Ebere 7 - Bibilia Buk na Ŋun nagon koti luŋu a

Koane Melekisedek

¹ Ŋilo Melekisedek a mor lo Salem ko a koane lo Ŋun Katopanit lo ki liŋ, lepeŋ köju a törumbo ko Abarayama, i mukok na yitwe ’i Abarayama i moro na tatuari moran nu, a ’boroji lepeŋ.

² Nyena a Abarayama tiŋdi lepeŋ swot topuökit na ŋo liŋ na ryakwe i gor kune. Togeleŋ, karin ti Melekisedek nyönyökö adi, mor lo loti lo rigwo, koti lepeŋ a mor lo Salem, logon nyönyökö adi, mor lo taliŋ.

³ Monye, ko ŋote se ko merenyejin kanyit a ko dena; yuŋwe nanyit ko twan nanyit a ko dena. Lepeŋ gwon gwoso Ŋuro lo Ŋun; lepeŋ yeyeŋon a koane ŋupi.

⁴ Yeyeji ta, ŋilo ŋuto a duma! Abarayama merenye likaŋ a tikin nye swöt topuökit lo ŋo na ryakwe kune.

⁵ A nyakwariat ti Lewi logon a ’boroki a koanejin kulo, Saresi ti Mose a sarakin lepeŋat i pepeŋdya na swöt topuökisi i ŋutu logon a luŋasirik kase ti jur lo Yisaraele, ma ’di nagon se köti a nyakwariat ti Abarayama.

⁶ Ŋilo ŋuto ’bayin a lo kötumit na koanejin, ama Abarayama a tikin lepeŋ swöt topuökit, a nye ’boroji Abarayama logon Ŋun a milyekin tiŋdu lepeŋ nene ŋo lo.

⁷ Ŋuto duma ’bo ’boroja ŋuto lo ’dit. Lele ŋuto ’bayin lo rerenya i kine kulya.

⁸ Ŋutu logon wuju swöt topuökisi logon yi a jambu kulya kase a kokwe kulu, lepeŋat aje twatwa; ama ŋuto logon kulya kanyit a jama i mukök lo, kulya ti Ŋun na wurö kune a tuggö adi lepeŋ nyuŋ gwon jörun.

⁹ Yi bubulö tu ŋerot i jambu adi, Lewi ko mugun nanyit logon ködyö tiki swöt topuökit lo, lepeŋ aje robba swöt topuökit ko Abarayama i mugun,

¹⁰ kogwon i diŋit na torumbe Melekisedek Abarayama nu, Lewi nyuŋ a monyite lo merenye lonyit Abarayama i mugun.

¹¹ Köju kötumit na Lewi a wulwe a koanejin anyen saresi ti Ŋun tiki ŋutu ti Yisaraele. Ko ködyö tokoaŋan nase a temakiŋdya i tiŋdu na ŋutu i gwon jojo, ko nyo ŋilo koane lo pukun logon tokoaŋan nanyit gwon gwoso na Melekisedek, a gwe ka ’de ko tokoaŋan na Arona?

¹² Nyena ko ködyö tokoaŋan a löpuggö, a Saresi köti ködyö lölöpukö.

¹³ Koane lo pukun a ludukötyo lo, logon yi jambu kulya kanyit lo, a lo nene kötumit nagon lele ŋuto lose ’beron a ko po i kita i pirit ’yuret na rubaŋgajin.

¹⁴ Nye ŋilo Matat likaŋ logon ŋutu liŋ deden adi nye a lo kötumit na Yuda lo, a Mose gwe a ko ’diŋdya ŋinu kötumit na jambi nye i kulya ti koanejin nu.

Lele koane logon gwoso Melekisedek

¹⁵ Kine kulya a banyaki köke ko lele koane lo pukun logon gwoso Melekisedek.

¹⁶ Lepeŋ ti gwon a koane kogwon saresi ti ŋutu, ama kogwon riŋit na ru nagon ti ’duddyo na.

¹⁷ Kogwon kulya kanyit a tokoro adi, Do a koane lo yeŋ nyin, tokoaŋan inot gwon gwoso na Melekisedek.

¹⁸ Saresi ti ’beron a gelaki a swot kogwon se a lomunyak ko ’bak ’bulit,

¹⁹ (kogwon kilo Saresi ti Mose kwon a ko tiŋdu nutu i gwon jojo), ama Ŋo na ’but bia parik aje pukun nagon yi yeyen ko yupet nagon tomijoddu yi nyona ko Ŋun.

²⁰ Kine kulya a ko kona ’bak nyesu na milye. A ko milyorikin i diŋit nagon Lewijin kona a koanejin nu.

²¹ Ama Yesu a kona a koane ko milye logon adi, Nan Matat a milyeju nan mo ti lopuggo, adi, Do a koane lo yeŋ nyin.

²² Ko ŋina kwe Yesu gwo ’dan i juŋdyo na tomoret na ’but bia parik.

²³ Koanejin ti ’beron kulu koju jore kogwon ko lele a twan a lele lo ruddye kita;

²⁴ ama Yesu yeŋon kanyit i kita na koane nagon ti ruta ko lele ŋuto, kogwon lepeŋ a lo yeŋ nyin.

²⁵ Ko ŋina kwe lepeŋ köti bubulo Iwoggu asut ŋutu logon mijun nyona ko Ŋun ni kulo kanyit i mugun, kogwon lepeŋ yeyeŋon opi i momo ’yu na Ŋun kogwon kulya kase.

²⁶ Kogwon koane duma gwoso ŋilo ’diri a jukin yi. Lepeŋ a loke, ’bak kulya, a gwe a ko toluta, lepeŋ a gelaji kaŋo ko katoronyak kiden, soŋinana lepeŋ aje ’ ’biluŋ ki Iwolwoŋ ’diko.

²⁷ Koanejin dumalak wukiŋdya rubaŋgajin temba i lor; a kokwe a lo toronjin kase a kirut gwe a ti toronjin ti ŋutu, ama kulya ti Yesu ’bayin i koŋdya sona, kogwon lepeŋ aje koŋdya daŋ geleŋ a tine nyoggu na wukiŋdye nye mugun nanyit i tatua nu.

²⁸ ŋutu logon a kona a koanejin i Saresi ti Mose kulo a ŋutu lomunyak; ama milye lo Ŋun logon nye a milyeju i mukok na tiki na Saresi lo a wuluŋdyo koane logon a Ŋuro lo Ŋun. ŋilo Ŋuro a temaki jojo ŋupi ŋupi.