2 Samuele 10 - Bibilia Buk na Ŋun nagon koti luŋu a

Ŋutu ti Amon ko ti Suria a tela

¹ A ko gwe sona i mukök na kine kulya, a mor lo ŋutu ti Amon twane twan, a ŋuro lonyit Kanun lo ruddye pirit nanyit.

² A Dawidi kulyani adi, Nan de kökonakin Kanun ŋuro lo Nakasa ’bura, gwoso na konakiŋdye monye lonyit nan nu. A Dawidi sonyoddi köliŋönök kanyit i sugga na lepeŋ i kulya ti monye lonyit. A köliŋönök ti Dawidi kulo ’dure i jur lo ŋutu ti Amon.

³ Ama a kimak ti ŋutu ti Amon kulyani ko Kanun duma lose adi, Do ’diri yeyeju adi Dawidi aje bu ’ya munyi i sunyukiŋdyö na do kilo kasukak? Ti gwon adi Dawidi sunyuŋdyö kilo köliŋönök kanyit konut ni anyen ko wöŋu köji ’bukuluŋ, i wiŋa na lepeŋ, ko i te ’ya na lepeŋ le?

⁴ A Kanun ’dumuŋdye köliŋönök ti Dawidi kulo, a ’bariŋdi kupir kase ti nyekema a swötön swötön, a ’duŋöddi boŋgwat kase kaŋo suluja i mokosi tojo i mukökö, a kölöddi se.

⁵ A kine kulya ko jamakine Dawidi, a nye soŋdi ŋutu i rum ko se, kogwon kilu ŋutu gwon ko yu na kusik a duma parik. A mor kulyani adi, Mönuŋdye ta Yeriko tojo ko kupir kasu ti nyekema a nyöggu pun, a ta kirut bulöni bulö yitwe.

⁶ A ŋutu ti Amon ko meddi adi Dawidi soŋinana mane man se, a ŋutu ti Amon sonyoddi ŋutu i gwöruŋdyo na ŋutu kamörök ti Suria logon gwon Bete-rekoba ko Soba. Kilo a kamörök aliŋan merya murek lo wörö ko mok, mora ko ŋutu aliŋ geleŋ ti mor lo Maka, ko ŋutu aliŋan puök wot murek ti Tobo.

⁷ A Dawidi ko yiŋge kine kulya, a lepeŋ sonyoddi Yöaba ko teŋ liŋ na ŋutu walan.

⁸ A ŋutu ti Amon lupene kaŋo, a tetenakiŋdye ’börik i mörö i lupet na kötumit duma na köji, ama a ŋutu ti Suria lo gwon Soba ko Rekoba, ko ŋutu ti Tobo ko ti Maka kulo lo möŋdi ka ’de i jur.

⁹ A Yöaba ko meddi adi gor lo juŋ a nye i komor ko i ki ’diŋ liŋ, a nye wuluŋdye kulye ŋutu lo nyumwe ti Yisaraele, a tetenakiŋdye se i mörö ko ŋutu ti Suria;

¹⁰ A nye tiŋdi yodom na ŋutu kanyit ko Abisai luŋaser lonyit i könin, a nye tetenakiŋdye lepeŋat i mörö ko ŋutu ti Amon.

¹¹ A nye kulyani adi, Ko ŋutu ti Suria gwe a iŋgo parik köyö, a do de lo parakiŋdye nan; ama ko ŋutu ti Amon a iŋgo parik konut a nan de lo poŋdi i parakiŋdya na do.

¹² Gwe do a iŋgo, ko ti yi kitani ta gwoso ŋutu lunsak gwak i kulya ti ŋutu kaŋ, köti kogwon köjinö ti Ŋun likaŋ; ko ti MATAT koŋdi ŋo nagon nye a met a na ’but kanyit na.

¹³ Nyena a Yöaba ko ŋutu kanyit kulo ŋun nyona i mörö ko ŋutu ti Suria, a se ni, wöki wökön kanyit i komor.

¹⁴ A ŋutu ti Amon ko meddi adi ŋutu ti Suria aje wökön nu, a se köti wöki wökön ko Abisai i komor, a lupöni köji. A kirut Yöaba yitwene bot i mörö ko ŋutu ti Amon, a poŋdi Yerusalema.

¹⁵ Ama a ŋutu ti Suria ko meddi adi ŋutu ti Yisaraele aje te ’ya se nu, a lepeŋat momori ’börik i pirit na geleŋ.

¹⁶ A Adadejer sonyoddi ŋutu i luŋgu na ŋutu ti Suria lo gwon i nu pele na kare Perat kulu; a se ’dure Kelam, a Sobak duma lo teŋon ti kamörök ti Adadejer lo gwe a kanyömönit lose.

¹⁷ A kine kulya ko jamakine Dawidi, a lepeŋ momori ŋutu liŋ ti Yisaraele i pirit na geleŋ, a laŋaddi i nu pele na Yardene, a ’dure Kelam. A ŋutu ti Suria tetenakiŋdye ’börik i mörö ko Dawidi, a se möröni mörö ko lepeŋ.

¹⁸ A ŋutu ti Suria wöki wökön ko Yisaraele i komor; a Dawidi tatuje ŋutu ti Suria logon woro ko arabiajin miajin buryo, ko kajoŋak ti kusanjin aliŋan merya iŋwan, a böŋoddi Sobak duma lo teŋon ti kamörök kase, a nye twane twan nyu.

¹⁹ A moran liŋ logon a köliŋönök ti Adadejer kulo ko meddi adi ŋutu ti Yisaraele aje te ’ya se nu, a se koŋdi töjulin ko ŋutu ti Yisaraele a gwe a ’dupi kase. Nyena a ŋutu ti Suria kujönöni kujonö i parakiŋdya na ŋutu ti Amon koti.