Ebere 5 - Bibilia Buk na Ŋun nagon koti luŋu a

¹ Kogwon koanejin dumalak liŋ nyunyumwe ko ŋutu kiden, a iŋge wulöki i kita ko Ŋun i komor kogwon kulya ti ŋutu. Kita na koane duma gwon i wukiŋdya na ’dokesi se ko rubaŋgajin ti toronjin.

² Lepeŋ a lokoyok i ŋutu logon ti den kulya ko se logon lyalyaŋi kulo, kogwon tomunyan momok lepeŋ ko mugun nanyit.

³ Nyena kogwon tomunyan momok lepeŋ, nye agu ködyö wukiŋdya rubaŋgajin a ti toronjin kanyit i pirit na geleŋ ko ti ŋutu.

⁴ ŋuto ’bayin logon a wakakin mugun ŋina kita na bubula, tuŋ ko Ŋun a luŋ nye, gwoso na luŋgi nye Arona köju nu.

⁵ Nyena Kristo köti a ko wakakin mugun ŋina kita na bubula na koane duma; Ŋun lo koŋdya lepeŋ a koane duma, a iŋge kulya ko lepeŋ adi, Do a Ŋuro lio, nan lo yupuŋdyö do i lo lor.

⁶ A nye köti iŋge kulya i lele kalet adi, Do a koane lo yeŋ nyin logon tokoaŋan inot gwon jojo ko na Melekisedek.

⁷ I diŋit na gwoŋdi Yesu a ŋuto nu, nye a momo ’yu ko a gwien parik ko Ŋun ko ŋolitan, kogwon Ŋun ko riŋit i lwöggu na lepeŋ i twan. A Ŋun iŋge yiŋ lepeŋ kogwon Yesu a kugga nye.

⁸ Ma ’di nye a Ŋuro, nye a diniki twöju i kulya ti ŋo na ŋoŋgi nye kune,

⁹ a nagon nye aje kona jojo gwak nu, a lepeŋ gwe a kasuluwanit lo lwökit na yeŋ nyin, a ŋutu liŋ lo twöju lepeŋ kilo ryeji ŋina lwökit ko lepeŋ i mugun,

¹⁰ a Ŋun luŋgi lepeŋ a koane duma logon tokoaŋan nanyit gwon jojo ko na Melekisedek.

Jujuwesi an ŋutu kökö yupet

¹¹ Yi gwon ko ŋo jore nagon yi jajam i kine kulya, ama a nago i nyönyökökiŋdyö na ta kogwon swö kasu a wora pömöni a yiŋge adi böriŋ.

¹² Ta agu ködyö gwon a katodinök i na diŋit na, ama ta nyuŋ ’de ’dekan ti lele ŋuto nyöggi todinikiŋdyö ta todinesi suluesi ti kulyaesi ti Ŋun. Ta tuŋ ’de ’dekan möju le ti gwon a ’dilor.

¹³ Ŋuto logon kinyo lonyit yeŋ a le lo ti den kulya ti löti lo rigwo kogwon lepeŋ a luŋudi.

¹⁴ Ama ’dilor a na ŋutu lo wora logon aje diniki koŋa kulya na ’but ko narok.