2 Samuele 12 - Bibilia Buk na Ŋun nagon koti luŋu a

Natana a yuyuggö Dawidi

¹ A MATAT sonyoddi Natana ko Dawidi yu. A Natana ’duröki kanyit yu, a kulyani ko lepeŋ adi. Kulye ŋutu kata murek i nene köji, lele lose a kwörinit a lele gwe a lomeri.

² ŋuto kwörinit lo gwon ko yidin jore parik ko kisuk koti;

³ ama ŋuto lomeri lo gwon kana, ama ka ’de lepeŋ gwon ko kilolor na ’dit geleŋ tuŋ nagon nye aje gwörun. A lepeŋ wowoji nye, a ŋina kilolor ’duruŋdye ki kanyit i könin se ko ŋwajik ti lu ŋuto i pirit na geleŋ, a nye yeŋe parundya kinyo nanyit na ’dit na, a möji kanyit i matet a dotoni kanyit i pele, a nye gwe gwoso ŋuro nanyit.

⁴ A kirut kömutöt lo ’dure ko ŋilu kwörinit yu, a lepeŋ tine ’dekan ’dumuŋdya nene na yidin kode na kisuk kanyit, anyen derakin lo kömutöt lo jölwe kanyit ni lo. Ama a lepeŋ kölum joŋgi kilolor na lo ŋuto lomeri lo, a derakiŋdye ŋuto logon a po kanyit ni lo.

⁵ A woran na Dawidi yuköki parik ko lu ŋuto; a lepeŋ kulyani ko Natana adi, ’Diri gwak, gwoso na gwoŋdi MATAT na, ŋuto logon a koŋdya ŋina ŋo lo jojo tatua!

⁶ Ti nye agu kodyö rope roŋ ŋina kilolor daŋin iŋwan, kogwon nye a koŋdya ŋina ŋo, köti kogwon nye a kowon konyen ko lepeŋ.

⁷ A Natana kulyani ko Dawidi adi, Ŋuto lo a do. MATAT Ŋun lo Yisaraele lo kulya sona adi, Nan a welakin do a mor lo Yisaraele, a nan aje lwökuŋdyö do kaŋo i könin lo Saula;

⁸ a nan tiŋdi do kadi na duma ilot, ko wate ti duma ilot, anyen do lo meddya se, a nan tiŋdi do kötumit na Yisaraele ko na Yuda; a ko kine kulya ködyö ti tema-kiŋdya, nan ködyö ’ya ’yalakin do lwölwöŋ kine.

⁹ Ko nyo nagon do aje lauŋdya kulyaesi ti MATAT, i koŋdya na ŋo naron kanyit i komor? Do aje rembu Uriya ŋuto lo Kiti ko gor, a joŋgi narakwan nanyit anyen gwon a narakwan inot, a do aje tatuja lepeŋ ko gor na ŋutu ti Amon.

¹⁰ Nyenagon a gor mo tine wuddya konut i kötumit asut; kogwon do aje lauŋdya nan i joŋga na narakwan na Uriya ŋuto lo Kiti na anyen gwon a narakwan inot.

¹¹ MATAT lo kulya sona adi, Mete, nan mo toŋiju ŋo naron konut i kötumit lukata; a nan mo ’dumaddi wate kunok konut i komor, a mo tiŋdi se ko marate ilot, a nye mo dotori wate kunök i tuparan.

¹² Kogwon do a koŋdya kine kulya a lwön; ama nan de koŋdya ŋina ŋo köke i tuparan ko Yisaraele liŋ i komor.

¹³ A Dawidi kulyani ko Natana adi, Nan aje toron-dya MATAT. A Natana kulyani ko Dawidi adi, MATAT köti aje joŋga toron inot kaŋo; a do de tine twan.

¹⁴ Nyenagon do aje lauŋdya MATAT asut kogwon do a koŋdya ŋina ŋo; Ŋilo ŋuro logon a yuŋweki do ŋilo mo twatwan.

¹⁵ A kirut Natana iti kanyit mede. Nyena a MATAT gwuddye lupudi logon narakwan na Uriya a yuŋwekin Dawidi lo ko-twanti, a nye gilö ni ŋilo.

¹⁶ Nyenagon a Dawidi ga ’yi ŋun parik kogwon ŋilo lupudi; a nye miŋdye miŋdya a lupöni kadi, a pirikine kak i ŋutu i tukwaje liŋ.

¹⁷ A temejik ti mede nanyit kulo gwo ’de ko lepeŋ nyona, anyen ködyö ’biluŋdya lepeŋ ki i ŋutu, ama lepeŋ ti ’dekan, ma ’di i nyesu na kinyo ko se i pirit na geleŋ.

¹⁸ A i lor toburyo lo gilö nanyit lu, a ŋilo lupudi twane twan. A köliŋönök ti Dawidi kulo kujönöni kujönö takiŋdya lepeŋ adi lupudi lo aje twan; kogwon lepeŋat a jambu adi, Mete, yi a jambu ko lepeŋ nagon lo lupudi nyuŋ gwon jörun nu, ama lepeŋ ti ’bön yiŋga yi; ada lolor nagon yi tukökiŋdyö lepeŋ adi lupudi lo aje twan? Kode lepeŋ de bubulö konakiŋdya mugun ŋo naron.

¹⁹ Ama a Dawidi ko meddi adi köliŋönök kanyit gwon i mora ko ’borik, a Dawidi kuruŋdye adi lupudi lo aje twan; a Dawidi pipije köliŋönök kanyit kulo adi, ŋuro lo aje twan? A se waddi adi, Ee, lepeŋ aje twan.

²⁰ A kirut Dawidi ŋine ki i ŋutu a kwöni kwo, a we ’yi mugun nanyit ko welet, a löpuŋge boŋgwat kanyit; a nye lupöni i kadi na MATAT, a kwakwaddi kwa-kwaddu. A lepeŋ kirut iti kanyit mede, a nye ko luŋgi kinyo, a se jakiŋdye lepeŋ a nye nyesi nyesu.

²¹ A köliŋönök kanyit kulo pipije lepeŋ adi, Ŋina ŋo a nyo nagon do a kon? Do a miŋdya ko a gwien lo lupudi nagon nye nyuŋ gwon jörun nu; a lupudi lo ko twane a do ŋine ŋien a nyesi nyesu.

²² a lepeŋ waddi adi, Nan a miŋdya ko a gwien nagon lupudi lo nyuŋ gwon jörun nu; kogwon nan a kulya adi, Ŋa logon deden kode MATAT ŋona de wowon konyen ko nan, anyen lupudi lo ködyö ruru?

²³ Ama soŋinana lepeŋ aje twan; kwe a nyo nagon nan nyuŋ mimiŋdya? Nan ŋona bubulö topiuŋdya lepeŋ ki koti le? Nan mo tutu ko lepeŋ yu, ama nye mo tine yitwe bot köyö ni.

²⁴ A Dawidi kirut suŋge Beteseba narakwan nanyit, a iti kanyit yu, a dotoni ko lepeŋ; a nye yuŋuŋdye ŋuro lulalet, a nye gweŋ lepeŋ a Solomona. A MATAT nyaŋi lo lupudi,

²⁵ a sunyukiŋdye nebi Natana kutuk; nyena a nye gweŋ karin kanyit a Yedidia, kogwon kulya ti MATAT.

Dawidi a morga köji na Raba

²⁶ A Yöaba gwe i mörö ko Raba na ŋutu ti Amon nagon a köji na mor, a morgi lepeŋ.

²⁷ A Yöaba sonyoddi luyökie ko Dawidi yu kulya adi, Nan aje mörori Raba, nan aje riŋun köji na gwon ko jor na.

²⁸ Nyena momori kilo ŋutu liŋ i pirit na geleŋ, ko möröni ko nu köji, anyen do morga lepeŋ; an nan ko morga nu köji, an ko luŋu ko karin kwe.

²⁹ A Dawidi momori ŋutu liŋ i pirit na geleŋ, a iti Raba i mörö ko lepeŋ a morgi nye.

³⁰ A lepeŋ ’dumaddi Iŋguya ko Milikom i kwe; a temet nanyit gwe a talenta geleŋ na dakap, a i lukata nanyit gwe a ŋurupit nakwe-kwelen na gworo go; a Iŋguya sukine ko Dawidi i kwe. A lepeŋ joŋgi ryakat ti nu köji jore parik.

³¹ A nye joŋgi kaŋo ŋutu logon si ’da nyu, a ri ’dikiŋdye se i kita ko sereserejin, ko ’bokesi nagon a witiot, ko tuluö logon a witiöt, a tiŋdi lepeŋat i kita i piritön ’duŋesi ti tupön. A nye konakiŋdye köjinö liŋ ti ŋutu ti Amon sona. A Dawidi ko ŋutu kanyit liŋ yitöni Yerusalema.