Ebere 4 - Bibilia Buk na Ŋun nagon koti luŋu a

¹ Nyena ma ’di milye lo Ŋun nyuŋ kata adi yi bubulö luŋö kanyit i pirit yukaet, nyena ti yi meddi ta ’bura an lele losu meta gwoso nye a karakin kiden i luŋö i ŋinu pirit yukaet.

² Kogwon ’diri yi aje tokuki Loŋe Lo ’but gwoso na ŋutu ti ’beron köju kulu. Ama tokujö nagon se a yiŋ nu ’bak ’bulit kase kogwon ma ’di se ködyö a yiŋ ko swö kase, ama a se tine yuŋ ko töilyet kase.

³ Kölumbö yi logon aje yuŋ kulo luluŋö kanyit i pirit yukaet. Ŋun a kulya adi, Nan a milyeju i woran nio adi, Se kwöŋ mo ti luŋö köyö i pirit yukaet. Lepeŋ kulya sona ma ’di nagon nye a tutuŋgö kita nanyit suluja i diŋit na gweji nye kak nu.

⁴ Kogwon kulyaesi kanyit kata i lele kalet adi, Ŋun a gwo ’dan i kitajin kanyit liŋ i lor toburyo.

⁵ Ama kulyaesi kanyit köti kata logon kulya adi, Se kwöŋ mo ti luŋö köyö i pirit yukaet.

⁶ Ŋutu logon köju a tokuki Loŋe Lo ’but kulu a ko luŋö nyin kogwon se ti ’bön yiŋga, ama ’diri a gwak adi kulye ŋutu bubulö luŋö nyin,

⁷ kogwon Ŋun a wuluŋdyö lele lor. Kiŋajin jore i mukök na renyari kulu ŋutu nyu nu, a Ŋun kulyani ko Dawidi i kutuk adi, I lo lor ko ta yiyiŋ gworo lio, ko togo ’yu ta töilyet kasu.

⁸ Kogwon ko ködyö Yosua a tiŋdu se pirit yukaet, a Ŋun ködyö tine yeŋon jambu kulya ti lele lor.

⁹ Nyena Sabata yukaet nyuŋ kata a lo ŋutu ti Ŋun;

¹⁰ kogwon ŋuto logon a luŋö ko Ŋun i pirit yukaet lo gwogwo ’dan i kitajin kanyit gwoso na gwo ’di ’e Ŋun i kitajin kanyit köju nu.

¹¹ Nyenagon ti yi möŋi ta möŋu parik anyen luŋö i nu pirit yukaet, an yi ko ’doro kogwon yi ti ’bön yiŋga gwoso se.

¹² Kogwon kulyaet lo Ŋun gwon jörun ko kikita ko a lopi lwölwöŋ wale lo pilan swötön murek. Lepeŋ söju ma ’di i pöggu na ködudwö se ko töili, ko i pöggu na tomoresi ti kuyu se ko welesi na gwon i kuyu lukata. Kulyaet lo Ŋun lilija ’dekesi ko yeyeesi na gwon ko ŋuto i töili kune.

¹³ Nene ŋo ’bayin i ŋo liŋ nagon Ŋun a gwe kune nagon bubulö ’de ’ya mugun kanyit i komor. Kogwon ŋo liŋ a limu kana ko a banyaki köke i meta ko lepeŋ. Nye lepeŋ logon yi ködyö kwekwekin lepeŋ kulya kaŋ lo.

Yesu a Koane duma lo Iwolwöŋgu

¹⁴ Nyena ti yi ’depakiŋdye ta go i keri likaŋ lo yupet, kogwon yi gwon ko koane duma lo lwölwöŋgu logon aje tulöddu ki yu, lepeŋ a Yesu Ŋuro lo Ŋun.

¹⁵ Ŋilo koane duma likaŋ ti gwon a ŋuto logon ti bulö deŋdya tomunyan nikaŋ, kölumbö nye a ŋuto logon a tema ko möriesi i ŋo liŋ nagon a temarikin yi, ama nye a ko toroŋdya.

¹⁶ Nyena ti yi gwe ti kujönö i mijöro nyona i si ’daet na Ŋun logon a ka ’buse lo, anyen yi böŋö yayataki, a ryeji ’busan nanyit i parakiŋdya na yi i diŋitan liŋ nagon yi ’de ’deggi kune.