Ejikele 11 - Bibilia Buk na Ŋun nagon koti luŋu a

Kasarak lorok a riŋa

¹ A mulökötyo lo po ko ŊUN ’dukuŋdye nan ki, a joŋgi nan tojo i kötumit na mariŋ na kadi na MATAT na gwon i swöt lo ’yure. Ŋina kötumit diraddu i swöt lo ’yure. A nan meddi ŋutu merya murek wot mukanat i kötumit lupet ko Yajania ŋuro lo Ajur, ko Pelatia ŋuro lo Benaya kase kiden. (Kilo ŋutu murek a kasarak ti ŋutu.)

² A lepeŋ takiŋdye nan adi, ŋuro lo ŋuto, kilo a ŋutu logon teteŋdya kulya narok ko a se logon tiŋdu jujuwesi narok i na köji.

³ Lepeŋat kulya adi, Diŋit ’duket na kadijik nyuŋ pajo. Köti adi, Na köji a sape a yi gwe a lokore nagon ’dela ’bura i lukata nanyit.

⁴ Nyenagon pon ŋuro lo ŋuto, keŋ kulya narok kogwon lepeŋat, iŋkoi, keŋ keju.

⁵ A mulökötyo lo MATAT poki köyö, a kulyani ko nan adi, Tambi adi, MATAT lo kulya sona adi, Ta kötumit na Yisaraele, kilo a kulyaesi kasu. Nan deden ’bura ŋo nagon a pokin kasu i kusik kine.

⁶ Ta yeŋon tatuaddu ŋutu i na köji, a kikolin kanyit iŋge jore ko öpuö.

⁷ Nyenagon MATAT ŊUN lo kulya sona adi, Opuö nagon ta a toper i ŋina köji kata kine lepeŋat a lokore a ŋina köji gwe a sape, ama nan mo jojoŋ ta kaŋo i kiden nanyit.

⁸ MATAT ŊUN lo kulya sona adi, Ta kukujönö baŋdujin tukaresi, nyena nan mo jojon ŋutu logon ko baŋdujin i mörö ko ta.

⁹ A nan mo joŋgi ta kaŋo i ŋina köji, a ŋutukiŋdye ta i könisi ti Lwaka, a nan mo ’duŋökiŋdye ta putesi.

¹⁰ Ta mo totoko kak ko baŋdujin na ’duŋökiŋdye nan ta putesi i lokökorit lo Yisaraele nu; a kirut ta mo dene den adi nan a MATAT.

¹¹ Nyena ŋina köji mo tine gwon a sape losu a ta mo tine gwon a lokore nagon ’dela i lukata nanyit. A nan mo ’duŋökiŋdye ta putesi i lokökorit lo Yisaraele;

¹² a ta mo kirut dene den adi nan a MATAT; kogwon ta a ko wörö i saresi kwe lo wurö a gwe a ko ’depakiŋdya i jujuwesi kwe, ama kölu-mbö a ta koŋdi gwoso i jujuwesi ti ŋutu ti jurön logon kasu i mara kilo.

¹³ A ko gwe sona nagon nan gwon i keju nu, a Peletia ŋuro lo Benaya twane twan adi dut. A kirut nan ’dorone kak rupu, a gwine gwien ko gworo lobot adi, Pon MATAT ŊUN, do ’diri tutuŋe tutuŋ pitönö ti ŋutu ti Yisaraele asut le?

ŊUN a milyeju i toyituŋdyö na ŋutu ko i toluduggö na se

¹⁴ A kulyaet lo MATAT poki köyö adi,

¹⁵ ŋuro lo ŋuto, ŋutu lo si ’da Yerusalema kulo kulya ko luŋösurök logon a karu kulök lo gwon i to ’dupien kulo, kweja adi kulya ko kötumit liŋ na Yisaraele adi, Kulu ŋutu aje mijörö pajo ko MATAT i komor, a ŋilo jur iŋge tiki yi ŋutu lo gwon Yerusalema kulo a lomore likaŋ.

¹⁶ Nyenagon kulyani adi, MATAT ŊUN lo kulya adi, Ma ’di nan a son kulu ŋutu pajo i kiden na gweyajin ti ŋutu, ma ’di nan a torekin se i jurön, ama nan a gwon kase a pirit nake na rurwan ko diŋit a na ’dit i jurön logon se a joŋa kata kulu.

¹⁷ Nyenagon kulyani adi, MATAT ŊUN lo kulya adi, Nan mo tutunun se kaŋo i gweyajin ti ŋutu, nan mo momorun se kaŋo i jurön logon se a toreki kata kulu, a nan mo tiŋdi se jur lo Yisaraele.

¹⁸ Nyena ko se mo aje yitö nyu, a se mo wuddye ŋo liŋ nagon a lut se ko ŋo liŋ na mamana;

¹⁹ a nan mo tiŋdi se töilyet logon ka ’de, a nan mo tiŋdi se yeyeesi ludukö kase i mugunya, a nan mo ’dumaddi kaŋo töilyet iŋgo gwoso ŋurupö kase i mugunya a tiŋdi se töilyet ti mugunya,

²⁰ anyen se böŋö wörö i saresi kwe lo wurö ko i ’debba na jujuwesi kwe ko i koŋdya na se. A se mo gwe a ŋutu kwe, a nan mo gwe a ŊUN lose.

²¹ Ama ŋutu logon töilyet kase kebbu ŋo kase lut ko ŋo kase na mamana kulo, nan mo roropakin konesi kase kase i kusik. Kilo a kulyaesi kwe ti MATAT ŊUN.

²² A kirut kerubajin ’bi ’yi köpukön kase ki, ko mokosi logon a liteki kulo kase i mara, a minyo lo ŊUN lo Yisaraele gwe kase loki.

²³ A minyo lo MATAT ŋiörö ki i kiden na köji, a gwi ’diki i mere loki lo gwon i swöt lo ’yure na köji.

²⁴ A mulökötyo lo po ko ŊUN ’dukuŋdye nan ki a joŋgi nan Kaledea yu i ŋutu lo gwon i to ’dupien kulu. Kine ŋo liŋ a ŋo nagon mulökötyo lo po ko ŊUN a kwekin nan köyö i töili, a kirut kine ŋo na met nan kune wusaddi kaŋo köyö.

²⁵ A nan nyönyö-kökiŋdye ŋutu lo gwon i to ’dupien kulo ŋo liŋ nagon MATAT a kwekin nan kune.