Ebere 13 - Bibilia Buk na Ŋun nagon koti luŋu a

Konesi nagon tulyöŋgu Ŋun

¹ Yeŋe ta nyaŋu ’börik gwoso luŋasirik ko Kristo i mugun.Yeyene ta yeye wuju Lwaka a kömu kasu i midijik.

² Kulye ŋutu köju a koŋdya sona a iŋge wuju malaikajin a gwe a ko den ko se a ko ŋa.

³ Yeyene ta yeye ŋutu lo gwon i kadi rereket gwoso nagon ta ködyö lo gwon i kadi rereket ko se i pirit na geleŋ na. Yeyene ta yeye ŋutu logon sasanya, kogwon ta köti ko mugunya nagon mimien gwoso kase.

⁴ Ti ŋutu liŋ ködyö twöni twö yemet, ko ti dotoet gwe ti toluta, kogwon Ŋun mo ’du ’duŋgö putet lo kawutejin se ko lo kaluŋök.

⁵ Ti gwiliŋisi kasu gwe pajo i nyaŋu na gurut, yimönöni ta ko ŋo nagon a kasu, kogwon Ŋun ko mugun nanyit a kulya adi, Nan mo ti koruŋdya mugun kaŋo kasu kwöŋ, a nan mo tine kö ta asut.

⁶ Nye ŋina kwe nagon yi bubulö jambu a purwat adi, Matat a kaparanit liŋ, a nan tine kujönö; ŋo a nyo nagon ŋuto bubulo konakiŋdya nan?

⁷ Yiyiuŋdye ta temejik kasu, se logon köju jamakiŋdya ta kulyaet lo ŋun kulo. Yeyeji ta gwiliŋisi kase ko twatwa nase, miruŋdye ta yupet nase.

⁸ Yesu Kristo gwon jojo kaje ko i lo lor ko ŋupi ŋupi.

⁹ Ti todinesi ka ’de ka ’de nagon a lepelok gwe ti togiraddu ta. Ködyö a na ’but koyi a wuju ’busan na Ŋun gwoso kinyo lo töilyet kaŋ, ti gwon i ’debba na keriat nyeesi ti kinyo. Ŋutu lo ’debba kilo keriat kulo a ko ryö ’bulit kwöŋ.

¹⁰ Yi gwon ko pirit ’yuret na rubaŋga jin nagon koanejin lo kita i Kemia lukata kulo a ko ’buruki i nyesu kata.

¹¹ Koane duma joŋga rima ti toro ’bo i lukata na Pirit Nake na Rurwan na Totoŋuŋdya a rubaŋga lo toron; ama a öpuö ti kilo toro ’bo joŋani i kaŋo na mera a ’yurani nyu.

¹² Nyenagon Yesu köti a ŋoŋga kaŋo i kötumit na mariŋ na köji, anyen nye böŋö toke ’ya ŋutu ko rima kanyit.

¹³ Nyenagon ti yi iti ta kanyit yu i kaŋo na mera anyen yi tu lawe ko lepeŋ i pirit na geleŋ.

¹⁴ Kogwon yi ’bak köji na yeyeŋon i kak ni, ama yi ga ’yu köji na popo molu nu.

¹⁵ Nyenagon kogwon kulya ti Yesu, ti yi ŋupi wukiŋdye Ŋun rubaŋga pupuret logon lupuŋdyö kayaŋ i kutusen i ’diŋdya na karin kanyit.

¹⁶ An ta ko böŋö ta koŋdya ŋo na ’but i ŋaŋu na ŋo kasu ko kulye ŋutu. Kogwon kilo a rubaŋgajin logon tulyöŋgu Ŋun.

¹⁷ Twöji ta temejik kasu ko kuŋge ta lepeŋat, kogwon lepeŋat titi ta gwoso ŋutu logon mo pipiya i kulya kasu. Ti ta gwe ti todelyaju lepeŋat anyen se kita ko lyöŋön, kogwon ko se kita ko ’du ’duatu a kine kulya tine parakiŋdya ta.

¹⁸ Kwakwaddi ta kogwon kulya kaŋ, kogwon yi a den adi töilyet kaŋ a ko tuggö adi yi a koŋdya arabat, ama yi ’de ’dekan koŋdya ŋo na ’but i diŋitan liŋ.

¹⁹ Nan böŋö mo ’yu ta ko pusök i kwa kwa sakiŋdya na yi, anyen nan böŋö yitö kasu ŋini ’de ’de. Kwaset

²⁰ Ŋun a toŋiju Matat likaŋ Yesu i twan, logon a kayukunit duma lo yidin kogwon ’bukwe na rima kanyit i tomoret nagon Ŋun a torukökin koyi ko milye lo yeŋ nyin.

²¹ Ti Ŋilo Ŋun logon taliŋ liŋ gwon ko lepeŋ lo tojubbi ta ko ŋo liŋ na ’but, anyen ta boŋo koŋdya ŋo na ’deggi nye kune. Ti nye kitani kayaŋ i mugunya anyen yi tulyoŋgu lepeŋ kogwon kulya ti Yesu Kristo. Ti lepeŋ bulani bula ŋupi ŋupi. Amin.

Kulyaesi ti ’dutet

²² Luŋasirik, nan boŋo mo ’yu ta, ŋoŋgi ta kulyaesi jujuwesi logon nan a wurökin ta ku ’dik kilo.

²³ Dene ta den adi luŋaser likaŋ Timoteo aje kolwe i kadi rereket. Ko lepeŋ a po ’de ’de nan mo babarara lepeŋ ko nan iti i meddya na ta.

²⁴ Roma kiŋdye ta temejik kasu liŋ se ko ŋutu liŋ ti Ŋun. Koti julin kaŋ logon a ŋutu ti Italia kulo roman ko ta.

²⁵ Ti ’busan gwe ko ta liŋ.