Daniele 11 - Bibilia Buk na Ŋun nagon koti luŋu a

¹ Ama i kiŋa lo kokwe lo Dario Madaityo, nan a ŋikin i parakiŋdya ko i togo ’yu na lepeŋ.

Mor lo lobot se ko mor lo loki

² Nyena nan de kwekwekin do kulya nagon a gwak. Mete, kulye moran musala mo pupukun Parasa; a toiŋwan lo mo gwe a kwörinit lwölwöŋ lepeŋat liŋ; a nagon nye aje tukworien parik a gwe a iŋgo nu, a lepeŋ mo topije ŋutu liŋ anyen mörö ko tumatyan na Giriki.

³ Nyena a lele mor iŋgo parik mo lo puku, a lepeŋ molu saŋi tumatyan duma parik, a koŋdi gwoso nye ’de ’dekan.

⁴ A nagon nye aje todumalan nu, a tumatyan nanyit mo tutupöni tutupö a korakine i swötön iŋwan ti kak lo wukuŋdye köbuŋöton. Ama a nyakwa-riat kanyit mo tine ruddya tumatyan duma gwoso ŋina, kogwon tumatyan nanyit mo ’du ’dutwe kaŋo a mo paŋi ko lepelok.

⁵ A mor lo loki mo gwe a iŋgo, ama a lele lo temejik ti miri nanyit mo gwe a iŋgo lwölwöŋ lepeŋ, a tumatyan nanyit mo gwe a duma parik.

⁶ A i mukok na kiŋajin kulye, a se mo teteŋdi tomoret, a ŋuro na mor lo loki molu nyomökine mor lo lobot anyen tomor a se ko taliŋ; ama nagon riŋit na nu ŋuto nagon tiŋdu lalet i nyaŋu na lepeŋ na mo ’bakani ’baka, a ŋuro lose mo tine yeŋon; a nu ŋuto ko ŋuto kanyit, ko ŋuro lonyit, se ko lalet lonyit mo wukine i tatua.

⁷ A i kilu perok a kene mo na ŋunu i kokori ti nu ŋuto, a lepeŋ mo gwo ’de ko monye i pirit; a ŋilo ŋuto mo poŋdi i mörö ko kamorök ti ŋina tumatyan, a lupöni i pirit na mor lo lobot nagon titiyu go, a lepeŋ mo konakiŋdye se arabat a mo te ’yi te ’ya.

⁸ A lepeŋ koti mo yekaddi ŋunyen kase, ko nyömuejin na ninito, se ko tito kase nakwekwelen nagon a podo, ko a dakap tojo Ejipeto; a nye mo kolokiŋdye mor lo lobot i gwon taliŋ ko kulye kiŋajin.

⁹ A kirut mor lo lobot mo poŋdi i tumatyan na mor lo loki, ama a lepeŋ mo yitöni kanyit i jur.

¹⁰ A ŋwajik kanyit mo teteŋdi gor, a mo luluŋgi lodir lo teŋon ’dumalak ti kamörök logon ’di ’dikun i mörö a lwöŋöddi Iwoŋöddu, a mo koti möro-jine tojo ko pirit nanyit nago na titiyu.

¹¹ A kirut mor lo loki mo gwe ko woran a duma, a lupene kaŋo i möro ko mor lo lobot logon a momora lodir duma lo kamörök, a lepeŋ mo te ’yi te ’ya ŋilo lodir.

¹² A nagon lodir lo kamörök aje moka nu, a lepeŋ mo bu ’ye mugun, a nye mo tatuje ŋuto aliŋan puök ti aliŋan, ama lepeŋ molu tine te ’ya a ’dutet.

¹³ Kogwon mor lo lobot mo köti momora lodir lo kamörök a duma parik lwölwöŋ ti köju kulu; a i mukök na kiŋajin kulye, a lepeŋ molu poŋdi po ko kamörök jore ko toro ’bo jore köti.

¹⁴ A i kilu perok ŋuto jore mo pipikin i mörö ko mor lo loki; a ŋuto kamönyok i kiden na ŋuto kulök mo toduma ’yi ’börik i koŋdya na ŋo na meta kine; ama lepeŋat mo tetela.

¹⁵ A kirut mor lo lobot mo poŋdi i ’du ’yu na ’dome duma lo liŋo a möriet lo köji, a morgi köji nagon a gömö ’bura ko mariŋ. A teŋon ti kamorök ti loki mo tine bulö gwo ’dan go, ma ’di kamörök kanyit lo nyunyumwe, kogwon riŋit nase möriet molu gwe ’bayin.

¹⁶ A miriku lonyit mo koŋdi gwoso nagon nye ’de ’dekan, a lele mo gwe ’bayin logon jujukin i möro ko lepeŋ; a nye mo möŋdi ajo i jur lokwekwelen, a ŋilu jur lio mo gwe kanyit i konisi.

¹⁷ A lepeŋ mo tiŋdi tirikwet i po ko riŋit i te ’ya na tumatyan na mor lo loki ’bukuluŋ; a mo tiŋdi jujuwesi ti ko ’yu na möro, a koŋdi se. A nye mo tiŋdi lepeŋ ŋuro nakwan a narakwan nanyit anyen to ’doro ’yu tumatyan; ama kine kulya molu ti jukin kode parakiŋdya lepeŋ.

¹⁸ A i mukök na kine kulya, a nye mo tiŋdi tirikwet i jurön ti tikonyö, a mo morgi jore kase; ama a liwa mo teŋgi lepeŋ i bu ’ya na mugun, a mo ropakiŋdye lepeŋ bu ’ya nanyit na mugun,

¹⁹ a kirut nye mo yeyeji yitö kanyit i jur i piritön nago na titiyu; ama a nye molu löpuköni löpukö a ’dorone kak a mo liki likin asut.

²⁰ A kirut lele ŋuto mo lo ruddye pirit nanyit. A nye mo soŋdi kapepena-nit lo gurut a ti tukwörien na tumatyan. Ama i mukok na perok ku ’dik, a ŋilo mor koti mo tatuani tatua ama ’bayin ko woran kode ko mörö.

²¹ A lele ŋuto lo lawe logon ’beron a ko tiki minyo lo tomoran mo lo ruddye pirit nanyit. A lepeŋ mo poŋdi po ’bak lore, a ’bu ’buddye ’bu ’buddya anyen nye wuju tumatyan.

²² A teŋon ti kamörök mo muluwani muluwa kanyit i komor gwoso bar lo muluja kak, a mo köröni körö a tömönik, köti se ko duma lo tomoret na teten Ŋun ko ŋutu kanyit na.

²³ A nye mo mori ko kulye ŋutu a lwön, a mumuluŋge mumulugga, a mo poŋdi a iŋgo ma ’di nagon nye ko ŋutu ku ’dik.

²⁴ A mo ’bunyökiŋdye swötön kulye ti mödöria logon ko tukwörien a duma; a mo koŋdi ŋo nagon komonye ko merenyejin kanyit köju a kon, a mo kökorakiŋdye kase kiden ryakat ko ŋo na momokwe se ko toro ’bo. A lepeŋ mo yeyeji kikolin möriesi ti piritön nago na titiyu, ama ko nene diŋit ka ’de.

²⁵ A lepeŋ mo togo ’yi töili a gwe a purutat, a möröni mörö ko mor lo loki ko kamörök kanyit jore. A mor lo loki se ko teŋ nanyit duma parik na kamörök walan molu iti i mörö ko lepeŋ, ama a nye tine jukin mörö kogwon nye mo mwömwön-yörikin.

²⁶ Se lo parundya kinyo lonyit lo ’but kulo mo lo köŋu lepeŋ; a ŋutu kanyit kamörök mo muluwani muluwa gwoso bar lo muluja kak, a ŋutu jore mo reremoni kak a tömönik.

²⁷ Kilo moran murek töilyet kase mo yeyeju kulya narok; a se mo tujamaki ’burönö i diŋit na nyesu; ama a se mo tine ryö ’bulit kogwon ’dutet na kine kulya möŋdu diŋit na wulwe.

²⁸ A mor lo lobot mo yitöni kanyit i jur ko toro ’bo jore, ama a töili lonyit mo yeyeji kulya narok i tomoret nake na teten Ŋun ko ŋutu kanyit. A lepeŋ mo koŋdi gwoso i ’dekesi kanyit, a mo yitöni kanyit i jur.

²⁹ A i diŋit na wulwe a lepeŋ mo yitöni i swöt lo loki, ama ŋinu diŋit mo ti gwon gwoso na ’beron nu.

³⁰ Kogwon ki ’bojin ti swöt lo Kitim mo popo i mörö ko lepeŋ, a nye mo kujönöni kujönö a yitöni bot a molu löpuköni ko woran na pape, a möröni mörö ko tomoret nake na tetena ko Ŋun, a lepeŋ mo nyaŋi ŋutu lo kö ’yu ŋinu tomoret nake kulu.

³¹ A kamörök lo sunyun lepeŋ kulu mo toluddye pirit nake na rurwan na gwon i mariŋ nago lukata nu, a mo joŋgi kaŋo rubaŋgajin lo ’yu ’yura ’buluŋ ti diŋitan liŋ. A lepeŋat molu togwi ’dikiŋdye ki ŋo na mamana parik nagon köŋu keri.

³² A nye mo luluŋge ŋutu lo köŋu ŋinu tomoret kulu ko ’bu ’busesi; ama ŋutu logon deden Ŋun lose kulo mo gwogwo ’dan go a kitani kita.

³³ a kilu logon a lokoŋ ko ŋutu kiden kulu molu tokurukiŋdye ŋutu jore, ma ’di nagon ko perok kulye se mo sasanya ko baŋdujin, ko kimaŋ, ko i joŋa nase i to ’dupien se ko ryaka nase.

³⁴ a nagon se aje sasanya nu, a se molu wuji paret a na ’dit. A ŋutu jore mo morakiŋdye ’börik i lepeŋat ko ’bu ’busesi.

³⁵ A kulye ŋutu lokoŋ mo sasanyani sasanya anyen totokela, anyen seseta gwoso ’bolot, anyen lala a loke, tojo ko diŋit na ’dutet nagon möŋdu diŋit na wulwe.

³⁶ A mor molu koŋdi gwoso nye ’de ’dekan; a bu ’ye mugun a toduma ’yi mugun lwölwöŋ ŋunyen liŋ, a mo jambi ŋo nagon lömörikin Ŋun lo totoŋun ŋunyen liŋ. A lepeŋ mo pupu-turu ŋerot tojo ko diŋit nagon woran na Ŋun aje temakiŋdya anyen kokona; kogwon ŋo nagon aje tetena kune molu kokona.

³⁷ a lepeŋ mo tine yeye ŋunyen ti merenyejin kanyit kode ŋun logon ŋutu wate gaga lo; a lepeŋ mo tine yeye lele ŋun kwöŋ, a nye molu toduma ’yi mugun lwölwoŋ se liŋ.

³⁸ Kudyakan a nye mo bu ’ye ŋun lo piritön nago na titiyu; a lepeŋ mo bu ’ye ŋun logon merenyejin kanyit a ko den, a ’doggi lepeŋ ko dakap, ko pödö, ko ŋurupo lokwekwelen, ko ’dokesi na gwörö go.

³⁹ a nye mo te ’yi piriton na titiyu i naret na ŋilo ŋun lwakatyo; a nye mo bu ’ye a toduma ’yi ŋutu logon a kugga lepeŋ kulo. A lepeŋ mo tiŋdi se a kasarak ti ŋutu jore, a mo korakiŋdye kak ko ropet.

⁴⁰ A i diŋit na ’dutet a mor lo loki mo rupipije lepeŋ; ama a mor lo lobot mo pu ’dökine ko lepeŋ loki gwoso libibiu. A nye mo poŋdi ko arabiajin lo jijiko ko ŋutu lo wokon ko kusanjin se ko ki ’bojin jore; a se mo luponi i jurön, a mo ’diku ’dikun, a Iwoŋöddi ŋerot.

⁴¹ A nye mo lupöni i jur lokwekwelen. A ŋutu aliŋan puök ti aliŋan mo rere-moni kak, ama Edom ko Moaba se ko swöt lo jur lo ŋutu ti Amon molu Lwolwöggu ’borik kanyit i konisi.

⁴² a nye mo morojine ŋerot i kulye juron, ama jur lo Ejipeto mo ti rwoddu.

⁴³ A nye mo gwe a duma lo tito nagon a dakap, ko tito nagon a pödo na ’dela kune se ko a duma lo tukwörien liŋ na Ejipeto; a ŋutu ti Libya se ko ti Etiopia mo gwe kanyit i mukok.

⁴⁴ Ama nagon liŋio lo po i swöt lo ’yure ko lo po i swöt lo lobot kulo mo totokujon lepeŋ, a nye mo iti kaŋo ko woran duma i giŋökiŋdyö ko i tukaŋu na ŋutu jore adi sit.

⁴⁵ a nye mo ’beggi kemialan kanyit ti mor i kiden na tor se ko na mere loke lokwekwelen; ama nagon lepeŋ mo ’du ’dur i ’dutet nanyit, a lele mo gwe ’bayin lo parakiŋdya lepeŋ asut.