2 Samuele 1 - Bibilia Buk na Ŋun nagon koti luŋu a

Dawidi a denun twan na Saula

¹ A ko gwe sona i mukök na twan na Saula, i diŋit nagon Dawidi aje yitwe i tatuja na ŋutu ti Amalek nu, a Dawidi mönuŋdye perok murek Sikelaga yu,

² a gwe sona i lor tomusala lonyit, mete, a lele ŋuto lo poŋdi i mera na Saula ko boŋgwat kanyit a kekerenya, a kujoŋ gwe kanyit i kwe. A nye ko ’dure ko Dawidi ni, a ’dorone kak a twoji twoju.

³ A Dawidi pipije lepeŋ adi, Do po ya? A lepeŋ waddi adi, Nan wokun i mera na Yisaraele.

⁴ A Dawidi kulyani ko lepeŋ adi, Kulya kunu gwon ada? Taki nan boŋo. A lepeŋ waddi adi, Ŋutu aje wokun i moro yu, a kulye ŋutu jore koti iŋge reremo ko a tatua; a ko Saula ko Yonatana koti iŋge tatua.

⁵ A kirut Dawidi pipije titinti logon nyonyoko-kiŋdyö lepeŋ lo adi, Do den ada adi Saula se ko Yonatana ŋuro lonyit aje tatua?

⁶ A titinti lo nyonyokokinoyo lepeŋ lo waddi adi, Kine kulya a ’bunyokin nan i mere Giliboa yu; a nan meddi Saula a tokokiŋdyo mugun i gor nanyit na; mete, a kamorok lo woro ko arabiajin lo jijiko ko lo woro ko kusanjin kulo gwe nyona ko lepeŋ.

⁷ A lepeŋ ko boŋaddi kanyit i ki ’diŋ, a meddi nan, a luŋgi nan. A nan waddi adi, Nan malo.

⁸ A nye pipije adi, Do a ŋa? A nan waddi adi, Nan a ŋuto lo Amalek.

⁹ A lepeŋ kulyani ko nan adi, Boŋo gwo ’de ni koyo nyona, ko tatuje nan; kogwon nan aje dara, ama nan nyuŋ gwon jorun.

¹⁰ Nyena a nan gwo ’de gwo ’dan kanyit nyona, a nan tatuje lepeŋ, kogwon nan a den ’diri adi nye ti bulo ru i mukök na ’doro nanyit; a nan ’dumuŋdye Iŋguya logon gwon kanyit i kwe lo, a nan rusuŋdye raratat na gwon kanyit i könin na kaŋo, a nan iŋge joŋdya se konut ni duma lio.

¹¹ A Dawidi morgi boŋgwat kanyit kune a kekereŋdi se; a kilu ŋutu liŋ lo gwon ko lepeŋ kulu koti kekereŋdi boŋgwat kase;

¹² a se delyani delya a gwine gwien, a tine nyesu kinyo tojo ko sömukö i kulya ti Saula ko Yonatana ŋuro lonyit, ko i kulya ti ŋutu ti MATAT ko kotumit na Yisaraele logon aje tatua i gor kulo.

¹³ A Dawidi pipije titinti lo nyonyokokiŋdyö lepeŋ lo adi, Do po ya? A nye nyobbi adi, Nan a ŋuro lo lwakatyo, ŋuto lo Amalek.

¹⁴ A Dawidi pipije lepeŋ adi, Ada lolor nagon do ti kujönö ’bulukiŋdyo könin ilot i tatuja na ŋuto logon MATAT a welakin a mor lo?

¹⁵ A kirut Dawidi luŋgi lele titinti lonyit a sarakiŋdye lepeŋ adi, Iti ko tatune lepeŋ. A nye rembi lu ŋuto, a lepeŋ twane twan.

¹⁶ A Dawidi kulyani ko ŋuto lo Amalek lo adi, Ti rima kunök gwe konut i kwe; kogwon kutuk inot na pökiŋdyö do adi do lo tatuja ŋuto logon MATAT a welakin a mor lo.

Dawidi a delya Saula ko Yonatana

¹⁷ A Dawidi delyani Saula se ko Ŋuro lonyit Yonatana ko ŋilo köli lo twan,

¹⁸ a nye kulyani adi ti ŋilo köli todinikine ŋutu ti Yuda; mete, lepeŋ lo aje wuröki i Buk na Yaser. A nye yo ’yi adi,

¹⁹ Wöidiö jur lo Yisaraele, mor ilot aje tatua i ko ’dulan ti merya! Wö, ŋutu ti riŋitön aje reremo kak!

²⁰ An ta ko jam ta kine kulya Gata yu, köti ko tokuörö ta kine kulya i kikolin ti Asekelon; an ŋwajik wate ti Pelesete ko lyöpön, an ŋwajik wate ti ŋutu logon a ko tawero kulo ko nyola.

²¹ Ta merya ti Giliboa, ti lilima kode kudu ti gwe ti ’don kasu, iŋkoi ti gwe ti lilimba i ko ’dulan ki. Kogwon ’bukwö ti ŋutu ti riŋitön aje korö nyu, ’buku na Saula a ko wela ko welet.

²² Daŋ na Yonatana a ko ’yako ’yu, koti wale lo Saula a ko löpukwe kana, ’bak rima ti ŋutu lo tatua, ko i welet na ŋutu ti riŋitön.

²³ Saula ko Yonatana a lo nyanyara ko a lokwekwelen! Se a ko kora i gwon nase jörun ko i twan nase; se a lo wulekak lwölwöŋ yukuö, se a iŋgo lwölwoŋ kömiruöt.

²⁴ Ta ŋwajik wate ti Yisaraele, gwine ta Saula, logon a tojubbu ta ko boŋgwat nator nakwekwelen, ko a tokweleŋdu boŋgwat kasu ko minyojin nagon a dakap lo.

²⁵ Wöidiö, ŋutu ti riŋitön aje reremo kak i kiden na gor! Yonatana aje tatua i ko ’dulan ti merya.

²⁶ Luŋaser lio Yonatana, nan a delya do parik; do a lo ’but parik köyö; nyaŋu inot na nan ’diri a ŋo sörit, a lwöŋ ma ’di nyaŋu na ŋuto nakwan.

²⁷ Wöidiö, ŋutu ti riŋitön aje reremo kak, a tito möriesi ti gor aje körö!