Daniele 6 - Bibilia Buk na Ŋun nagon koti luŋu a

Daniele a gubaji i goro lo kömiruöt

¹ A Dario wuluŋdye mödirön dumalak mia geleŋ ko merya murek a ti tumatyan ’bukuluŋ, gwoso nagon nye a ’deggi na;

² a nye tiŋdi temejik kase musala, ŋilo Daniele a lele lose, logon kulo mödirön ködyö kwekiŋdya kulya kase ko lepeŋat, anyen tukwörien na mor gwon ti likin.

³ A kirut ŋilo Daniele iŋge kuön parik lwölwöŋ kulye temejik ko mödirön dumalak liŋ kogwon mulökötyo lo ’but gwon ko lepeŋ, a mor ’deke tiŋdu lepeŋ a duma lo tumatyan ’bukuluŋ.

⁴ A kirut temejik se ko mödirön dumalak ga ’yi nene kwe nagon se pökiŋdye Daniele i kulya ti miri; ama a lepeŋat tine ryö nene kwe kode nene toron nagon se pökiŋdye lepeŋ kogwon lepeŋ a lo yiyiniki, a lyaŋet kode toron gwe a ko rye ko lepeŋ.

⁵ A kirut kilo ŋutu kulyani adi, Yi a ko ryö nene kwe nagon yi pökiŋdye ŋilo Daniele, ake koyi ryo i keri lo ŋun lonyit.

⁶ A kirut kilo temejik ko mödirön dumalak momoruŋdye ko mor ni ko yeyeet nase geleŋ. A se kulyani ko lepeŋ adi, Ti do si ’dani ŋupi pon mor Dario!

⁷ Yi temejik ti tumatyan, ko yumiat, ko mödirön dumalak, ko kajujuwak se ko mödirön lo ’di ’dik, yi liŋ a ruk adi do mor ködyö teteŋdya saret, a giŋge giggö adi ko ŋuto logon a kwaddu nene po ko lele ŋun, kode ŋuto, ake kwaddu do i kulo perok merya musala pon mor, ti nye gubajine i goro lo kömiruöt.

⁸ Nyena pon mor, tiŋdi giket ko wurö-kiŋdye karin kunök i ŋina waraga anyen gwon ti bulö löpukö kwöŋ, gwoso i saresi ti jur lo Madai se ko Parasa logon ti bulö löpukö asut.

⁹ Nyena a kirut mor Dario tanyakiŋdye könin i ŋina waraga nagon a giket na.

¹⁰ A nagon Daniele aje den adi waraga na ŋilo saret aje tanyaki könin nu, a lepeŋ iti kanyit kadi nagon kulupitan ti koŋilore nanyit na tetenaki diraddu i swöt lo Yerusalema kunu gwon ŋa; a lepeŋ gwe i rugwuŋö kak daŋin musala temba i lor a gwe i kwakwaddu ko i pupurja na Ŋun lonyit gwoso na yeŋ na.

¹¹ A kirut kilo ŋutu lo poŋdi ko yeyeet nase geleŋ, a ryeji Daniele kwakwaddu ko momo ’yu Ŋun lonyit.

¹² Nyena a lepeŋat iti ko mor i komor, a toyiyikiŋdye mor i kulya ti lo giket adi, Pon mor, do ŋona a ko tanyakiŋdya könin i lo saret giket adi ko ŋuto logon a kwaddu nene ŋo ko lele ŋun kode ŋuto ake kwaddu do i kulo perok merya musala pon mor, ti lepeŋ gubajine i goro lo kömiruöt le? A mor ruŋge adi, Sona, agu kine kulya gwo ’dan go, gwoso i saresi ti jur lo Madai ko lo Parasa logon ti bulö lopukö asut.

¹³ A kirut lepeŋat kulyani ko mor adi, Pon mor, ŋilo Daniele logon a lele lo ŋutu logon koju momokwe Yuda yu kulo ti twö kulya kunök, kode yiŋga saret giket logon do a tanyakin könin ilot kata lo, ama a lepeŋ kölumbö kwakwaddi kwakwaddu daŋin musala temba i lor.

¹⁴ A na yiŋge mor kine kulya nu, a lepeŋ iŋge delya parik, a tiŋdi yeyeet nanyit i lwökuŋdyö na Daniele; a lepeŋ möŋi möŋu i lwöggu na lepeŋ tojo ko ’doro na kolor.

¹⁵ A kilo ŋutu köti momoraddi ko mor yu ko yeyeet nase geleŋ, a kulyani ko lepeŋ adi, Dene den pon mor, adi saret lo jur lo Madai ko lo Parasa gwon sona adi ko mor aje giggö kode a saŋu nene ŋo a tine bulö löpukö kwöŋ.

¹⁶ A kirut mor tiŋdi saret a Daniele jweni jwe, a gubajine i dili nagon a goro lo kömiruöt. A mor takiŋdye Daniele adi, Ti Ŋun ilot logon do kitakiŋdya lepeŋ diŋitan liŋ lo lwöku do.

¹⁷ A ŋurupit lo jweni a mukörikin kutuk na ŋina dili, a mor joggi lepeŋ ko katimanti nanyit nya ’dotet se ko na kimak, anyen nene ŋo ködyö gwon ti löpukö a kwe na kulya ti Daniele.

¹⁸ A kirut mor iti kanyit mede, a miŋdye miŋdya tukwaje liŋ; a lepeŋ iŋge renya ŋo tulyöŋesi, a konyen kanyit kweline kweli.

¹⁹ Nyena i baŋun na kak, a mor ŋine ŋien a dikara i dili nagon a goro lo kömiruöt nu.

²⁰ A na ’durökiŋdye lepeŋ i dili nagon Daniele gubaji kata nu, a lepeŋ luluje lulujö ko gworo lo delya adi. A, Daniele, köliŋönit lo Ŋun lo gwon jörun, Ŋun ilot logon do kitakiŋdya lepeŋ diŋitan liŋ lo ŋona ’diri kata ko riŋit nagon lwökuŋdye do ko kömiruöt i kutusen le?

²¹ A Daniele nyobbi adi, Ti do si ’dani ŋupi pon mor!

²² ŋun lio a sunyuŋdyö malaikatat lonyit a iŋge mu ’dut kutusen ti kömiruöt, a gwe a ko konakin nan nene ŋo kwöŋ, kogwon nan a ko rye ko nene ŋo naron ko lepeŋ i komor; köti ma ’di konut i komor nan a ko toroŋdya pon mor.

²³ A kirut mor iŋge lyöŋon parik, a saŋi saŋu anyen Daniele ’dumwe kaŋo i nu dili. Nyena a Daniele ’dumwene kaŋo, a ’dika gwe a ko rye kanyit i mugun kwöŋ kogwon lepeŋ a yinikin mugun ko Ŋun lonyit.

²⁴ a mor tiŋdi saret anyen kilu ŋutu lo pökiŋdyö Daniele kulo, ko wate kase ko ŋwajik kase liŋ jwejwe anyen gubaji i dili nagon a goro lo kömiruöt. A nagon lepeŋat a ’ko nyuŋ ’dororo i ’dutet na dili nu, a kömiruöt iŋge ryak lepeŋat a ’be ’beleŋgi kuyu kase liŋ ka ’de ka ’de.

²⁵ A kirut mor Dario wurökiŋdye waraga i ŋutu ti gweyajin liŋ, ko jurön, se ko ŋutu lo jambu kutusen ka ’de ka ’de lo gwolor i kak ni ’bukuluŋ kulo adi, Ti taliŋ ŋdine ŋdi kasu.

²⁶ Nan a teteŋdya saret adi ti ŋutu ti tumatyan nio ’bukuluŋ ködyö böŋdi böŋdu, ko ti kujönöni Ŋun lo Daniele, kogwon lepeŋ a Ŋun lo gwon jörun, ko yeyeŋon ŋupi; tumatyan nanyit ti bulö tukara asut a tomoran nanyit mo gwe tojo ko ’dutet.

²⁷ Nye logon a lwöggu Daniele i riŋit na kömiruöt lo, lepeŋ riripuŋdya ko lwölwöggu, lepeŋ kokoŋdya kweyesi ko sörösi i ki yu se ko i kak ni.

²⁸ Nyena kulya ti ŋilo Daniele a tu ’bura i diŋit na gwoŋdi Dario a mor, köti se ko i diŋit na tomoran na Korese Parasatyo.