2 Petero 2 - Bibilia Buk na Ŋun nagon koti luŋu a

Katodinok ’buronok

¹ Ama nebijin ’buronok koti köju a pukun ko ŋutu ti Yisaraele kiden, gwoso nagon katodinok ’buronok mo gwon kasu kiden na. Kilo katodinok ’buronok mo sukiŋdyo ŋo nagon a korisi i todiŋdyo nase, ma ’di rerenya Matat logon aje gworuŋdyö se lo, a mo jakiŋdye ’borik korit nagon ’dukin ’de ’de kijek.

² A ŋutu jore mo kepoddi lepepat i gwiliŋit lose lo yu na kwe lo kon se aka lo, a kiko lo to ’diri mo jamani arabat kogwon po na kon se kune.

³ A se mo lulukuŋdye gurut kasu ko todinesi ’buröno kogwon goma nase. Ama putet logon koju ’beron a ’duŋoki i lepeŋat lo momöŋdu lepeŋat. Katukaranit lose ti doto.

⁴ Ŋun a ko kölökin malaikajin logon aje toroŋdya kulo, ama a gubaddi se kak yu i pirit riŋet, a ’de ’deleji lepeŋat i mudwe a rereka, momordu lor ’dupet lo putet.

⁵ A nye gwe a ko kolokin kak koju ’beron nu, na joŋdi nye bar i kak na ŋutu logon ti twoju Ŋun kilo, ama a nye lwöggi Noa katokuonit lo loti lo rigwo se ko kulye ŋutu buryo.

⁶ A Ŋun iŋge ’dupokin köjino ti Sodoma ko Gomora i koro asut, a nyökuŋdye se kak a kurök, a tiŋdi se a miret i ŋutu logon ti twoju Ŋun logon mo po kase i mukok kilo.

⁷ Ama a nye lwöggi Loto logon a ŋuto lo rigwo, logon dedelya parik ko konesi ti yu na kwe na kon ŋutu lorok aka kune.

⁸ Kogwon ŋilo ŋuto lo rigwo si ’da ko lepeŋat i pirit na geleŋ, lepeŋ memet ko yiyiŋ po na kona kune.

⁹ Konesi kase nagon koŋu saret kune totomi toili lonyit lo rigwo perok liŋ.Matat deden ko nye lwokun ŋutu lo twoju nye kulo ada kase i möriesi. Lepeŋ deden ’de ’ya ŋutu lorok i pirit ririŋet tojo ko lor ’dupet lo putet,

¹⁰ kegga se logon wöwörö i ’dekesi kase narok ti na mugun, logon a kalaak ti ’bon sara kilo. Kilo katodinok ’buronok a kipajin, koŋdya gwoso na ’deggi se na, a tine kujono momoröju teŋ na malaikajin lo bubula.

¹¹ Ama malaikajin logon lwölwöŋ kilo katodinok ’buronök i riŋit ko i kido kulo a ko joŋga se i putet ko Matat i komor ko momoröju.

¹² Kilo ŋutu gwon gwoso kijakwa nagon ti den kulya, nagon kita gwoso i ’dekesi kase, nagon a yuŋwe anyen loloka ko tatatua. Kilo ŋutu momoröju po nagon se ti kurun kune, a se mo tatuani tatua gwoso kijakwa.

¹³ Lepeŋat ropaki poŋga kogwon se a topoŋga kulye ŋutu. Lepeŋat nyanyar to ’betan ko yawa i tuparan. Lepeŋat gwon gwoso lut nagon ’yoddya ta a iŋge kor ta na nyesi se ko ta i pirit na geleŋ na, a se nyare nyar mumulugga ta.

¹⁴ Konyen kase a jore ko lubbo a tine bulo kö ’yu toron. Lepeŋat togiraddu ŋutu lomunyak i koŋdya na toron. Toilyet kase a diniki goma gurut, a Ŋun iŋge lom lepeŋat.

¹⁵ Lepeŋat aje ko ’yu kiko lo rigwo a iŋge giran, a kepoddi kiko lo Balam ŋuro lo Beor logon nyanyar ropaki i koŋdya na toron,

¹⁶ ama a nye iŋge yuyuko kogwon toron nanyit, kogwon kaine nagon ti jambu na jambi jambu ko gworo lo ŋuto, a teŋgi pilu nebi i koŋdya na po na mamala.

¹⁷ Kilo ŋutu gwon gwoso kidiya logon ’bak pioŋ, lepeŋat gwon gwoso luruöt logon wuköji ko köbuŋot duma. Pirit nagon a mudwe adi ’dii a wuloki lepeŋat.

¹⁸ Lepeŋat jajambu kulyaesi lobot logon a po kana i lulukuŋdya na ŋutu logon pete rwoddu i gwiliŋit lo tupaganon kilo, a teteŋdi ’dekesi narok ti mugun se ko konesi ti yu na kwe a meyi.

¹⁹ A se rukökiŋdye lepeŋat i gwon a lui, ama se ko ’borik a ’dupi ti ŋo na koŋu ŋutu, kogwon ŋuto a ’dupiet lo ŋo nagon a te ’ya lepeŋ na.

²⁰ Kogwon ko ŋutu aje rwoddu i tolutesi ti na kak kogwon deŋdya nase na Matat likaŋ Kalwokonit Yesu Kristo, ama ko kine tolutesi koti aje mok se, a iŋge te se, a kulya kase worani a narok bia parik Iwolwöŋ ti kokwe kunu.

²¹ Kodyö a na ’but kase ko se kwoŋ a ko den kiko lo löti lo rigwo, lwölwöŋ nagon se aje den lo kiko i ko ’yu na saresi loke logon aje tiki se kulo a kukutorö bot.

²² Ŋo na jama i tolupet kune a pokin kase ki a gwak adi, ’Dioŋ a yito kanyit i jaat, köti adi, Wuri nagon aje kwo na koti a yitö i gwugwuluŋgö na mugun i wo ’do ’do.