Ejikele 12 - Bibilia Buk na Ŋun nagon koti luŋu a

Ejikele mirakiŋdya kulya ti joŋa na ŋutu a ’dupi

¹ A kulyaet lo MATAT köti poki köyö adi,

² Ŋuro lo ŋuto, do si ’da i kiden na kötumit na ŋutu karerenyak. Lepeŋat gwon ko konyen ama se ti ’bön meddya, lepeŋat gwon ko swö ama se ti ’bön yiŋga,

³ kogwon se a kötumit na ŋutu karerenyak. Nyenagon ŋuro lo ŋuto, toŋi tito kunök anyen do wökön i jur lo pajo, toŋi se i diŋit na tuparan a lepeŋat memeddya, a kirut do iti tu. Ko lepeŋat a met do i wuddya konut i pirit a iti i jur lo pajo, kode se ŋona mo kukurun adi se a kötumit na ŋutu karerenyak.

⁴ Do mo joŋdya tito kunök kaŋo i diŋit na tuparan a lepeŋat memeddya. Kine tito tora anyen do wöggiri i jur lo pajo. A do ko mugun inot mo ŋiörö kaŋo i diŋit na koriri i ’doro na kolor gwoso ŋuto logon wökön i jur lo pajo a lepeŋat memeddya.

⁵ Do mo tulökiŋdyö dili i gorom a lepeŋat memeddya, anyen do yekuŋdya tito kunök kaŋo kata.

⁶ A i sömukö, ’dumuŋdye tito kunök ko ’dukukiŋdye se konut i kwe ko iti kaŋo a lepeŋat memeddya. Ti do muke muk komor inot anyen do gwon ti met jur. Kogwon nan koŋdya do a kweyet i ŋutu ti kötumit na Yisaraele.

⁷ A nan iŋge koŋdya gwoso na saraki ’e nan na. A nan yekuŋdye tito kwe kaŋo i diŋit na tuparan a tora gwoso tito ti ŋuto logon wökön i lele jur. A i diŋit na koriri i ’doro na kolor a nan tu ’ye gorom ko könin lio. A i sömukö a nan iti kaŋo ’doggu tito kwe köyö i kwe a lepeŋat memeddya.

⁸ A i ko ’bure a kulyaet lo MATAT poki köyö a pipije nan adi,

⁹ Ŋuro lo ŋuto, ŋutu ti Yisaraele logon a kötumit na karerenyak kulo a ko pija do ’le adi, Do koŋdya nyo?

¹⁰ Taki lepeŋat adi, MATAT ŊUN lo kulya sona adi, Ŋilo ’dolet ’dolorikin kulya ti kasaranit lo gwon Yerusalema kata se ko ŋutu liŋ ti Yisaraele lo gwon i lukata nanyit kulo.

¹¹ Ti do taki se adi do a kweyet lose. Kulya nagon do aje kon kine mo kokonaki se köti; lepeŋat mo jojoŋa i to ’dupien i jur lo pajo.

¹² A kasaranit lose mo ’doggi tito kanyit i kwe i diŋit na sömukö, a nye mo iti kaŋo i dili nagon aje tulöki lepeŋ i gorom na anyen nye lupöri kaŋo. Lepeŋ mo muggö komor nanyit anyen nye gwon ti meddya jur.

¹³ Ama nan MATAT mo gugubakin birya kanyit loki, a ŋina birya nio mo morgi lepeŋ. A nan mo joŋgi lepeŋ tojo Babela i jur lo ŋutu ti Kaledea, ama a nye mo tine met ŋilu jur; a nye mo twaki nyu.

¹⁴ A nan mo ratakiŋdye ŋutu kanyit katiyuk, ko ŋutu liŋ logon parakiŋdya lepeŋ se ko teŋon kanyit liŋ ti kamörök i köbuŋötön liŋ anyen wuwuköji. A nan mo ’dutuŋdye baŋdu kaŋo i riköddu na lepeŋat.

¹⁵ A kirut se mo dene den adi nan logon a MATAT, i diŋit nagon nan mo toreaddi se i kiden na gweyajin ti ŋutu, iŋkoi, na ratakiŋdye nan se i kiden na jurön nu.

¹⁶ Ama nan mo pipitökin ŋutu ku ’dik i rwösöddu kaŋo i baŋdu, ko i dyaŋ, se ko i twanti iŋgo, anyen se tukökiŋdyö ŋo kase liŋ na mamana kine i kiden na gweyajin ti ŋutu logon se a tu kata kulu, a se mo dene den adi nan logon a MATAT.

¹⁷ A kulyaet lo MATAT nyöggi pokin köyö kulya adi,

¹⁸ Ŋuro lo ŋuto, nyesi kinyo ilot a do kikira, ko möji pioŋ a do böböŋdu ko kujönö.

¹⁹ Taki ŋutu ti jur adi, MATAT ŊUN lo kulya sona i kulya ti ŋutu lo si ’da Yerusalema i jur lo Yisaraele kulo adi, Se mo nyesu kinyo lose ko kujönö, a möji pioŋ kase ko delya, kogwon ŋo liŋ na gwon kase i jur kune mo ryaryakaji, kogwon ŋonyan na ŋutu liŋ lo si ’da kata kulo.

²⁰ A köjinö nagon ŋutu nyuŋ si ’da kata kune mo köröni körö a jur mo konani a murwö. Nyena a ta mo dene den adi nan logon a MATAT.

²¹ A kulyaet lo MATAT poki köyö pija adi,

²² Ŋuro lo ŋuto, tolupet nagon ŋutu jajam i jur losu lo Yisaraele na kweja nyo nagon ta kulya adi, Perok ’yaladdu ŋerot a ŋo na memeta na met nebi kanyit i töili kune worani a ŋo kana?

²³ Taki lepeŋat adi, MATAT ŊUN lo kulya sona adi, Nan aje tiŋdu ’dutet i ŋina tolupet, a nye mo köti tine yiŋa i jama i Yisaraele köti kwöŋ. Ama taki lepeŋat adi, Diŋit gwe nyona nagon ŋo na memeta na met nebi kanyit i töili kune mo wora a gwak.

²⁴ Kogwon nebijin ’burönök mo ’bayin i Yisaraele logon jambu ’burönö i ŋo na met se, a ’bu ’buddye ŋutu ko to ’bunun.

²⁵ Kogwon nan MATAT mo jajambu ŋo nagon nan ’de ’dekan, a kulya nagon nan mo jajam kune mo konani kona, a kine kulya mo tine jaran i kona. Ta kötumit na karerenyak, nan mo jajambu kulyaet a nan mo kitari kitari ŋilo kulyaet i perok kasu. Ŋilo a kulyaet lio lo MATAT ŊUN.

²⁶ A kulyaet lo MATAT köti poki köyö adi,

²⁷ Ŋuro lo ŋuto, mete, ŋutu ti kötumit na Yisaraele kulya adi ŋo na memeta nagon a kweki do konut i töili na a na kiŋajin jore lo popo, adi do keju kulya ti diŋitan nagon nyuŋ pajo parik.

²⁸ Nyenagon ti do taki lepeŋat adi, MATAT ŊUN lo kulya sona adi, Lele lo kulyaesi kwe ’bayin kwöŋ logon mo kakarakin; ama kulyaet logon nan a jam lo mo kokona. Ŋilo a kulyaet lio lo MATAT ŊUN.