1 Yoane 3 - Bibilia Buk na Ŋun nagon koti luŋu aŊwajik ti Ŋun 1 Meddi ta nyaŋu duma gwanan nagon Ŋun Monye aje nyaŋi yi na na luŋuri yi a ŋwajik kanyit na! Iŋkoi, yi ’diri a ŋwajik kanyit. Kwe nagon ŋutu ti na kak ti den yi na, kogwon se a ko den lepeŋ. 2 Ta lo nyanyara kilo, yi sopinana gwe a ŋwajik ti Ŋun, ama a ko nyuŋ kweya koyi molu gwon ada, ama yi deden adi ko nye a kweya a yi mo gwe gwoso lepeŋ, kogwon yi mo memet lepeŋ gwoso na gwoŋdi nye na. 3 Nyena ŋutu liŋ logon yeŋdu Kristo kilo ködyo toke ’ya ’borik gwoso na gwoŋdi nye a loke na. 4 Ŋutu liŋ logon koŋdya toronjin kilo ’beleŋgu saret; iŋkoi, toron ’diri a ’beleŋgu na saret. 5 Ta a den adi, lepeŋ a pukun anyen lepeŋ böŋo joŋga toronjin ti ŋutu kaŋo, a toron gwe ’bayin ko lepeŋ. 6 Ŋuto logon gwolor ko lepeŋ i mugun lo ti toroŋdya; ŋuto logon a toroŋdya lo a ko met lepeŋ koti a ko den lepeŋ. 7 Ŋwajik kwe, ti lele ŋuto gwe ti togiŋa ta. Nye logon yeŋon koŋdya ’bura lo a lo rigwo, gwoso na gwoŋdi Kristo a lo rigwo na. 8 Ŋuto logon yeŋon a kakonanit lo toronjin, lepeŋ a ŋuro lo ŋilo kaŋŋonit; kogwon ŋilo kaŋ bonit a katoronyanit suluja i suluwa na Ŋo liŋ. Kwe nagon Ŋuro lo Ŋun a pukun na anyen köŋu konesi ti ŋilo kaŋŋonit. 9 Ŋuto logon Ŋun lo yupuŋdyö lo ti yeŋ po koŋdya toron, kogwon gwesin ti Ŋun gwon kanyit i mugun, a lepeŋ tine bulo yeŋon koŋdya toron kogwon lepeŋ a ŋuro lo Ŋun. 10 Ŋwajik ti Ŋun se ko ŋwajik ti ŋilo kaŋöönit dena i ŋilo kiko adi, ŋutu logon ti koŋdya ’bura kode ti nyar luŋasirik kilo ti gwon a ti Ŋun. Yi kodyo tutunyar ko ’borik 11 ŋilo a lore logon ta aje yiŋ i suluwa lo, adi yi kodyo tutunyar ko ’börik; 12 ti gwon gwoso Kaina logon a lo Ŋilo Loron, a tatuje luŋaser lonyit. Ko nyo nagon nye tatatu lepeŋ? Nye tatuja lepeŋ kogwon konesi kanyit lepeŋ a narok, a ti luŋaser lonyit gwe a na ’but. 13 Ta luŋasirik, ko soŋu ta ko ŋutu ti na kak maman ta. 14 Yi a den adi yi aje lwöpöddu kaŋo i twan tojo i ru, kogwon yi nyanyar luŋasirik. Nye logon ti nyaŋu lo lepeŋ yeŋon i twan. 15 Ko lele nuto maman luŋaser, lepeŋ a katatuanit. Ta a den adi ru na yeŋ nyin ti yeŋon ko katatuanit i mugun. 16 Ko ŋina kwe yi aje den ko nyaŋu a nyo, adi Kristo a paju ru nanyit kogwon kulya kaŋ. Nyena ti yi agu kodyo paji ru nikaŋ kogwon kulya ti luŋasirik. 17 Ama ko lele ŋuto gwon ko toro ’bo ti na kak a meddi luŋaser logon ko yöŋö na ŋo, a togo ’yi toili lonyit i ’dogga na lepeŋ, a nyaŋu na Ŋun kirut gwe a nyo kanyit i mugun? 18 Ŋwajik kwe, ti yi gwe ti nyaŋu ko kulyaesi kode ko kutusen kana, ama ti yi nyaŋi ko konesi ko kulya ’diri. Yi a purwat ko Ŋun i komor 19 Nyena ko ŋina kwe a yi deŋdi adi yi gwon i kulya ti to ’diri, a yi suŋge toilyet kaŋ kanyit i komor 20 i liŋ nagon toilyet kaŋ lo tuggo adi yi a koŋdya arabat, kogwon Ŋun a duma lwölwoŋ toilyet kaŋ ko deden po liŋ. 21 Ta lo nyanyara kilo, ko toilyet kaŋ a ko tuggo adi yi a koŋdya arabat, a yi gwe a purwat ko Ŋun i komor; 22 a yi wuji po nagon yi a piyun kanyit kune, kogwon yi ’de ’dep saresi kanyit, a koŋdi po nagon tulyoŋgu lepeŋ kune. 23 Lo a saret lonyit adi, yi ködyö yuyuŋ karin ti ŋuro lonyit Yesu Kristo, a tunyare ko ’börik gwoso na sarakiŋdye nye yi na. 24 Ŋutu liŋ logon ’de ’dep saresi kanyit kilo, lepeŋat gwolor ko Ŋun i mugun a ŋun gwolore kase i mugunya. Mulokotyo Loke logon ŋun aje tikin yi lo tiŋdu yi i deŋdya adi ŋun gwolor kayaŋ i mugunya. |
Bari Bible © United Bible Societies, 1979.
Bible Society in South Sudan