1 Samuele 8 - Bibilia Buk na Ŋun nagon koti luŋu a

Ŋutu ti Yisaraele a pikiŋdya ’börik mor

¹ A gwe sona nagon Samuele aje doŋga nu, a nye tiŋdi ŋwajik kanyit a ka ’duŋök ti Yisaraele.

² A karin ti ŋuro lonyit kayu lo gwe a Yoele, a karin ti ŋuro lonyit loponi lo gwe a Abiya; a lepeŋat gwe a ka ’duŋök ti putesi Ber-seba yu.

³ Ama a ŋwajik kanyit tine wörö i kikolin kanyit, nagon a se girara i ga ’yu na tukwörien; a se wuji ’dokesi na ropaki a lwön, a kökörö-ji liliet na putesi.

⁴ A temejik ti Yisaraele liŋ momoru-ŋdye momoruŋdya, a poŋdi Rama ko Samuele ni,

⁵ a se kulyani ko lepeŋ adi, Mete, do gwe a modoŋ, a ŋwajik kulök tine wörö i kikolin kulök; nyena wulö-kiŋdye yi mor a kalilianit lo kulya kaŋ anyen yi gwon gwoso kulye jurön kilo liŋ.

⁶ Ama a kine kulya tine tulyöŋgu Samuele na kulyari se adi, Wulökiŋdye yi mor a kalilianit lo kulya kaŋ. A Samuele mo ’yi MATAT.

⁷ A MATAT kulyani ko Samuele adi, Yiŋge gworo lo kilo ŋutu i ŋo liŋ nagon se a kulyari ko do kine; kogwon se a ko renya do, ama se aje renya nan i gwon a mor lose.

⁸ Lepeŋat köti konakiŋdya do gwoso i konesi liŋ nagon se a konakin nan kune, suluja i lor lo joŋdi nan se kaŋo Ejipeto yu lu ma ’di tojo ko lo lor, se aje paju nan a kitakiŋdye kulye ŋunyen.

⁹ Nyenagon yiŋge gworo lose; tuŋ a do de kukuji se, a kwekiŋdye se gwiliŋit lo mor ko gwon ada logon mo tutumatyan ko se lo.

¹⁰ A kirut Samuele nyönyökökiŋdye ŋutu lo piyuŋdya mor ko lepeŋ kulo kulyaesi liŋ ti MATAT.

¹¹ A nye kulyani adi, Malo gwiliŋit lo mor logon mo tumatyan ko ta lo; kweja adi nye mo jojoŋ ŋwajik kasu lulyan a wuluŋdye se a ti arabiajin kanyit lo jijikö, ko i gwon a kajoŋak ti kusanjin kanyit, ko anyen wökön i ŋerot na arabiajin kanyit lo jijikö.

¹² A nye wulökiŋdye mugun kanyömok ti kamorök aliŋan, ko ti merya mukanat merya mukanat, a kulye mo kuŋi meleseno kanyit, ko a kaŋerak ti ’bolot kanyit; ko a katete-nak ti tito kanyit ti gor ko ti toro ’bo ti arabiajin kanyit lo jijikö.

¹³ Lepeŋ mo jojoŋ ŋwajik kasu nawate anyen gwon a katetenak ti riyajin, ko a kaderak ti kinyojin, ko a kaderak ti ambatajin.

¹⁴ Lepeŋ mo jojoŋ meleseno kasu na nyunyumwe, se ko luköbiöt kasu na ’but ti binyo ko ti jeitun, a mo tiŋdi köliŋö-nök kanyit.

¹⁵ A nye mo ’dumaddi swöt topuökit na ’bolot kasu ko lo ludweki ti luköbiöt kasu ti binyo, a tiŋdi ŋutu kanyit temejik se ko kakitak kanyit.

¹⁶ A nye mo joŋgi köliŋönök kasu lulyan ko nawate, ko kisuk kasu na nyunyumwe ko kusanjin kasu na ’but, a tiŋdi se i kitakiŋdya na lepeŋ.

¹⁷ Lepeŋ mo jojoŋ swöt topuökit na yidin kasu, a ta mo gwe a ’dupi kanyit.

¹⁸ A i ŋilu lor a ta mo woŋe woŋon kogwon mor losu logon ta a wulökin ’börik lo; ama MATAT mo ti ruk ta i ŋilu lor.

¹⁹ Ama a ŋutu tine ’bön yiŋga gworo lo Samuele; a se kulyani adi, ’Bayin, ama yi yöŋö mor logon saŋu yi,

²⁰ anyen yi koti bubulö gwon gwoso kulye jurön liŋ; anyen mor likaŋ sasar yi, anyen tu kayaŋ ŋerot i mörö i diŋitan kaŋ ti gor.

²¹ A nagon Samuele aje yiŋ kulyaesi liŋ ti ŋutu nu, a nye nyönyökökiŋdye MATAT kilo kulyaesi.

²² A MATAT kulyani ko Samuele adi, Yiŋge gworo lose ko wulökiŋdye lepeŋat mor. A Samuele kulyani ko ŋutu ti Yisaraele adi, ŋutu liŋ geleŋ geleŋ ŋadi ti iti kanyit köji.