Daniele 12 - Bibilia Buk na Ŋun nagon koti luŋu a

Diŋit na ’dutet

¹ A i ŋinu diŋit a Mikaele mo lo ŋine, logon a duma ko a katiyunit lo ŋutu kulök. A diŋit na sasanyesi mo gwe kata nagon ’beron a ko nyuŋ meta temba na gwoŋdi ŋutu i na kak na tojo ko ŋinu diŋit; ama i nu diŋit ŋutu kulok mo lwölwökö, se liŋ geleŋ geleŋ logon karin kase a wuröki i buk kulo.

² A jore ti kilu lo doto i kujöŋ kulu mo purwene purwe; kulye kase mo wuju ru na yeŋ nyin a kulye mo wuji ’yu na kusik a manani mana ŋupi ŋupi.

³ A ŋutu lokoŋ mo gwe a loke gwoso ’diko na ki, a kilu lo löpukuŋdyö ŋutu jore i kulya na rigwo kulu mo kobbi kobbu ŋupi gwoso kaser ti ki.

⁴ Ama do Daniele, kiŋdi buk na kilo kulyaesi ko nya ’doddi lepeŋ tojo ko diŋit na ’dutet. A ŋutu jore mo wöwokine i swötön liŋ, a deŋdya na kulya mo pöine ŋdi.

⁵ A kirut nan Daniele meddi meddya, mete, kulye murek gwogwo ’dan, lele i na pele na kare a lele gwo ’de i nu pele.

⁶ A lele lose pipije ŋuto lo jupu boŋgo naparere na gwöro go logon gwo ’dan i kare loki lo adi, Diŋit ŋoman tojo ko kine sörösi mo a kona?

⁷ A ŋilo ŋuto logon jupu boŋgo naparere lo gwo ’dan kare lo, ’doggi könin lonyit lo lutaten ko lo kadoŋe ki; a nan yiŋge lepeŋ i milyeju ’diŋdya nye lo gwon jörun ŋupi ŋupi lo, adi temet nase mo gwe a diŋit, ko diŋitan murek, ko swöt na diŋit. A kirut kine po liŋ mo konani kona i diŋit nagon riŋit na ŋutu loke mo tetela nu.

⁸ Nan a yiŋ, ama nan a ko kurun. A kirut nan pipije adi, Pon duma lio, ’dutet na kine kulya mo gwon ada?

⁹ A nye waddi adi, Daniele, iti tu kogwon kilo kulyaesi aje kinu ko a nya ’doto tojo ko diŋit na ’dutet.

¹⁰ Ŋutu jore mo seseta gwoso ’bolot, a lalani lala a loke, a tokelani tokela; ama a ŋutu lorok mo koŋdi kulya narok; a lele lose mo gwe ’bayin lo kukuruŋdyö; ama ŋutu lokoŋ mo lo kuruŋdyo.

¹¹ Nyena suluja i diŋit na ’dumaji ’e kaŋo rubaŋgajin lo ’yu ’yura ’buluŋ ti diŋitan liŋ tojo ko ŋo na mamana parik nagon koŋu keri a togwi ’diki ki nu, a mo gwe a perok aliŋ geleŋ ko miajin murek ko merya buŋwan.

¹² Nye logon a tiju tojo ko ’dutet na perok aliŋ geleŋ ko miajin musala ko merya musala wot mukanat lo mo gwon a kalyöpönit.

¹³ Ama iti tu tojo ko ’dutet; a do mo yuke yukan, a i ’dutet na po liŋ a do mo gwo ’de i pirit nagon a wulöki do na.