1 Samuele 7 - Bibilia Buk na Ŋun nagon koti luŋu a

¹ A ŋutu ti Kiryat-yarim poŋdi poŋdya, a ’dumuŋdye saŋduk na MATAT, a ’doggi ko Abinadaba kadi na gwon i mere; a se ’burukiŋdye ŋuro lonyit Elejara a kamemetanit lo saŋduk na MATAT.

Samuele a ka ’duŋönit lo putesi ti Yisaraele

² A gwe sona suluja i ŋilu lor, a saŋduk na iŋge gwolor Kiryat-yarim diŋit a najo, gwoso kiŋajin merya murek, a kötumit na Yisaraele liŋ ga ’yi MATAT ko politan.

³ A Samuele kulyani ko kötumit na Yisaraele liŋ adi, Ko ködyo ta a yitwe ko MATAT ni ko töilyet kasu liŋ, nyena paji ta kasu kiden ŋunyen logon a lepelok ko nye nagon luŋu a Asatarot, ko tirikuni ta MATAT ko töilyet kasu ko kitakiŋdye ta nye geleŋ, a nye mo lwökuŋdye ta kaŋo i könisi ti ŋutu ti Pelesete.

⁴ a ŋutu ti Yisaraele paji ŋunyen logon luŋu a Balajin ko Asatarot, a kitakiŋdye MATAT ka ’de.

⁵ A Samuele kulyani adi, Ti ŋutu ti Yisaraele liŋ momori Misepa yu, a nan de momo ’yi MATAT kogwon ta.

⁶ a kirut se momori Misepa yu, a se ’yi ’ye pioŋ a ’bukökiŋdye ko MATAT i komor, a miŋdye miŋdya i ŋilu lor, a jambi nyu adi, Yi ’diri aje toroŋdya ko MATAT i komor. A Samuele lilije putesi ti ŋutu ti Yisaraele Misepa yu.

⁷ A nagon ŋutu ti Pelesete aje yiŋ adi ŋutu ti Yisaraele aje momora Misepa yu nu, a kimak ti Pelesete iti i mörö ko ŋutu ti Yisaraele. A na yiŋge ŋutu ti Yisaraele kine kulya nu, a se iŋge kujönö ŋutu ti Pelesete.

⁸ A ŋutu ti Yisaraele kulyani ko Samuele adi, An do ko kölökin gwien ko MATAT ŋun likaŋ i komor kogwon kulya kaŋ, anyen nye böŋö lwökuŋdyö yi i könisi ti ŋutu ti Pelesete.

⁹ A Samuele ’dumuŋdye kilolor lo nönöggu, a wukiŋdye MATAT a rubaŋga lo ’yu ’yura ’buluŋ; a Samuele gwiki ko MATAT kogwon ŋutu ti Yisaraele, a MATAT iŋge ruk lepeŋ.

¹⁰ A na wukiŋdye Samuele rubaŋga lo ’yu ’yura ’buluŋ nu, a ŋutu ti Pelesete mimiju nyona i mörö ko ŋutu ti Yisaraele; ama a MATAT maraŋaddi ki parik i kipya lo ki lukata i mörö ko ŋutu ti Pelesete i ŋilu lor, a köbuŋe se; a se iŋge tela ko ŋutu ti Yisaraele i komor.

¹¹ A ŋutu ti Yisaraele poŋdi kaŋo Misepa yu, a riköddi ŋutu ti Pelesete, a tatuje se tojo i mukök na Bete-kar.

¹² A kirut Samuele ’dumuŋdye ŋurupit a togwi ’dikiŋdye lepeŋ ki i kiden na Misepa ko na Sen, a gwije lepeŋ a Ebenejer, kulya adi, MATAT aje para-kiŋdya yi tojo ko na pirit.

¹³ Nyena a ŋutu ti Pelesete iŋge tela a tine lupö köti i kak na Yisaraele. A i perok liŋ ti gwiliŋit na Samuele, a könin lo MATAT möröni ko ŋutu ti Pelesete.

¹⁴ a köjinö nagon ŋutu ti Pelesete a riŋun ko ŋutu ti Yisaraele kune iŋge nyököki ŋutu ti Yisaraele, suluja Ekron tojo Gata; a ŋutu ti Yisaraele ripuŋdye kak nase i könisi ti ŋutu ti Pelesete. A taliŋ gwe kata i kiden na ŋutu ti Yisaraele ko ŋutu ti Amori.

¹⁵ A Samuele gwe a ka ’duŋönit lo Yisaraele i perok liŋ ti gwiliŋit nanyit.

¹⁶ Temba i kiŋa a lepeŋ wöröddi Betele ko Giligala se ko Misepa; a nye lilije putesi ti ŋutu ti Yisaraele i kine piritön liŋ.

¹⁷ A nye yitöni bot Rama kogwon mede nanyit gwon nyu, a nye köti lilije putesi ti ŋutu ti Yisaraele i nu pirit. A nye tetenakiŋdye MATAT pirit ’yuret na rubaŋgajin nyu.