Ebere 8 - Bibilia Buk na Ŋun nagon koti luŋu a

Yesu a koane likaŋ duma lo tomoret ludukotyo

¹ Nyena moköt lo kulya nagon yijambu kulya kanyit kune makune: ’diri yi gwon ko koane duma gwoso lo. Lepeŋ aje si ’daki kak i könin lutaten lo si ’daet na Mor lo gwon ki lu.

² Lepeŋ kita i pirit nake na rurwan i kemia nagon a gwak. Ŋina kemia Matat lo togwi ’dikiŋdya ki ’bayin a ŋuto lo togwi ’dikiŋdya na.

³ Koanejin dumalak liŋ a wulwe anyen wukiŋdya ’dokesi se ko rubaŋgajin; nyena ŋilo koane likaŋ duma köti agu ködyö wukiŋdya nene ŋo.

⁴ A ko ködyö lepeŋ gwon i kak ni, lepeŋ ködyö ’bayin gwon a koane kwöŋ, kogwon koanejin kata logon wukiŋdya ’dokesi gwoso i Saresi ti Mose.

⁵ Kilo koanejin kita i ŋo nagon a miret ko a ködudwö kana na ŋo ti ki. gwoso na sarakiŋdye Ŋun Mose koju nu i diŋit nagon Mose gwe nyona ko ’bilikiŋdya na kemia ki nu, adi, Mete ’bura adi ti do tetene ŋo liŋ gwoso i miret nagon köju a kweki do i mere nu.

⁶ Ama soŋinana Yesu aje wuju kita na totopuŋdya bia parik; jojo köti lepeŋ a katomoranit lo tomoret nagon totoŋun na ’beron na, kogwon ŋina tomoret gwo ’dan i milyejin lo rukö logon totopuŋdya.

⁷ Kogwon ko ködyö tomoret na ’beron na gwon a na ’but lio, a Ŋun ködyö tine ga ’yu tiŋdu nene tomoret.

⁸ Ama a nye yuyuŋge ŋutu kanyit adi, Nan Matat lo kulya adi, Perok mo popo logon nan mo teteŋö i tomoret ludukotyo ko kötumit na Yisaraele se ko na Yuda.

⁹ ŋina tomoret ti gwon gwoso tomoret nagon nan köju aje teten ko merenyejin kase nu, i lor logon nan a mokara se ko könin a jiköddi se kaŋo i jur lo Ejipeto nu; kogwon lepeŋat a ko yeŋon ’debba tomoret nio a nan iŋge kölökin rurugga se ŋilo a kulyaet lio lo Matat.

¹⁰ Ama na a tomoret nagon nan mo tetenakin i kötumit na Yisaraele i mukök na kilu perok, nan Matat lo kulya; nan mo titin saresi kwe kase i yeyeesi, a wurökiŋdye se kase i töilyet, a nan mo gwe a ŋun lose, a se mo gwe a ŋutu kwe.

¹¹ A ŋutu liŋ geleŋ geleŋ ŋadi mo tine todiŋdyö marate lonyit kode luŋaser lonyit adi, Deŋdi Matat, kogwon se liŋ mo deden nan suluja i lo ’di ’dik tojo ko temejik.

¹² Kogwon nan mo wowon konyen i lyaŋesi kase, a nan mo tine yeye toronjin kase köti kwöŋ.

¹³ Na jambi ŋun kulya ti tomoret ludukötyo nu, a nye tu ’baka ’yi na kokwe na. ŋo nagon aje tu ’bakala ko a ŋoro kotyo na gwe nyona ko likin.