1 Samuele 5 - Bibilia Buk na Ŋun nagon koti luŋu a

Saŋduk na Ŋun i jur lo ŋutu ti Pelesete

¹ A nagon ŋutu ti Pelesete aje morga saŋduk na ŋun nu, a se ’doggi lepeŋ suluja Ebenejer tojo i köji na Asedoda,

² A ŋutu ti Pelesete joŋgi saŋduk na ŋun, a tolupöddi lepeŋ i kadi na nyomue nagon a Dagona, a tosi ’dakiŋdye lepeŋ nyona ko nu nyö-mue nagon a Dagona.

³ A nagon ŋutu ti Asedoda ko ŋine ki ko ’bure kobubut nu, mete, a Dagona aje ’doro kak rupu i komor na saŋduk na MATAT. A se ’dumuŋdye Dagona a nyökökiŋdye lepeŋ i pirit nanyit köti.

⁴ Ama i ko ’bure nanyit, na pije se ki i waran ’beron nu. mete, a Dagona aje ’doro kak rupu i komor na saŋduk na MATAT, mete, a kwe na Dagona ko ’dapan ti könisi kanyit liŋ aje ’biliŋuŋdyo kaŋo a gwe i kutuk na kötumit; tuŋ mugun na Dagona na pituŋdye.

⁵ Nye ŋina kwe nagon koanejin ti Dagona ko se liŋ logon lupö ko Dagona kadi kilo ti bulö ryogga kutuk na kötumit nanyit Asedoda yu tojo ko lo lor.

⁶ A könin lo MATAT gwe pömöni ko ŋutu ti Asedoda, a nye köŋi se a rata-kiŋdye se köruru, suluja Asedoda tojo i koresi kanyit.

⁷ nagon ŋutu ti Asedoda aje met ŋo na kona nu, a se kulyani adi, Saŋduk na ŋun lo Yisaraele tine bulö möŋdu kayaŋ ni; kogwon könin lonyit pömöni kayaŋ loki ko i ŋun likaŋ Dagona.

⁸ Nyenagon a se soŋdi lore a momori kimak liŋ ti Pelesete i pirit na geleŋ, a jambi adi, Yi koŋdya nyo ko saŋduk na ŋun lo Yisaraele? A se waddi adi, Ti saŋduk na ŋun lo Yisaraele ’dokoni tojo ko köji na Gata. Nyena a se ’doggi saŋduk na ŋun lo Yisaraele nyu.

⁹ A ko gwe sona nagon se aje ’doggu lepeŋ nyu nu, a könin lo MATAT gwe i yöyöŋgu na köji ko kujönö a duma parik, a nye tomije ŋutu ti köji, lo ’di ’dik ko temejik, a köruru ratuŋdye kaŋo kase i mugunya.

¹⁰ A se soŋdi saŋduk na ŋun tojo ko köji na Ekron. A ko gwe sona na ’durökiŋdye saŋduk na ŋun Ekron nu, a ŋutu ti Ekron woŋoro ki adi, Lepeŋat aje joŋdya kayaŋ ni saŋduk na ŋun lo Yisaraele anyen ko tatuja yi ko ŋutu kaŋ.

¹¹ Nyenagon a se sonyoddi lore a momori kimak liŋ ti Pelesete i pirit na geleŋ, a jambi adi, Sonye ta kaŋo saŋduk na ŋun lo Yisaraele ko ti lepeŋ nyököjine kanyit i pirit, an ko tatuja yi ko ŋutu kaŋ. Kogwon kujönö na twan gwe i köji ’bukuluŋ. A könin lo ŋun gwe pömöni parik nyu.

¹² A ŋutu logon a ko twatwa kulo iŋge tomie ko köruru, a gwien na ŋutu ti nu köji yeŋgi tojo ko ki.