1 Samuele 9 - Bibilia Buk na Ŋun nagon koti luŋu a

Saula a wulwe a mor

¹ A lele ŋuto lo Benyamina gwe kata karin kanyit a Kisi, lepeŋ a kwörinit. Ŋilo ŋuto a ŋuro lo Abiele, ŋuro lo Seror, ŋuro lo Bekorat, ŋuro lo Apiak, Benyaminatyo.

² A nye gwe ko ŋuro karin kanyit a Saula, titinti lokwekwelen. A ŋuto lele gwe ’bayin i kiden na ŋutu ti Yisaraele logon lwöŋgu lepeŋ i kwelen; nye a lojo lilimun kulye ŋutu liŋ.

³ A kaineki ti Kisi monye Saula aje likin. A Kisi kulyani ko Saula ŋuro lonyit lo adi, Joŋgi lele lo köliŋönök, ko ŋine ki, iti ta ko lepeŋ i galaddu na kaineki kune.

⁴ A se lwöŋöddi jur lo merya ti Epuraima, a lwöŋöddi jur lo Salisa, ama a lepeŋat gwe a ko ryö se. A se lwöŋöddi jur lo Salim, ama a kinu kaineki gwe ’bayin nyu. A se köti lwöŋöddi jur lo Benyamina, ama a lepeŋat gwe a ko ryö se kwöŋ.

⁵ A se ko ’dure i jur lo Supa, a Saula kulyani ko köliŋönit lonyit lo gwon ko lepeŋ lo adi, Poŋdi, ti yi yitöni bot, an baba de kö ’yu wiwinya i kulya ti kaineki, kölumbö a lepeŋ de yeyeji kulya kaŋ.

⁶ Ama a ŋilo köliŋönit takiŋdye lepeŋ adi, Mete, lele ŋuto lo ŋun kata i na köji, nye a ŋuto lo bubula; ŋo liŋ nagon nye a jam popoŋdya a gwak. Nyena ti yi iti nyu kode ŋona nye bubulö takiŋdya yi kulya ti jölö nikaŋ na tiri yi na.

⁷ A Saula kulyani ko köliŋönit lonyit lo adi, Ama koyi a tu, a yi de jakiŋdye ŋilu ŋuto nyo? Kogwon ambata aje ’baka kayaŋ i jurakan, a ’doket gwe ’bayin nagon jaki ŋuto lo ŋun. Yi nyuŋ gwon ko nyo?

⁸ A köli pönit lo köti nyobbi Saula adi, Mete, nan gwon ko tupet na pödö; a nan de tiŋdi ŋuto lo ŋun anyen takiŋdya yi kiko likaŋ.

⁹ (Köju ’beron i Yisaraele, ko ŋutu tu i piyuŋdya ko ŋun, a nye kulyani adi, Po, yi a tu ta ko kametanit lo kulya na popo; kogwon nye logon soŋinana a luŋu a nebi lo köju ’beron luŋu a kametanit lo kulya na popo.)

¹⁰ A Saula kulyani ko köliŋönit lonyit lo adi, Do a kulya ’bura; po, ti yi iti. Nyena a se iti i köji na gwoŋdi ŋuto lo ŋun nu.

¹¹ A nagon Saula ko köliŋönit lonyit kiyaddi mere tu köji nu, a se torumbe ko kö ’disi nagon poŋdya kaŋo i ’yiladdu na pioŋ, a pije lepeŋat adi, Kametanit lo kulya na popo kata ni le?

¹² a lepeŋat nyobbi adi, Lepeŋ kata; mete, lepeŋ ŋilu kasu ŋerot. Rume ta rum; lepeŋ soŋinana pete ’durökin köji kata, kogwon ŋutu de gwon ko rubaŋga i lo lor i pirit na ’du.

¹³ ’De ’de nagon ta de lupöri i köji, ta de ryöryö lepeŋ i ŋerot nagon nye tiri i pirit na ’du i nyesu nyu; kogwon ŋutu de ti nyesu tojo lepeŋ a ’durökin, kogwon nye lo ’boroja rubaŋga; a i mukök a ŋutu logon a luŋu kulo de nyesi nyesu. Nyena iti ta ki kogwon ta de rurum ko lepeŋ soŋinana.

¹⁴ A se iti köji, a na lupuŋdye se i köji lukata nu, a se metuŋdye Samuele poŋdya kase ni, anyen tu i pirit na ’du.

¹⁵ A MATAT aje kwekiŋdya Samuele i ŋerot na lor lo ’durökiŋdye Saula lu adi,

¹⁶ Ko ’bure gwoso i na saa nan de susunyukin do ŋuto i jur lo Benyamina, a do de welakiŋdye lepeŋ a kanyömönit lo ŋutu kwe Yisaraele. A lepeŋ de lwökuŋdye ŋutu kwe i könisi ti ŋutu ti Pelesete; kogwon nan aje met yöyöŋesi ti ŋutu kwe kogwon gwien nase aje ’durökin köyö.

¹⁷ a na meddi Samuele Saula nu, a MATAT takiŋdye lepeŋ adi, Nye ŋilo ŋuto logon nan a jambi ko do lo! Lepeŋ a nye logon de gwon a kasaranit lo ŋutu kwe.

¹⁸ a Saula mijö-ro nyona ko Samuele yu i kötumit, a kulyani adi, Tuköki nan ko kadi na kametanit lo kulya na popo lo na ya.

¹⁹ A Samuele waddi Saula adi, Nan nye lo kametanit lo kulya na popo lo. Kölum iti köyö ŋerot i pirit na ’du. kogwon i lo lor do de nyesu ko nan; a ko ’bure a nan de kölöddi do, a mo takiŋdye do go liŋ na gwon konut i töili kune.

²⁰ An do ko nyuŋ yeyeju kulya ti kaineki kunok nagon a likin i perok mu-sala lo tu, kogwon se aje rye. Nyenagon a ŋa mo lo wuji ŋo liŋ na ’but ti Yisaraele? Se a ko tetenaki do se ko kadi na munyi liŋ le?

²¹ A Saula nyobbi adi, Nan a Benyaminatyo. Kotumit nikaŋ ŋona ’bayin a na ’dit i kotumiton ti Yisaraele le? Mede nikaŋ ŋona ti gwon a na ’dit i ’duŋesi liŋ ti kotumit na Benya-mina? Nyo lolor nagon do jambu ko nan sona i ŋilo kiko?

²² A Samuele joŋgi Saula ko koliŋonit lonyit, a tolupöddi se kadi, a tosi ’da-kiŋdye se i pirit na ’but na wulwe i kiden na ŋutu gwoso merya musala lo wulwe kulu.

²³ A Samuele kulyani ko kaderanit lo adi, Joŋdi ’doti nagon nan dika a tin do na, nagon nan a takin do adi, Tiki lepeŋ ka ’de na.

²⁴ a kaderanit lo ’dumuŋdye nyuti a tiŋdi ko Saula i komor; a Samuele kulyani adi, Mete, ŋo nagon a ’delaki do na aje petaki konut i komor. Nyesi; kogwon dika a ’delaki do tojo ko saa a temakiŋdya nagon nan a luŋgu ŋutu i nyesu na. Nyena a Saula nyesi ko Samuele i ŋilu lor.

²⁵ A nagon se aje lulurara kak i pirit na ’du tojo köji kata nu, a Samuele gwe i Tambu ko Saula i lo ’dek loki.

²⁶ A se ŋine ko ’bure kobubut; a gwe sona i baŋun na kak, a Samuele luŋgu Saula i lo ’dek lu ’dayat loki adi, Ŋine ki anyen nan nyomoddu do konut i jolo. A Saula Ŋine ki, a nye ko Samuele lupöni kaŋo kadi, a iti tu.

²⁷ A nagon se lulurara kak i mere tojo ko ’dutet na köji nu, a Samuele kulyani ko Saula adi, Taki ŋilo kölipönit ilot anyen lwopoddu kayaŋ ŋerot, a ko lepeŋ aje lwopoddu, a do ko mugun inot gwo ’de gwo ’dan diŋit a na ’dit anyen nan bubulö takiŋdya do kulyaet lo Ŋun.