Ejikele 10 - Bibilia Buk na Ŋun nagon koti luŋu a

Minyo lo ŊUN a wusaddu kaŋo kanyit kadi

¹ A kirut nan meddi nene ŋo gwoso ŋurupit naŋem nakwekwelen na luŋu a sapira i ’diko na gwon i kusik ti kerubajin na, gweya nanyit ŋuru gwoso si ’daet na tumatyan.

² A lepeŋ takiŋdye ŋuto lo jupu boŋgo na waratat naparere lo adi, Lupöni i kiden na mokosi logon a liteki lo wiwiddyö i lukata na kerubajin kulu, ko sunuŋdye kuk na tutule na gwon i kiden na kerubajin kunu ko könin jore, ko rataki se i köji ’bukuluŋ. Nyena a lepeŋ lupöni lukata a nan memeddya.

³ A kerubajin kulo gwo ’de i swöt lo lutaten lo kadi na MATAT ko ŋuto lupö lukata, a luru iŋge mulu ’baŋ lo lukata.

⁴ A minyo lo MATAT ŋiörö ki i kerubajin loki a mijörö i kutuk na kötumit na kadi nanyit. A kadi na MATAT iŋge jore ko luru, a ’baŋ iŋge muluwa ko parara na minyo lo MATAT.

⁵ A woŋon na köpukön ti kerubajin yiŋani tojo i ’baŋ lo kaŋo woŋon gwoso gworo lo ŊUN Kabulönit lo ŋo liŋ lo jambu.

⁶ A lepeŋ takiŋdye ŋuto lo jupu boŋgo na waratat naparere lo adi, ’Dumuŋdye kimaŋ i kiden na mokosi logon a liteki lo wiwiddyö kulu, i kwake na kerubajin, a ŋilo ŋuto lupöni lukata, a gwi ’diki nyona ko moköt logon a lite.

⁷ A keruba geleŋ i kiden na kerubajin riöddi könin lonyit i kimaŋ na gwon i kwake na kerubajin na, a ’dumuŋdye nene kimaŋ i na kimaŋ a tiŋdi ko ŋuto lo jupu boŋgo na waratat naparere lo i könin, a lepeŋ wuji wuju a iti kaŋo.

⁸ Kerubajin kulo meta gwoso se gwon ko ŋo gwoso könisi ti ŋuto i lukak na köpukön kase.

⁹ A nan meddi mokosi iŋwan logon a liteki i mara ti kilo kerubajin, moköt geleŋ gwon i merete lo keruba; a gweya na mokosi logon a liteki kulo kobbi gwoso ŋurupit naporoŋ nakwekwelen na luŋu a topaja.

¹⁰ Lepeŋat liŋ iŋwan meta jojo, meta gwoso moköt lo arabia logon lele a sutaji lukata.

¹¹ Ko kerubajin wöwöröji, lepeŋat wöröji i swötön kase iŋwan kulo a tine löpukö i wöröji nase, a ko pirit nagon kusik kase diŋa kata nu a se iti gwo a tine löpukö i tu nase.

¹² A mugunya kase liŋ, ko ki ’dirinö kase, ko könisi kase, ko köpukön kase, se ko mokosi kase iŋwan liŋ logon a liteki kulo iŋge jore ko konyen.

¹³ A nan yiŋge mokosi logon a liteki kulu i widdyö adi wirrr.

¹⁴ A kerubajin iŋwan kulo gwe ko komorsikan iŋwan iŋwan; komor togeleŋ na a komor na keruba, a komor tomurek na gwe a komor na ŋuto, a komor tomusala na gwe a komor na kömiru, a komor toiŋwan na gwe a komor na yuku.

¹⁵ A kirut kerubajin kulo ŋiörö ki. Kilu a ŋo lo gwon jörun lo met nan nyona ko kare Kebar kulu.

¹⁶ A ko kerubajin wöwöröji, a mokosi logon a liteki kulo wöröjine kase i mara, a ko kerubajin ’bi ’yu köpukön kase anyen ’daaddu ki, a mokosi logon a liteki kulo tine girara kaŋo kase i mara.

¹⁷ Ko kerubajin gwogwo ’dan a mokosi köti gwo ’de gwo ’dan, a ko kerubajin ŋiörö ki a mokosi köti ŋiörö ki ko se i pirit na geleŋ, kogwon mulökötyo lo ŋo lo gwon jörun kulo gwon i kilo mokosi.

¹⁸ A kirut minyo lo MATAT kö ’yi kutuk na kötumit na kadi nanyit a gwi ’diki i kerubajin loki.

¹⁹ A kerubajin ’bi ’yi köpukön kase a ’daaddi ki a nan memeddya i tu nase kaŋo, ko mokosi logon a liteki kulo kase i mara; a lepeŋat gwi ’diki i kötumit na mariŋ na kadi na MATAT nagon diraddu i swöt lo ’yure na; a minyo lo ŊUN lo Yisaraele gwe kase loki.

²⁰ Kilo a ŋo lo gwon jörun logon nan köju a met i lukak na ŊUN lo Yisaraele nyona ko kare Kebar kulu; a nan iŋge den adi se a kerubajin.

²¹ Lepeŋat liŋ geleŋ geleŋ gwon ko komorsikan iŋwan iŋwan, ko köpukön iŋwan iŋwan, a ŋo gwoso könisi ti ŋuto gwe i lukak na köpukön kase.

²² Komorsikan kase gwon gwoso nagon nan köju a met nyona ko kare Kebar kunu; lepeŋat liŋ wöröji ŋerot gwogwo.