu logon ködyö ti ru, kogwon ta a jamakiŋdya ŋutu kwe kulya ’burönö. Kilo ŋutu kwe nyanyar yiŋga kulya mumulukesi.

²⁰ Nyenagon nan MATAT ŊUN lo kulya sona adi, Mete ta, nan ti ’bön ŋo kasu ti to ’bunun nagon ta lorgi ru na ŋutu kine. Nan mo gigin se kaŋo kasu i könisi, a mo kölöddi ŋutu logon ru nase ta lolok kilo i ’daaddu gwoso kwen.

²¹ A nan mo kerenyuŋdye möŋdiliet kaŋo kasu i kusik, a nan mo riŋuŋdye ŋutu kwe kaŋo kasu i könisi, a se mo köti tine gwon kasu i könisi a ŋo na loloka. A ta mo dene den adi nan logon a MATAT.

²² Ta a tomunya-ŋdu töilyet ti ŋutu lo rigwo ko kulya ’burönö, ma ’di nagon nan MATAT ti ’bön koŋdya sona, a ta kölumbö togo ’yi ŋutu lorok anyen lepeŋat ködyö gwon ti löpukwe kaŋo i konesi kase narok anyen lwöggu ru nase.

²³ Nyenagon ta mo köti ti meddya kulya nagon a köpuröt kana kasu i töilyet, a mo tine galuŋdya ŋo i to ’bunun. A nan mo riŋuŋdye ŋutu kwe kaŋo kasu i könisi; a kirut ta mo dene den adi nan logon a MATAT.