1 Samuele 4 - Bibilia Buk na Ŋun nagon koti luŋu a

Ŋutu ti Pelesete a morga saŋduk

¹ A ŋutu liŋ ti Yisaraele iŋge yio kulya ti Samuele. A ŋutu ti Yisaraele iti kaŋo i moro ko ŋutu ti Pelesete; a ’beggi mera nase Ebenejer yu, a ŋutu ti Pelesete ’beggi mera nase Apek yu.

² A ŋutu ti Pelesete ’dakaki i moro ko ŋutu ti Yisaraele, a nagon se aje toru-mbö i moro nu, a ŋutu ti Pelesete te ’yi ŋutu ti Yisaraele; a se iŋge tatuja ŋutu gwoso aliŋan iŋwan i pirit na gor.

³ A nagon kamörök aje ’dur i mera nu, a temejik ti Yisaraele pije adi, Nyo nagon MATAT lolor tiŋdu ŋutu ti Pelesete i te ’ya na yi i lo lor? Ti yi joŋdi ta ni saŋduk na tomoret na MATAT Silo yu, anyen nye böŋö po kayaŋ kiden i lwökuŋdyo na yi i riŋit na merok kaŋ.

⁴ A se soŋdi ŋutu Silo i jo-ŋdya na saŋduk na tomoret na MATAT lo kurumi logon sisi ’da i kerubajin loki; a ŋwajik murek ti Eli logon a ko Openi ko Pinasa gwe nyu ko saŋduk na tomoret na ŋun i pirit na geleŋ.

⁵ A nagon saŋduk na tomoret na MATAT aje ’durörikin i mera nu, a ŋutu liŋ ti Yisaraele woŋoro ki, a kak gwogwoŋgi gwogwoŋga.

⁶ A ŋutu ti Pelesete ko yiŋge ŋina woŋon a toto-pine adi, ŋina woŋon duma i mera na Ebere kweja nyo? A se kuruŋdye adi saŋduk na MATAT aje ’durörikin i mera.

⁷ A ŋutu ti Pelesete kujönöni kujönö, a se kulyani adi, ŋunyen aje ’dur i mera lukata. A se kulyani adi, Wöidiö! kogwon nene ŋo gwoso na köju a ko ’de kona.

⁸ Woidiŋ! ŋuto a ŋa logon de lwökuŋdyo yi i könisi ti ŋunyen iŋgo kilo? Kilo a ŋunyen logon köju a gwuddyo ŋutu ti Ejipeto ko tömiesi ka ’de ka ’de i yöbu.

⁹ Yakulo, ta ŋutu ti Pelesete, gwe ta a iŋgo, ko kitani ta gwoso ŋutu lunsak, an ta ko gwon a ’dupi ti ŋutu ti Ebere gwoso na gwoŋdi se a ’dupi kasu nu; kitani ta gwoso ŋutu lunsak ko möröni ta ’bura.

¹⁰ Nyena a ŋutu ti Pelesete möröni möro, a ŋutu ti Yisaraele iŋge tela, a se liŋ geleŋ geleŋ wöki kase i midijik; a torem gwe a duma parik, kogwon ŋutu ti Yisaraele logon a kamörök logon aje tatua kulo gwe gwoso aliŋan merya musala lo woro ko mok.

¹¹ A saŋduk na ŋun iŋge moka; a ŋwajik murek ti Eli logon a ko Openi ko Pinasa iŋge tatua.

¹² A lele ŋuto lo Benyamina logon a kekereŋdya boŋgwat kanyit ko a tiŋdu kujöŋ kanyit i kwe lo wöki kaŋo i pirit möriet, a ’dure Silo i ŋilu lor.

¹³ A na ’durökiŋdye lepeŋ nu, mete, a Eli gwe i si ’da kanyit i si ’daet i merete lo kiko i mömöŋdu na lore, kogwon nye gwon ko ’doko na töili kogwon saŋduk na ŋun. Aŋuto lo ko ’dure köji, a tuŋge ŋilo lore, a ŋutu liŋ ti köji luluje lulujö.

¹⁴ A Eli ko yiŋge luluesi a kulyani adi, Kinu luluesi a ti nyo? A lu ŋuto rumu rumun a takiŋdye Eli.

¹⁵ a Eli gwe ko kiŋajin merya buŋwan wot budök, a konyen kanyit aje muswe, a nye tine bulö meddya.

¹⁶ A ŋuto lo takiŋdye Eli adi, Nan a nye logon poŋdya i gor; nan a wokun i gor yu i lo lor. A Eli pije adi, Gwon ada ŋuro liŋ?

¹⁷ a ŋuto lo joŋdya lore lo waddi adi, ŋutu ti Yisaraele aje wökön kaŋo ko ŋutu ti Pelesete i komor, köti torem duma kata ko ŋutu kiden; koti ŋwajik kulök murek logon a ko Openi ko Pinasa aje tatua, a saŋduk na ŋun iŋge moka.

¹⁸ A na ’diŋdye nye saŋduk na ŋun nu, a Eli ’dorone ’doro ’bata kanyit i si ’daet i merete lo kotumit; a murut nanyit iŋge ’beleŋo a nye twane twan, kogwon lepeŋ gwe a ŋuto modoŋ a mugun nanyit gwe pömöni. lepeŋ a gwon a ka ’duŋonit lo putesi ti Yisaraele ko kiŋajin merya iŋwan.

¹⁹ A narakwan na ŋuro lonyit Pinasa gwe ko pele, a nye gwe nyona ko ta ’du. A nagon lepeŋ aje yiŋga lore adi saŋduk na ŋun aje moka, ko ŋogwo lonyit ko lalet lonyit aje twatwa nu, a lepeŋ rosokakine kak a ta ’duni ta ’du; kogwon mien na ta ’du aje mok lepeŋ.

²⁰ A i nu diŋit a wate nagon gwon i parakiŋdya na lepeŋ kune kulyani ko lepeŋ adi, Ko kujönö, kogwon do aje yupuŋdyö ŋuro lulalet, kogwon nuŋuto gwe nyona ko twan. Ama lepeŋ a ko waddu ko a ko tiŋdu tirikwet kata.

²¹ A nye gwije ŋuro lo a Ikaboda, kulya adi, Bulet aje wusaddu kaŋo i Yisaraele! Kogwon saŋduk na ŋun aje moka. ko koti kogwon ŋogwo lonyit ko lalet lonyit aje twatwa.

²² A nye kulyani adi, Bulet aje wusaddu kaŋo i Yisaraele kogwon saŋduk na ŋun aje moka.