2 Samuele 5 - Bibilia Buk na Ŋun nagon koti luŋu a

Dawidi a ’boroki a mor lo Yisaraele

¹ A kötumitön liŋ ti Yisaraele poŋdi ko Dawidi Keberon ni, a kulyani adi, Meddi, yi a kuyu kulök ko a mugun inot.

² I diŋitan na lwoŋgu nagon Saula lo gwon a mor likaŋ nu, do köju lo nyömbu ŋutu ti Yisaraele i gor ko i nyököddu bot; a MATAT iŋge kulya ko do adi, Do mo lo gwon a kayukunit lo ŋutu kwe Yisaraele, a do mo gwe a kanyömönit lose.

³ Nyena a temejik liŋ ti Yisaraele poŋdi Keberon ko mor ni; a mor Dawidi teteŋdi tomoret nase ko lepeŋat Keberon yu ko MATAT i komor, a se welakiŋdye Dawidi a mor lo Yisaraele.

⁴ A Dawidi gwe ko kiŋajin merya musala nagon nye suluje saŋu nu, a nye iŋge saŋu ko kiŋajin merya iŋwan.

⁵ Nye a gwon a kasaranit lo Yuda Keberon yu ko kiŋajin buryo ko yapala buker, a nye iŋge gwon a kasaranit lo Yisaraele ko Yuda liŋ Yerusalema yu ko kiŋajin merya musala wot musala.

Dawidi a morga pirit nago nagon a Siona

⁶ A mor ko ŋutu kanyit iti Yerusa-lema i mörö ko ŋutu ti Yebusi logon a komonye kak, logon a jambu ko Dawidi adi, Do tine lupe ni asut, ama mo ’do-keno ko ŋodeki de lo riköddu do kaŋo; lepeŋat yeyeju adi Dawidi ti bulö lupe lukata ni asut.

⁷ Kölumbö a Dawidi morgi nu pirit nago nagon a Siona, ŋinu a köji na Dawidi.

⁸ A Dawidi kulyani i ŋilu lor adi, Ko ŋa de rembu ŋutu ti Yebusi, ti nye lupöri lukata na gwoke lo ’boka a wokiet lo pioŋ anyen mörö ko ŋutu ŋodeki ko mo ’dokeno logon nan maman parik kulo. Nyenagon a kulyarikin adi, Mo ’dokeno ko ŋodeki ti lupö i kadi na Ŋun.

⁹ A Dawidi si ’dani i pirit nago na titiyu, a gwije lepeŋ a köji na Dawidi. A nye ’duŋge gorom nagon a mariŋ na lorga köji suluja Milo, ko kunie mariŋan i lukata nanyit.

¹⁰ A Dawidi puputuru ŋerot a iŋgo parik, kogwon MATAT Ŋun lo kurumi gwon ko lepeŋ.

Kiram a ruk adi Dawidi a mor

¹¹ A Kiram mor lo Turo sonyoddi luyökie ko Dawidi yu joŋga kaden logon gwoso tika, se ko kakepak ti kaden ko ka ’dukök logon a ’dukö-kiŋdyö Dawidi kadi.

¹² A Dawidi kuruŋdye adi MATAT aje togwo ’ya nye go a mor lo Yisaraele, ko lepeŋ aje to-duma ’yu tumatyan nanyit kogwon kulya ti ŋutu kanyit Yisaraele.

Ŋwajik ti Dawidi logon a yuŋwe Yerusalema yu

¹³ A Dawidi joŋgi kunie köliŋönök wate a yembi kunie wate köti Yerusalema yu, i mukök na pöri lepeŋ Keberon yu nu; a kulye ŋwajik lulyan ko nawate iŋge yuŋweki Dawidi.

¹⁴ A ŋwajik logon a yuŋweki lepeŋ Yerusalema kulo karin kase gwe a ko Samua, ko Sobaba, ko Natana, ko Solomona,

¹⁵ ko Yibe-kar, ko Elisua, ko Nepeŋe, ko Yapia,

¹⁶ ko Elisama, ko Eliyada, ko Elipelet.

Dawidi a te ’ya ŋutu ti Pelesete

¹⁷ A na yiŋge ŋutu ti Pelesete adi Dawidi aje welaki a mor lo Yisaraele nu, a ŋutu liŋ ti Pelesete iti i ga ’yu na Dawidi, ama a Dawidi ko yiŋge sona a iti i pirit ’danaet nago.

¹⁸ A ŋutu ti Pelesete iŋge po a muluje ŋinu pirit na ’dir na Repayim.

¹⁹ A Dawidi piyun­dye MATAT adi, Nan ŋona bubulö tu i mörö ko ŋutu ti Pelesete le? Do ŋona de wuwukin lepeŋat köyö i könisi? A MATAT waddi Dawidi adi, Iŋkoi, iti; kogwon nan ’diri de wuwukin ŋutu ti Pelesete konut i könisi.

²⁰ A Dawidi ’dure Bala-perasim, a nye te ’yi lepeŋat nyu, a nye kulyani adi, MATAT a nakiŋdya nan kiko i kiden na merok kwe gwoso yala lo duyömbu tudöm na kare. Nyenagon a karin ti ŋinu pirit luŋuni a Bala-perasim.

²¹ A ŋutu ti Pelesete kölökiŋdye nyömuejin kase nyu, a Dawidi ko ŋutu kanyit kulo ’dokoddi se kaŋo.

²² A ŋutu ti Pelesete köti poŋdi i mörö, a muluje ŋinu pirit na ’dir na Repayim.

²³ A Dawidi ko piyuŋdye MATAT, a nye waddi lepeŋ adi, Do ti tu; ka ’de loraddi lepeŋat a lo ki ’dio, ko labaki kase loki i swöt lo kaden logon a baka.

²⁴ A ko do a yio wuggö na kusik ti kaden baka gwoso wöröji na kamörök, a ti do kirut nyoŋgi ’de ’de; kogwon kweja adi MATAT aje tu konut Ŋerot i rembu na teŋon ti Pelesete.

²⁵ A Dawidi koŋdi gwoso nagon MATAT aje sarakiŋdye lepeŋ nu, a nye rembi ŋutu ti Pelesete suluja Geba tojo ko Gejer.