Ebere 11 - Bibilia Buk na Ŋun nagon koti luŋu a

Kulya ti yupet

¹ Nyena koyi gwon ko yupet, yi yiyinikin ŋo nagon yi yeyen kune adi a gwak, a yi dene den adi ŋo nagon yi ti met kune adi se ’diri kata.

² Ŋun a lyöŋön ko ŋutu ti ’beron logon gwon ko yupet.

³ Ko ŋina yupet, yi a kurun adi na kak ’bukuluŋ gweya ko kulyaet lo Ŋun, nyena ŋo nagon yi memet kune gweye kaŋo i ŋo nagon ti meta.

⁴ Ko ŋina yupet, Ebele a wukiŋdya Ŋun rubaŋga lo ’but Iwolwoŋ lo Kaina; a Ŋun iŋge lyoŋön ko ’dokesi kanyit kogwon ŋina yupet nanyit, kwekiŋdya adi nye a ruk Ebele a lo rigwo. Nyena kogwon yupet nanyit lepeŋ nyuŋ jajambu ma ’di nye a twan.

⁵ Ko ŋina yupet, Enoka a wusaji kaŋo i na kak a ko twan, a lepeŋ gwe a ko rye kogwon Ŋun a wusara lepeŋ. Kulya kanyit a tokuruki adi i ŋerot na wusaji ’e nye nu lepeŋ a tulyöŋgu Ŋun.

⁶ Nyena ko yupet ’bayin ŋuto ti bulö tulyöŋgu Gun kwöŋ, kogwon ŋuto logon mijun ko Gun ni lo agu ködyö yuyuŋ adi nye kata, köti adi nye roröpakin ŋuto lo ga ’yu nye lo.

⁷ Ko ŋina yupet, Noa a yiŋ kukuesi ti Ŋun i kulya ti ŋo nagon a ko nyuŋ po, a lepeŋ iŋge twö kulya na jam Ŋun kune, a ’duŋge ki ’bo anyen lwöggu mede nanyit. Nyena kogwon yupet nanyit, a kak ’bukuluŋ iŋge ’duŋöki putet arabat, a lepeŋ iŋge wuju löti lo rigwo lo po kogwon yupet.

⁸ Ko ŋina yupet, Abarayama a ruk luŋu nanyit ko Ŋun anyen ŋiörö i jur logon Ŋun a milyekin i tiŋdu na lepeŋ a lomore lonyit lu, a lepeŋ ŋiörö ŋiörö ’bak deŋdya ko nye tu da.

⁹ Ko ŋina yupet, a Lepeŋ iŋge si ’da a lwakatyo i jur logon Ŋun a milyekin tiŋdu lepeŋ lu. A lepeŋ si ’dani i kemialan ko Yisaka se ko Yakobo logon Gun köti a milyekin tiŋdu se ŋo na geleŋ ŋina.

¹⁰ Kogwon Abarayama möŋdu köji nagon Ŋun lo yiyiuŋdyö ko a ’duggö nu. Ŋina köji togwi ’diesi kanyit a iŋgo ko yeyeŋon.

¹¹ Ko ŋina yupet, Sara ko mugun nanyit a wuju riŋit anyen pipigga, ma ’di nagon nye gwe a modoŋ tine yupuŋdyö nu, kogwon nye a yuŋ adi Ŋun lo milyeju lo bubulö yiniki i ŋo na milyeji nye na.

¹² Nyena i ŋuto geleŋ logon gwoso ŋuto lo twan lo a yuŋwe nyakwariat jore parik gwoso kaser ti ki, ko gwoso sese nagon ti bulö kena na gwon i kijit na tör duma na ’balaŋ.

¹³ A kilo ŋutu liŋ iŋge twakin i ŋina yupet. A lepeŋat gwe a ko wu ŋo nagon Ŋun a milyekin i tiŋdu na se kune, ama a se iŋge met kine ŋo pajo a se iŋge lyöŋön ko se. A se iŋge tukun köke adi se a Lwaka ko a lepelok i na kak.

¹⁴ Ŋutu logon tuggö kulya gwoso kine kulo kweja adi se ’diri ga ’yu jur logon a lose.

¹⁵ A ko se ködyö a yiyiuŋdyö jur logon se a pöri kaŋo kata lu, a se ködyö aje ryö komor na ’but nagon se yitöri nyin,

¹⁶ kölumbö a se gwe ko pusök i jur lo ’but bia parik logon a lo ki. Nyena ŋina a kwe nagon Ŋun ti yu kwe i luŋu a Ŋun lose, kogwon lepeŋ aje tetenakin se köji.

¹⁷ Ko ŋina yupet, Abarayama ’dek wukiŋdya Yisaka a rubaŋga i diŋit nagon nye a tema ko möriet. Lepeŋ gwon ajo i wukiŋdya na ŋuro lonyit pilili ma ’di nagon Ŋun a milyekin lepeŋ adi,

¹⁸ Nyakwariat kulök mo pipiluŋdya ko Yisaka.

¹⁹ A lepeŋ iŋge katimun adi Ŋun bubulö toŋiju ŋutu ma ’di i twan, a lepeŋ ’diri iŋge wuyun ŋuro lonyit bot logon pituŋdyö i twan lo. Kine kulya a jama i lilim.

²⁰ Ko ŋina yupet, a Yisaka ’boroji Yakobo ko Esau, ’diŋdya ŋo ti molu.

²¹ Ko ŋina yupet, a Yakobo ’boroji ŋwajik ti Yosepa geleŋ geleŋ nagon nye gwe nyona ko twan nu; a nye dulakine i kwakwaddu töggu mugun ko kwe na ture lonyit.

²² Ko ŋina yupet, i diŋit nagon Yosepa gwe nyona ko twan nu, a nye jambi kulya ti yuörö na ŋutu ti Yisaraele kaŋo i Ejipeto adi ti se baraddi kuyu kanyit.

²³ Ko ŋina yupet, monye ko ŋote Mose a ’de ’ya lepeŋ ko yapala musala i mukök na yuŋwe nanyit, kogwon se a met adi lepeŋ a luŋudi lokwekwelen parik, a se gwe a ko kujönö saret lo mor.

²⁴ Ko ŋina yupet, i diŋit nagon Mose aje ’duŋö nu, a lepeŋ renyani luŋu a ŋuro lo ŋuro na Paro,

²⁵ a lepeŋ wuluŋdye sasanya ko ŋutu ti Ŋun i pirit na geleŋ, Iwolwöŋ tulyöŋgu mugun ko ŋo ti toron nagon ti si ’da diŋit a najo kune.

²⁶ Kogwon lepeŋ aje yeye adi lawe i kulya ti Masia gwon ko ’bulit a duma lwölwöŋ tukwörienjin lio ti Ejipeto, kogwon lepeŋ gwögwöŋu ko konyen kanyit ropet na popo.

²⁷ Ko ŋina yupet, a Mose kö ’yi Ejipeto, a tine kujönö woran na mor; a lepeŋ iŋge ŋoŋaddu tojo ko ’dutet gwoso ŋuto logon a meddya Ŋun logon ti bulö meta lo.

²⁸ Ko ŋina yupet, a lepeŋ tiŋdi ŋutu i koŋdya na Pasaka, ko i gwagwaddu na rima anyen malaikatat katatuanit gwon ti ’bo ’yu ŋwajik kayujin ti Yisaraele.

²⁹ Ko ŋina yupet, a se laggi Tör Nator gwoso nagon se wöroŋ i kak nateyon; ama a na mori ŋutu ti Ejipeto i laŋgu nu, a se iŋge ’diron.

³⁰ Ko ŋina yupet, a gorom nagon a mariŋ na Yeriko iŋge duyömökiŋdyo kak i mukök na woroji ’e ŋutu ti Yisaraele perok buryo i iŋga na lepeŋ nu.

³¹ Ko ŋina yupet, Raba kawute a ko tukara i diŋit na tukararikin ŋutu logon ’bayin a kayupök kulo, kogwon lepeŋ a wuju kawirak ’bura.

³² A nan jambi kulya jore a ti nyo? Diŋit nio ’bayin nagon nan jambi kulya ti Gidiona, ko ti Barak, ko ti Simasona, ko ti Yepeta, ko ti Dawidi, ko ti Samuele se ko ti nebijin.

³³ Ko ŋina yupet, a kilo ŋutu iŋge te ’ya tumatyanjin, a ririkiŋdye ŋo liŋ gwogwo, a wuji ŋo nagon Ŋun a milyekin tiŋdu se kune. Ko ŋina yupet, a se iŋge mu ’dut kutusen ti kömiruot,

³⁴ a iŋge peŋ kimaŋ na tule ko riŋit, a iŋge rwöddu i tatua ko baŋdujin. Ma ’di nagon se a lomunyak ama se a wora a iŋgo. A se iŋge kon ’börik a kamörök walan, a se iŋge rikökin teŋon ti kamorök logon a Lwaka.

³⁵ ŋutu wate wuju ŋutu kase lo twatwa logon a toŋiyu i twan. Kulye ŋutu a tomie tojo lepeŋat a twatwa, lepeŋat a renya lakwe kaŋo anyen se böŋö ŋikin i ru nagon a na ’but bia parik.

³⁶ A kulye iŋge ŋoŋga ’dö ’döyö, ko gwugwutötu, a iŋge rereka ko toŋot, a tikine i kadi rereket.

³⁷ a lepeŋat iŋge gugubatu ko ŋurupö, ko a tutupötu ko sereserejin, a iŋge tatua ko baŋdujin. A se wöröjine a jupu gobero ti köbilu, ko ti melon, lepeŋat a lomerika, a sasanya, ko a konaki arabat.

³⁸ Na kak ’bayin a na ’but anyen ŋutu gwoso kilo si ’da kata. A se wöröni abur i yöbuöt ti sese, ko i merya, a sisi ’dati i kuggiöt se ko i dilyö ti kak.

³⁹ Kilo ŋutu liŋ kukwön kogwon yupet nase, ama a se gwe a ko wu ŋo nagon Ŋun a milyekin tiŋdu se kune,

⁴⁰ kogwon Ŋun aje ’delakin yi ŋo nagon a na ’but bia parik lwölwöŋ kine, adi lepeŋat ködyö ti bulö tetena a lo ’but jojo ake ko se a morakiŋdya kayaŋ.