Ebere 6 - Bibilia Buk na Ŋun nagon koti luŋu a

¹ Nyenagon ti yi kölökiŋdye ta todinesi suluesi ti lore lo Kristo, ti yi möröddi ta ŋerot anyen gwon a ŋutu lo wora. Ti yi gwe ti nyöggu ’bogga togwi ’diesi ti yupet. Ta a den kulya ti löpuggö na töili i kulya ti gwiliŋit lo ’beron logon joŋga ŋutu i twan, ko i yubbö na Ŋun.

² Ta a den kulya ti batisi mojin ka ’de ka ’de, ko sopakiŋdya na könisi, ko i kulya ti toŋiyu na lo twatwa, se ko ’duŋet na putet nagon ti ’duddyö.

³ Nyena yi ’dek möröddu ŋerot i kunie kulya ko Ŋun a ’burukinyi.

⁴ Kogwon ko ködyö ŋutu a wuju parara, a iŋge waŋgu ’doket na po ko Ŋun yu, a iŋge koraki Mulökötyo Loke,

⁵ a iŋge diniki ’busan na kulyaet lo Ŋun, se ko riŋitön ti diŋit na popo nu,

⁶ a i mukök na kine ŋo liŋ a se iŋge kö ’yu ŋina yupet, nyena a se kwöŋ tine bulö nyökwe a ludukö i löpuggö na töilyet; kogwon lepeŋat ko ’börik kase a nyöggu ’bikikiŋdyö Ŋuro lo Ŋun i ködini na görö, a iŋge lauŋdya twan nanyit.

⁷ Ŋun a ’boroja kak i to ’doju na kudu logon ’biyaddu i kujöŋ, a topunuŋdye kinyojin logon a lo ’but a ti ŋutu lo kuŋu se kulo.

⁸ Ama ko ŋina kak pun kikwa se ko kalelerök, lepeŋ ’bak ’bulit; Ŋun sesen lepeŋ, a ’dutet nanyit gwe a ’yura ko kimaŋ.

⁹ Ama ma ’di yi a jambu sona pon julin kwe lo nyanyara, yi a kurun kulya kasu a na ’but lwölwöŋ kune, kweja adi kine kulya mo tiŋdu ta i lwökö.

¹⁰ Kogwon Ŋun ti gwon a loron, lepeŋ mo ti böŋöri kita nasu ko nyaŋu nasu na lepeŋ nagon ta a kitakiŋdye ŋutu kanyit, gwoso nagon ta nyuŋ kikitari na.

¹¹ Yi ’de ’dekan ko toilyet kaŋ liŋ adi ta liŋ gelen geleŋ kodyo yeŋon gwilipara ko pusok tojo ko ’dutet, i ryeju na ŋo liŋ na yen ta kine.

¹² Yi ti ’bon ta gwon a yokia, ama mirakiŋdye ta ŋutu logon a ŋoŋaddu ko yupet tojo se a wu ŋo nagon Ŋun a milyekin tiŋdu se kune.

Ŋun ti lopuk milye lonyit

¹³ Kogwon na milyekiŋdye Ŋun i tiŋdu na Abarayama nene ŋo nu, lepeŋ a milyeju ’diŋdya mugun, kogwon lele ’bayin logon a duma Iwolwöŋ lepeŋ.

¹⁴ A lepeŋ milyeji adi, ’Diri ’diri, nan mo ’bo ’boro do, a tiŋdi do nyakwariat jore.

¹⁵ Nyena a Abarayama iŋge ŋoŋaddu a wuji ŋo nagon Ŋun a milyekin tiŋdu nye kune.

¹⁶ Ko ŋutu gwon ko rerenyesi kase kiden, ko lepeŋat ’de ’dekan tomor a ’borik, lepeŋat nyesu milye ’diŋdya karin ti lele logon a duma Iwolwoŋ se lo, a ŋina kwekiŋdye adi ŋilo milye tine bulo ’beleŋo.

¹⁷ Nyena ko ŋina kwe, Ŋun a milyeju anyen togo ’yu ŋo na ruk nye i tiŋdu na ŋutu. Lepeŋ a koŋdya sona kogwon nye ’de ’dekan adi ŋutu logon kodyo wuju ŋo na ruk nye kune, ti se dene den ’bura adi nye ti lopuggo kwoŋ.

¹⁸ Sekine ŋo murek nagon ti bulo leusa kwoŋ nagon Ŋun ti bulö ’burönö, kweja adi ruket nanyit se ko milye. Nyena kogwon kine kulya yi logon a ryeju pirit rupit kanyit kulo, yi gwon ko toilyet iŋgo i morga na yenet na gwon kayaŋ ŋerot.

¹⁹ Ŋina yenet gwon gwoso kaluti nagon a ’bikiki go nagon toilyet kaŋ a munuki nyin. Ŋina yenet tuloddu i boŋgo koret tojo i pirit nake na rurwan,

²⁰ nagon Yesu logon a kasuluwanit aje tuloddu kata kogwon kulya kaŋ, kogwon lepeŋ a koane duma lo yeŋ nyo logon tokoaŋan nanyit gwon gwoso na Melekisedek.