Ejikele 1 - Bibilia Buk na Ŋun nagon koti luŋu a

Nebi a meddya minyo lo ŋun

¹ I kiŋa tomerya musala, i perok mukanat ti yapa toiŋwan, na gwoŋdi nan koane Ejikele, ŋuro lo Busi i pirit na geleŋ ko ŋutu lo Joŋa i to ’dupien nyona ko kare Kebar nu, a ’dikolo iŋge ŋai, a nan iŋge meddya kulya ti Ŋun koyo i toili.

² (A ŋilu köju gwe a kiŋa tomukanat na gwoŋdi mor Yeyoyakin i to ’dupien nu,) a i perok mukanat ti yapa i ŋilu kiŋa

³ a kulyaet lo MATAT poki köyö i Jur lo Kaledea nyona ko kare Kebar; nyu a riŋit na MATAT poki köyö i mugun.

⁴ A nan meddi meddya, mete, a köbuŋöt wome wukuŋdye i swöt lo lobot ko luru duma parik i pirit na geleŋ. Ŋilo luru kokobbu parik, a ŋedepa ti kimaŋ poŋi kaŋo a ’döri, a lukata na ŋina kimaŋ metani gwoso mölwö na nama a nyore kana.

⁵ A nan meddi ŋo iŋwan lo gwon Jörun i kiden nanyit logon meta gwoso ŋutu,

⁶ ama se liŋ geleŋ geleŋ gwon ko komorsikan iŋwan iŋwan, ko kopukon iŋwan iŋwan.

⁷ Mokosi kase gwon gwogwo, a gwe ko sulukwakan gwoso ti tagwok, kokobbu gwoso molwö na jeya.

⁸ A se gwe ko könisi gwoso ti ŋutu i mukök na köpu-kön kase, i swötön kase liŋ iŋwan iŋwan kulo; kweja adi se liŋ iŋwan gwon ko komorsikan ko köpukön,

⁹ a kö-pukön kase to ’bole to ’bo. Lepeŋat liŋ tu ŋerot gwogwo a tine lopuko.

¹⁰ A komorsikan kase gwe sona, kweja adi i swot lo lutaten se liŋ iŋwan gwon ko komorsikan ti ŋutu ko komorsikan gwoso ti kömiruot, a i swöt lo kadoŋe gwe ko komorsikan gwoso ti dwönin se ko komorsikan gwoso ti yukuö.

¹¹ Iŋkoi, komorsikan kase gwon sona. A köpukön kase iŋge ŋa aji ki; ase liŋ ge-leŋ geleŋ gwe ko köpukön murek murek nagon toto ’bo, a kunie murek kune leru muggö mugunya kase.

¹² Se liŋ wöröji ŋerot gwogwo; swöt logon mulökötyo ’dek tu kata lu a se iti nyu, a gwe ti löpukö i wöröji nase.

¹³ A kiden na ŋo lo gwon jörun kulo metani gwoso kuk ti kimaŋ na tutule, ko gwoso kalya na wöwöriŋö abur kase kiden, a kimaŋ iŋge kobbu, a meme ’dekta na kipya lo ki puruŋdye kaŋo i ŋina kimaŋ lukata.

¹⁴ A ŋo lo gwon jörun kulo bibirte bibi-rtö gwoso meme ’dekta na kipya lo ki.

¹⁵ Nyena a na meddi nan ŋo lo gwon jörun kulo nu, a nan meddi adi se liŋ iŋwan gwon ko ŋo nagon meta gwoso mokosi ti arabia geleŋ geleŋ kak kase nyona.

¹⁶ Kilo mokosi logön a liteki gweya nase se ko kita nase gwon sona adi, se a namilyaŋak gwoso ŋurupö napöroŋök nakwekwelen; lepeŋat liŋ iŋwan meta jojo, a kita nase gwe gwoso moköt lo arabia logon lele a sutaji lukata anyen wörö swötön liŋ.

¹⁷ Ko lepeŋat wöwöröji, lepeŋat wöröji i swö-tön kase iŋwan kulo, a tine löpukö.

¹⁸ A liteki ti kilo mokosi iŋwan iŋge rimuŋdyö kaŋo i kutusen kase a gwe ko silik, a kilo liteki iŋge jore ko konyen i swötön liŋ.

¹⁹ Ko ŋo lo gwon jörun kulo wöwöröji, a mokosi wörö-jine kase i mara; a ko ŋo lo gwon jörun kulo ŋiörö ki, a kilo mokosi köti ŋiörö ko lepeŋat i pirit na geleŋ.

²⁰ Swöt logon mulökötyo ’dek tu kata lu a se iti nyu, a kilo mokosi ŋiörö ko se i pirit na geleŋ, kogwon mulökötyo lo ŋo lo gwon jörun kulo gwon i kilo mokosi lukata.

²¹ Ko ŋo lo gwon jörun kulo wöwöröji, a mokosi logon a liteki kulo köti wöwöröji, a ko ŋo lo gwon jörun kulo gwogwo ’dan, a kilo mokosi köti gwo ’de gwo ’dan, a ko ŋo lo gwon jörun kulo ŋiörö ki, a kilo mokosi köti ŋiörö ki ko se i pirit na geleŋ, kogwon mulökötyo lo ŋo lo gwon jörun kulo gwon i kilo mokosi lukata.

²² A i loki na ŋo lo gwon jörun kulo nene ŋo kata gwoso ’diko a riki kase i kusik, ŋina ŋo kokobbu gwoso ma-ŋöara nagon totokujöŋdu i meta.

²³ A i mukök na ŋina ’diko a köpukön ti ŋo iŋwan lo gwon jörun kulo riöjine kaŋo, nene komorga nene, a ŋo lo gwon jörun kulo liŋ geleŋ geleŋ gwe ko köpukön murek murek na muggö mugunya kase.

²⁴ A na tiri kilo ŋo nu, a nan yiŋge woŋon na köpukön kase gwoso woŋon na karya jore adi wunu, ko gwoso rumön na kipya lo ki logon a gworo lo Kabulönit lo ŋo liŋ, ko gwoso woŋon na yodom na ŋutu jore parik adi gumm; a nagon kilo ŋo gwogwo ’dan nu, a se köluŋdye köpukön kase kak.

²⁵ A gworo lo kuu ki yu i loki na ŋina ’diko kase i kusik; a nagon kilo ŋo gwogwo ’dan nu, a se köluŋdye köpukön kase kak.

²⁶ A i loki na ŋina ’diko yu kase i kusik gwe a nene ŋo na meta gwoso ŋurupit naŋem na luŋu a sapira. ŋina ŋurupit a tetena gwoso si ’daet na tumatyan, a lele ŋo logon meta gwoso ŋuto si ’dani i ŋina si ’daet loki.

²⁷ a nan meddi ŋo gwoso mölwö na nama a nyore kana suluja i ŋo gwoso mukök nanyit tojo ko kwe, a gwe gwoso kimaŋ i pirit namet suluja kanyit i mukök tojo ko ’dapan, a parara na ŋo gwoso kimaŋ lolorgi lepeŋ.

²⁸ A parara na lolorga lepeŋ na metani gwoso görigöri i ’diko i lor lo kudu; kweja adi meta gwoso minyo lo MATAT.