1 Timoteo 1 - Bibilia Buk na Ŋun nagon koti luŋu a

Romesi

¹ Nan Paulo a luyökie lo Kristo Yesu. Ŋun Kalwokonit likaŋ se ko Kristo Yesu logon yi yeyen lo a sarakiŋdya nan.

² Nan roman ko do Timoteo ŋuro lio ’diri i yupet, adi, Ti ’busan, ko yatet, se ko taliŋ na po ko Ŋun Monye na po ko Kristo Yesu Matat likaŋ na gwe ko do.

Paulo kunoŋu lepeŋ i kulya ti todiŋesi nagon a lepelok

³ Nan yöŋö do si ’da Epeso gwoso na sarakiŋdye nan do, na tiri nan Makedonia nu. Do agu ködyö sasar kulye ŋutu an se todiŋdyö todinesi nagon a lepelok.

⁴ Ko ti se gwe ti yiŋga likikirilön kana se ko kena na karin ti merenyejin nagon ti ’duddyo, gwoso i yuŋwe nase. Kine kulya joŋdya piyesi kana jore, ama a se tine bulo kita yeyeet na Ŋun nagon kita ko yupet.

⁵ Kwe nagon yi sasaŋi sona na anyen tiŋdu se i nyaŋu ko nyaret na po kaŋo i toili loke, ko i deŋdya na ’but, se ko i yubbö ko to ’diri.

⁶ Kulye ŋutu aje löpukuŋdyo kaŋo i kine kulya, a iŋge gitara i jambu na kulya nagon a ŋo kana.

⁷ Lepeŋat ’dek gwon a katodinok ti Saresi ti ŋun, ama a lepeŋat tine kurun jamesi lo jam se kulo, a tine bulo nyönyöggu kulya na toku se kune.

⁸ Yi deden adi Saresi a lo ’but ko ŋutu ’de ’dep se ’bura,

⁹ kweja adi koyi a kurun adi saresi ’bayin tetena anyen riŋari ŋutu lo ’but, ama riŋari ŋutu ka ’beleŋok ti saresi se ko ŋutu logon ti ’bön sara, ko anyen riŋari ŋutu logon ti twoju Ŋun ko a katoronyak, ko anyen riŋari nutu logon lauŋdya Ŋun ko logon woro abur, ko anyen riŋari katatuak kase komonye se ko ko ŋote, ko a karemok ti ŋutu,

¹⁰ anyen riŋari kalupok, ko ŋutu lyan logon totoluŋ ko ’borik, ko kolak ti ŋutu, ko ’buronok, ko kamilyok ’buronok, se ko ŋo kunie nagon koŋu todinesi na gwon jojo.

¹¹ Kine todinesi gwon jojo ko Loŋe Lo ’but lokwekwelen lo Ŋun lo pupura logon lepeŋ a yinikin koyo lo.

Tinate kogwon Ŋun a kayatanit

¹² Nan a tiŋdu Kristo Yesu Matat likaŋ tinate kogwon lepeŋ a tiŋdu nan riŋit kitaet, kogwon lepeŋ a yinikin nan jujukin, a iŋge wulun nan anyen kitakiŋdya lepeŋ,

¹³ ma ’di nan koju a lauŋdya lepeŋ ko a sasaŋdu lepeŋ ko a momoroju lepeŋ. Ama lepeŋ a yatakin nan kogwon nan koju a koŋdya ko tu ’böŋön kogwon nan a ko yubbo;

¹⁴ a Matat likaŋ Kristo Yesu iŋge tiŋdu nan ’busan na nyaŋu nanyit abur i pirit na geleŋ ko yupet, se ko nyaret na gwon kanyit i mugun na.

¹⁵ Lo a kulyaet logon a gwak, logon ŋutu lio jojo yubbo adi, Kristo Yesu a po i na kak i Iwoggu na katoronyak. Nan logon a duma lose.

¹⁶ Ama kwe nagon Kristo Yesu a yatakiŋdye nan na, anyen tiŋdu nan a tojowet togeleŋ na ŋoŋga nanyit taliŋ nagon a duma parik. Ŋina tojowet a na ŋutu logon mo popo i mukök i yubbo na lepeŋ a wuji ru na yeŋ nyin kilo.

¹⁷ Nyena ti Mor lo yeŋ nyin logon ti twan, logon ti bulö meta, Ŋun lo geleŋ, ti nye gotani ko bulani ŋupi ŋupi! Amin.

¹⁸ Timoteo ŋuro lio, kune kulya koju a keyo i kulya kunok nagon tiŋdu nan i sarakiŋdya na do i koŋdya na kine kulya. Ti kilu kulyaesi lo keyo kulu togo ’yi do. Moroni gor lo ’but

¹⁹ ko tito moriesi nagon a yupet se ko toili denet lo ’but. Kulye ŋutu a dukara toilyet kase denesi a swot a tolikiŋdye yupet nase gwoso ’diron na ki ’bo.

²⁰ Kulye kase a ko Umenaio se ko Alesaŋöero logon nan a ŋutu kin ko Satani i konin anyen se boŋö totodino adi ti se gwe ti lauŋdya Ŋun.