Daniele 1 - Bibilia Buk na Ŋun nagon koti luŋu a

Daniele ko julin kanyit a todino

¹ I kiŋa tomusala lo gwoŋdi Yeyo-yakim a mor lo Yuda lu, a Nebu-kadanesar mor lo Babela poŋdi i tumba na Yerusalema.

² A MATAT pakiŋdye Yeyoyakim mor lo Yuda ko Nebukadanesar i konisi, se ko kunie toro ’bo nagon a ti kadi na ŋun a lepeŋ joŋgi se i jur lo Sinar i kadi na ŋun lonyit, a tiŋdi kinu toro ’bo i kadi ’delet a ti ŋun lonyit.

³ A mor saŋi Asepenaja duma lo ŋutu kanyit logon a kona a ’baŋin kulo adi ti lepeŋ joŋdi kulye teton ti kotumit na Yisaraele logon a ti ŋwajik ti mor ko ti ŋutu lokukwon.

⁴ Kilo teton ködyö gwon ’bak yuyukesi kase i mugunya; se ködyö gwon a lokwekwelen ko a lotolokok i denesi liŋ, ko a jore ko koŋon ko kuruŋdyo ko deŋdya, ko koti bubulo kita i kadi na mor. Ti Asepenaja todiniki lepeŋat i wuŋo ko i jambu na kutuk na ŋutu ti Kaledea.

⁵ A mor tiŋdi saret adi temba i lor ti lepeŋat tikine koresi ti kinyojin logon a weletan logon mor nyonyo ko binyo nagon nye mamat.

⁶ Ti lepeŋat ködyö todinoni todino kiŋajin musala, a ko kilo kiŋajin aje ’baka, a ti lepeŋat ködyö kitakiŋdye mor. A i kiden na kulo teton gwe a ko Daniele, ko Kanania, ko Misaele, ko Ajaria logon a ti kotumit na Yuda.

⁷ A duma lo ŋutu logon a kona a ’baŋin kulo gwikiŋdye lepeŋat karin; a nye luŋgi Daniele a Beletesasar, ko Kanania a Sadaraka, ko Misaele a Mesaka, ko Ajaria a Abede-nego.

⁸ Ama a Daniele yeyeji kanyit i toili adi nye ti bulo toluddya mugun ko kinyojin ti mor logon a weletan kode binyo nagon lepeŋ mamat; nyena a lepeŋ pipije duma lo ŋutu logon a kona a ’baŋin kulo anyen rukokiŋdyo nye an nye ko toluddya mugun.

⁹ A ŋun tiŋdi Daniele ’busan ko duma lo ŋutu logon a kona a ’baŋin kulo i metet, a nye won konyen ko lepeŋ;

¹⁰ a duma lo kulyani ko Daniele adi, Nan kukujono mor duma lio logon a sarakiŋdya ta kinyojin kasu ko ŋo kasu na mamata lo, a mo ko meddi adi ta a losok Iwolwoŋ teton logon a ber kasu kulo, nyena a ta mo tiŋdi mor i ’dupuŋdyo na kwe nio kaŋo.

¹¹ A kirut Daniele kulyani ko katiyunit logon duma lo ŋutu logon a kona a ’baŋin a wulökin Daniele, ko Kanania, ko Misaele, ko Ajaria lo

¹² adi, Boŋo mori mor yi koliponok kulok ko perok puök; ti yi jakine ’dotilon kana lo nyenyei ko pioŋ na mamata.

¹³ A kirut ti do titimbe komorsikan kaŋ ko komorsikan ti teton logon nyesu kinyojin ti mor logon a weletan, ko ti do konakiŋdye yi koliponok kulok gwoso nagon do a titimbe na.

¹⁴ Nyena a nye yiŋge lepeŋat i kune kulya, a mori lepeŋat ko perok puök.

¹⁵ I mukok na perok puök a lepeŋat metani a lo ’but ko a lopir Iwolwoŋ teton liŋ lo nyesu kinyojin ti mor logon a weletan.

¹⁶ Nyena a katiyunit lo löpuŋge kinyojin kase logon a weletan se ko binyo nagon se ködyö mamat kune, a tiŋdi se ’dotilon.

¹⁷ A Ŋun tiŋdi kulo teton iŋwan deŋdya ko tobodwan i wuresi liŋ ko i koŋon liŋ; a Daniele gwe ko kuruŋdyo na kulya liŋ na kwekweya ko i rudweesi.

¹⁸ A i mukok nagon mor aje sarakiŋdya i joŋdya na lepeŋat kanyit ni na, a duma lo ŋutu logon a kona a ’baŋin lo joŋdi lepeŋat ko Nebukadanesar i komor.

¹⁹ A mor jambi ko lepeŋat, a i kiden na kilu teton liŋ a kulye gwe a ko rye gwoso Daniele. ko Kanania, ko Misaele, ko Ajaria. Nyena a lepeŋat kitakiŋdye mor.

²⁰ A mor iŋge ryo lepeŋat a lo ’but parik daŋin puök Iwolwoŋ ’bunuk liŋ se ko kajwojwoŋok lo gwon kanyit i tumatyan ’bukuluŋ, i kulya lio ti koŋon ko ti kuruŋdyo nagon nye a pipije lepeŋat.

²¹ A Daniele gwolore nyu tojo ko kiŋa togeleŋ lo gwoŋdi Korese a mor lu.