2 Petero 3 - Bibilia Buk na Ŋun nagon koti luŋu a

Matat a milyeju adi nye molu yiyitwe

¹ Julin kwe lo nyanyara, na soŋinana a leta nio tomurek na wurokin nan ta na. I kine letajin murek nan aje wuŋo i toyiyikiŋdyo na ta yeyeesi na rigwo,

² anyen ta kodyö yeyeju kulya na jam nebijin loke köju kunu, ko anyen yeyeju saresi ti Matat likaŋ Kalwokonit, logon luyökie lo sunyuki ta kilo lo joŋdya.

³ A kokwe dene ta den adi i perok ’dutesi kakwekweniak logon koŋdya gwoso i ’dekesi kase kulo mo popo, a se mo kwekwenine ko ta.

⁴ A mo ’dö ’döji adi, Nye a milyeju adi nye molu yiyitwe. Ko nyo nye ti po? Kogwon suluja i lor logon merenyejin kaŋ a twatwa lu, ŋo liŋ yeŋon gwoso na gwoŋdi se i suluwa na gweya na kak nu.

⁵ Kulo ŋutu ti ’bön yiyiuŋdyö adi koju ’beron Ŋun a kulya, a ’diko se ko kak gweyene kaŋo i kiden na pioŋ ko i pioŋ kata.

⁶ A nye köti kulyani kulya, a kak na ŋinu diŋit muluani mulua ko pioŋ a iŋge koro.

⁷ Ŋilo kulyaet lo geleŋ lo a ’de ’ya ’diko ko kak anyen möŋdu ’yura ko kimaŋ i lor ’duŋet lo putet na tukarari ŋutu logon ti twoju Ŋun kilo.

⁸ Julin kwe lo nyanyara, ta ködyö ti böŋö na ŋo geleŋ adi lor geleŋ gwon ko Matat likaŋ gwoso kiŋajin aliŋ geleŋ. köti kiŋajin aliŋ geleŋ gwon gwoso lor geleŋ.

⁹ Matat ti karakin i kulya na ruk lepeŋ kune, gwoso na yeyeŋ kulye ŋutu adi lepeŋ a karakin na, ama nye a yatakin ta parik a tine ’dekan adi ti lele ŋuto gwe ti körö, ama lepeŋ ’de ’dekan ŋutu liŋ ködyö Iöpuggö töilyet.

¹⁰ Ama Lor lo Matat mo popo gwoso kolanit, a ’diko mo likiörö likiörö adi wur, a toro ’bo kanyit mo lusököni lusökö ko yulöŋ na kimaŋ, a na kak se ko ŋo na gwon i lukata nanyit kune liŋ mo ’yurani ’yura.

¹¹ A ko kine ŋo liŋ mo lusökö sona, ta ködyö gwon a kulon ŋutu i gwiliŋisi kasu? Ta ködyö gwolor a ŋutu loke lo twöju ŋun,

¹² na momordi ta po na Lor lo Ŋun ko na rurumbi ta ’durökin na ŋilu lor nu. Ŋilu lor mo tin ’diko i lilikara ko kimaŋ, a toro ’bo kanyit mo lulusokoni lulusoko ko yulor na kimaŋ.

¹³ Ama yi möŋdu ’diko ludukötyo se ko kak ludukötyo nagon löti lo rigwo si ’da kata, gwoso na rukökiŋdye Ŋun yi na.

¹⁴ Nyenagon julin kwe lo nyanyara, na mömöŋdi ta kine ŋo i pokin nu, tisakiŋdye ta ’börik anyen lepeŋ böŋo ryeju ta gwon taliŋ ’bak ’yotet kode korit kanyit i komor.

¹⁵ Yeyene ta yeye adi yatakiŋdya na Matat likaŋ tiŋdu yi kwake anyen yi lwölwökö, gwoso nagon Paulo luŋaser likaŋ lo nyanyara a wurokiŋdye ta i koŋon nagon aje tiki lepeŋ na.

¹⁶ Lepeŋ a wuŋö kine kulya i letajin kanyit liŋ. Kunie kulya kata kanyit i letajin nagon a nago i kurwe, a ŋutu lu ’böŋ ko a lokolokak tukwölöŋgi tokoret na kine kulya gwoso na tukwölöŋgi se kunie kulya ti Ŋun na wurö kune. Nyena lepeŋat jakiŋdya ’börik körit.

¹⁷ Nyenagon ta julin kwe lo nyanyara, ta aje den kine kulya a kokwe. Nyena kun i tar ta, an ta lulukaji ko giresi ti ŋutu logon ti ’debba saresi kilo, anyen ta gwon ti ’dororo kaŋo i gwo ’dan nasu go.

¹⁸ Ama yeŋe ta i ’duŋo i ’busan na nyaŋu ko i deŋdya na Matat likaŋ Kalwokonit Yesu Kristo. Ti bulet gwe ko lepeŋ soŋinana ko ŋupi ŋupi. Amin.