Daniele 3 - Bibilia Buk na Ŋun nagon koti luŋu a

Teton musala a lwokwe i kimaŋ duma na rorö ’yu

¹ A mor Nebukadanesar teteŋdi nyomue na dakap nagon tojolan nanyit a lokiliŋan merya buker, a tugalaŋ nanyit gwe a lokiliŋan buker, a lepeŋ togwi ’dikiŋdye ki i ’dar na Dura, i moddria na Babela.

² A kirut mor Nebukadanesar soŋdi lore anyen modiron dumalak, ko yumiat, ko modirön lo ’di ’dik, ko kajujuwak, ko ka ’delak ti gurut, ko ka ’duŋok, ko kaliliyak ti putesi se ko temejik liŋ ti modoriajin momora, anyen po i ’boroki na nyomue nagon nye mor Nebukadanesar a togwi ’dikin ki na.

³ A kirut modirön dumalak, ko yumiat, ko modirön lo ’di ’dik, ko kajujuwak, ko ka ’delak ti gurut, ko ka ’duŋok, ko kaliliyak ti putesi se ko temejik liŋ ti modoriajin momori i ’boroki na nyomue nagon mor Nebukadanesar a togwi ’dikin ki na; a lepeŋat gwo ’de i komor na ŋinu nyomue nagon mor aje togwi ’dikin ki na.

⁴ A kirut luyökie lo laije laŋa parik adi, Ta gweyajin ti ŋuto, ko ta juron, ko ta ŋutu lo jambu kutusen ka ’de ka ’de, ta a saraki adi,

⁵ ko ta a yiŋga woŋon na toriot, ko na kili ’bajin, ko na tomon, ko na rababajin, ko na tomon dumalak, ko na wintilujin se ko na woŋesi kunie liŋ ti tito gwoesi, ti ta ködyö ’do ’done kak i twoju na nyomue na dakap nagon mor Nebukadanesar a togwi ’dikin ki na.

⁶ Ko ŋuto logon a ko ’doro kak i twoju na lepeŋ de gugubaji ’de ’de kijek i pirit namet nagon kimaŋ a duma rorö ’yu kata na.

⁷ A gwe sona na yiŋge gweyajin liŋ ti ŋutu woŋon na toriot, ko na kili ’bajin, ko na tomon, ko na rababajin, ko na tomon dumalak, ko na wintilujin se ko na woŋesi kunie liŋ ti tito gwoesi nu, a ŋutu liŋ ti juron ko kutusen kase ka ’de ka ’de ’do ’done kak i twoju na nyomue na dakap nagon mor Nebukadanesar a togwi ’dikin ki na.

⁸ A i ŋinu diŋit a kulye ŋutu ti Kaledea poŋdi ŋerot i ’buronokiŋdyo na Yudayaki,

⁹ a kulyani ko mor Nebukadanesar adi, Ti do si ’dani ŋupi pon mor!

¹⁰ Do pon mor a teteŋdya saret adi ko ŋutu liŋ a yiŋga woŋon na toriot, ko na kili ’bajin, ko na tomon, ko na rababajin, ko na tomon dumalak, ko na wintilujin, se ko na woŋesi kunie liŋ ti tito gwoesi nu, ti se ’do ’done kak i twoju na nyomue na dakap;

¹¹ a ko ŋuto logon a ko ’doro kak i twöju na lepeŋ de gugubaji ’de ’de kijek i pirit namet nagon kimaŋ a duma rörö ’yu kata na.

¹² Ama kulye Yudayaki kata logon do a wulun a kamemetak ti kulya ti mödöria na Babela, logon a ko Sadaraka, ko Mesaka se ko Abede-nego. Kulo ŋutu ti yiŋ kulya kunok pon mor. Lepeŋat a ko kitakiŋdya ŋunyen kulok kode twoju nyomue na dakap nagon do a togwi ’dikin ki na.

¹³ A Nebukadanesar iŋge woran parik a tomonik, a saŋi ŋutu anyen se joŋdya Sadaraka, ko Mesaka se ko Abede-nego kanyit ni. A kirut lepeŋat joŋdi kulo ŋutu ko mor i komor.

¹⁴ A Nebukadanesar pipije lepeŋat adi, ’Diri a gwak le Sadaraka, ko Mesaka se ko Abede-nego, adi ta a ko kitakiŋdya ŋunyen kwe, kode twoju nyomue na dakap nagon nan a togwi ’dikin ki na?

¹⁵ Nyena i diŋit nagon ta a yiŋga woŋon na toriot, ko na kili ’bajin, ko na tomon, ko na rababajin, ko na tomom dumalak, ko na wintilujin se ko na kunie woŋesi liŋ ti gwoesi, ko ta ködyö a ruk ’do ’do kak i twöju na nu nyömue nagon nan a teten na, ködyö gwon a na ’but; ama ko ta a ko twöju lepeŋ a ta mo gugubaji ’de ’de kijek i pirit namet nagon kimaŋ a duma rörö ’yu kata na. Lon ŋun de lo lwökuŋdyö ta köyö i könisi?

¹⁶ A Sadaraka, ko Mesaka se ko Abede-nego nyobbi mor adi, Yi ’bak kulya na jajama pon Nebukadanesar.

¹⁷ Ko ködyö gwon sona, a ŋun likaŋ logon yi kitakiŋdya lepeŋ lo de bubulo lwökuŋdyo yi i pirit namet nagon kimaŋ a duma rörö ’yu kata na; a nye mo lwökuŋdye yi kaŋo konut i könisi pon mor.

¹⁸ Ama ko ’bayin sona, a ti do dene den pon mor, adi yi ti kitakiŋdya ŋunyen kulök, kode kwakwaddu nyomue na dakap nagon do a togwi ’dikin ki na.

¹⁹ A kirut Nebukadanesar iŋge gwu-luŋgo ko woran, a komor nanyit iŋge Iöpuggö a nagusu i meddya na Sadaraka, ko Mesaka se ko Abede-nego. A lepeŋ tiŋdi saret anyen pirit namet nanama pape parik parik daŋin buryo lwölwöŋ na perok liŋ.

²⁰ A lepeŋ yökije kulye ŋutu walan ti teŋ nanyit na kamörök anyen toŋa Sadaraka, ko Mesaka se ko Abede-nego, anyen gubaji i pirit namet nagon kimaŋ a duma rörö ’yu kata na.

²¹ A kirut kilo ŋutu torani tora, a jupu ko jolobiyajin, ko boŋgwat ti mokosi. ko mukesi kase ti kusik, se ko kunie boŋgwat kase, a lepeŋat gubajine i pirit namet nagon kimaŋ a duma rörö ’yu kata na.

²² Nyena kogwon saret lo mor a iŋgo köti pirit namet gwe pape parik, a ŋedepa ti kimaŋ iŋge dapara kilu ŋuto lo ’doggu ko Sadaraka, ko Mesaka se ko Abede-nego kulo.

²³ A kulo ŋuto musala, logon a ko Sadaraka, ko Mesaka se ko Abede-nego kölumbö ’do ’done a tora i pirit namet nagon kimaŋ a duma rörö ’yu kata nu.

²⁴ A kirut mor Nebukadanesar iŋge söŋu parik a ŋine ki ’de ’de kijek. A nye pipije kajujuwak kanyit kulo adi, Yi dika a ko gubara kulo ŋuto musala i kimaŋ a tora le? A lepeŋat nyobbi adi, A gwak pon mor.

²⁵ a lepeŋ kulyani adi, Ama nan meddya ŋuto iŋwan a laka wöwörö i kiden na kimaŋ, a lepeŋat gwe a ko ’bolo kwöŋ; a ŋuto toiŋwan lo metani gwoso lele ŋun.

²⁶ A kirut Nebukadanesar miju nyona ko kötumit na pirit namet nagon kimaŋ a duma rörö ’yu kata na, a kulyani adi, Sadaraka, ko Mesaka se ko Abede-nego, ta köliŋönök ti ŋun Katoŋanit lo ki lio, lupene ta kaŋo, po ta ni! A kirut Sadaraka, ko Mesaka se ko Abede-nego lupene kaŋo i kimaŋ.

²⁷ A mödirön dumalak, ko yumiat, ko mödirön lo ’di ’dik se ko kajujuwak ti mor momori i pirit na geleŋ, a iŋge met adi kimap a ko ’bo mugunya ti kilo ŋutu, ma ’di kupir kase ti kusik a ko ’yura, a jölöbiyajin kase gwe a ko nokan kwöŋ, a mon na kimaŋ gwe ’bayin ko lepeŋat i mugunya.

²⁸ A Nebukadanesar kulyani adi, Ti ŋun lo Sadaraka, ko a lo Mesaka, ko a lo Abede-nego purani pura, logon a sunyuŋdyö malaikatat lonyit i lwöggu na köliŋönök kanyit kogwon se a yinikin ’börik ko lepeŋ, a se renyani saret lio lo mor, a se pakiŋdye mugunya kase bia nagon se kitakiŋdya kode twöju lele ŋun ake ŋun lose ka ’de.

²⁹ Nyena nan a tiŋdu saret adi, Ta gweyajin ti ŋutu, ko ta jurön, ko ta ŋutu lo jambu kutusen ka ’de ka ’de, ko ŋuto logon a lauŋdya Ŋun lo Sadaraka, ko a lo Mesaka, ko a lo Abede-nego lo, ŋilo ŋuto mo tutupö i tupesi, a kadi nanyit mo kölökine a murwö, kogwon lele ŋun ’bayin logon bubulö lwöggu ŋutu gwoso ŋina.

³⁰ a kirut mor toduma ’yi Sadaraka, ko Mesaka se ko Abede-nego i mödöria na Babela.