Ebere 10 - Bibilia Buk na Ŋun nagon koti luŋu a

¹ Saresi ti Mose a tölimöt kana A ’bayin a ŋoji nöti gwak na ŋo na ’but na popo kune. Rubaŋgajin logon nyönyökö wuki temba i kiŋa kulo ti bulö tiŋdu kakwakwasak kulo i gwon a lo ’but jojo.

² A ko ködyö kilo rubaŋ gajin bubulö tiŋdu ŋutu i gwon a lo ’but jojo, a se ködyö tine bulö wuki köti, kogwon a kakwakwasak ködyö iŋge tokela daŋ geleŋ asut, a töilyet kase köti ködyö tine yeyeju adi se a koŋdya toron.

³ Ama kölumbö kilo rubaŋgajin toyiyikiŋdyö ŋutu toronjin kase temba i kiŋa,

⁴ kogwon rima ti dwönin ko ti yidin ti bulö joŋga toronjin kaŋo kwöŋ.

⁵ Ko ŋina kwe, i diŋit nagon Kristo pöri i na kak nu, lepeŋ a kulya adi, Do ti ’bön rubaŋgajin se ko ’dokesi, ama do aje tetenakiŋdya nan mugun.

⁶ Do ti lyöŋön ko rubaŋgajin lo ’yu ’yura ’buluŋ se ko rubaŋgajin ti toronjin.

⁷ A nan kirut kulyani adi, Nan malo pon Ŋun, nan aje po i koŋdya na ŋo nagon do ’de ’deggi kune, gwoso na wurörikin kulya kwe i nene na bukön kunök nu.

⁸ A kokwe lepeŋ a kulya adi, Do ti ’bön rubaŋgajin ko ’dokesi, do ti lyöŋön ko rubaŋgajin lo ’yu ’yura ’buluŋ se ko rubaŋgajin ti toronjin, ma ’di nagon se a wuki gwoso i saresi nu.

⁹ A kirut lepeŋ kulyani adi, Nan malo, nan aje po i koŋdya na ŋo nagon do ’de ’deggi kune. A lepeŋ tu ’baka ’yi rubaŋgajin ti kokwe kulu a tiŋdi rubaŋga tomurek adi ti nye lo gwe.

¹⁰ Nyena kogwon Yesu Kristo a koŋdya gwoso nagon Ŋun ’de ’dekan na, yi a tokela kogwon lepeŋ a wukiŋdya mugun a rubaŋga dao geleŋ asut.

¹¹ Koanejin liŋ gwo ’dan i nyöggu i wukiŋdya na rubaŋgajin temba i lor. Kilo rubaŋgajin ti bulö joŋga toronjin kaŋo kwöŋ.

¹² Ama Kristo wukiŋdya mugun a rubaŋga lo toronjin daŋ geleŋ asut, a lepeŋ si ’dakine kak i könin lutaten lo Ŋun.

¹³ A kirut lepeŋ möŋdi Ŋun i tiŋdu na lepeŋ merok kanyit a tökit na mokosi.

¹⁴ Nyena kogwon wuki na rubaŋga geleŋ ka ’de, lepeŋ aje tiŋdu ŋutu logon nye a toke anyen kitakiŋdya nye kulo i gwon a lo ’but jojo ŋupi.

¹⁵ A Mulökötyo Loke köti iŋge tokurukin yi sona. A kokwe lepeŋ kulya adi,

¹⁶ Matat lo kulya adi, Na a tomoret nagon nan mo tetenakin se i mukök na kilu perok, nan mo titin saresi kwe kase i töilyet, wurökiŋdye se kase i yeyeesi.

¹⁷ A lepeŋ ’ya ’yi kulya adi, Nan mo tine yeye toronjin kase ko lyaŋesi kase köti kwöŋ.

¹⁸ A ko toronjin aje pitöki, a köti kulye rubaŋgajin ti toron ’dekarikin a ti nyo?

Ti yi mijörö ta nyona ko ŋun

¹⁹ Nyenagon luŋasirik, yi soŋinana tine kujönö tulöddu i pirit nake na rurwan nagon totopuŋdya na kogwon rima ti Yesu.

²⁰ Lepeŋ a pakiŋdya yi kiko ludukotyo ko a toruet i boŋgo koret, kweja adi kanyit i mugun.

²¹ Yi gwe kata ko koane duma logon meddya mede na Ŋun,

²² nyena ti yi mijörö ta nyona ko Ŋun yu ko töilyet ti to ’diri logon ko yupet a duma, töilyet kaŋ logon deden adi yi a koŋdya toron kulo aje tokela, a mugunya kaŋ iŋge lalai ko piŋo nake adi lor.

²³ Nyena ti yi ’depakiŋdye ta go i ŋo nagon yi tuggö adi yi a yuŋ kune, kogwon Ŋun lo milyekindyö yi ŋo lo, yi bubulö yinikiŋdyö lepeŋ asut i ŋo na milyeji nye na.

²⁴ Ji yi möŋi ta jujuja na ’borik i tunyar ko i koŋdya na ŋo nagon a na ’but.

²⁵ Ti yi gwe ti jaran i momora ko ’börik, gwoso na koŋdi kulye ŋutu na, ama ti yi togo ’yi ta ’börik bia parik kogwon lor lo ’dutet ŋilo mimijun nyona.

²⁶ Kogwon koyi yegon wuluŋdyö toron i mukök nagon yi aje wuju deŋdya na to ’diri, a lele rubaŋga gwe ’bayin logon mo ’dumaddu toronjin kao kaŋo.

²⁷ Ka ’de a yi möŋdi ko kujönö putet se ko kimao na pape nagon mo totumbö merok ti Ŋun.

²⁸ ŋuto logon a lauŋdya Saresi ti Mose lo, ko ŋutu murek kode musala a tökoŋu kulya kanyit, lepeŋ tatatua ’bak pitöki.

²⁹ ŋuto logon a ryokakiŋdya Ŋuro lo Ŋun kak, a koŋdi rima ti tomoret nagon lepeŋ a tokela kata kune adi se ti gwon a nene ŋo, a lepeŋ lauŋdye Mulökötyo lo Ŋun logon a ka ’buse lo, yeyeji ta riŋet nago bia parik nagon jujukin riparikin ŋuto gwoso ŋilo.

³⁰ Kogwon yi deden nye lo kulya adi, Kine a kulya kwe i ropakiŋdya, nan ’diri mo roropakin. Köti adi, Matat mo ’duŋgö kulya ti ŋutu kanyit.

³¹ Nyena a ŋo sörit nagon totokujöŋdu parik i ’doro ko Ŋun lo gwon jörun i konisi i riŋa.

³² Yiyiuŋdye ta perok ti köju kulu. Yiyiuŋdye ta adi i mukök nagon ta aje wuju parara, a ta iŋge ŋoŋga sasanyesi jore a ta gwo ’de go.

³³ Ta a ’dö ’döyö ko ŋutu jore i komor a iŋge konaki arabat, a i kunie diŋitan a ta iŋge mora-kiŋdya i ŋutu logon a konaki arabat gwoso ta kulo.

³⁴ Kogwon ta a parundya sasanyesi ti ŋutu lo rereka, a i diŋit nagon ŋo kasu ryaryaka nu, a ta kölu-mbö lyöŋi lyöŋön, kogwon ta a den adi ta kata ko go na ’but parik nagon yeye-ŋon lwölwöŋ na ryaka kine.

³⁵ Nyenagon ko gubara ta topurwan nasu mu’diŋ. Lepeŋ jakiŋdya ta ropet duma.

³⁶ Ko ta yöŋö koŋdya ŋo nagon Ŋun ’de ’dekan kune a wuji ŋo nagon nye a milyekin tiŋdu kune, ta agu ködyö gwo ’dan go.

³⁷ Kogwon yöŋgi diŋit a na ’dit nye logon popo lo mo ’du ’dur, nye mo ti karakin.

³⁸ Ama ŋuto lio lo löti lo rigwo lo mo gwon jörun ko nye a yubbö, ama ko nye a kukutörö bot a nan mo tine lyöŋgi lepeŋ.

³⁹ Ama ŋutu logon kukutörö bot ko a tukara kulo yi ’bayin a kulye kase, ama yi a ti ŋutu lo gwon ko yupet kulo a yi lwököni lwökö.