1 Samuele 30 - Bibilia Buk na Ŋun nagon koti luŋu a

Dawidi a te ’ya ŋutu ti Amalek

¹ A ko gwe sona na yitwe ’i Dawidi ko ŋutu kanyit Sikelaga yu i lor tomusala lonyit nu, a ŋutu ti Amalek gwe i mörö ko jur lo Loki, ko Sikelaga. A se iŋge te ’ya Sikelaga a ’yuŋe nye,

² A se iŋge momokaddu ŋutu wate ko se liŋ lo gwon i ŋinu köji kulu, lo ’di ’dik ko temejik; a se gwe a ko tatuja ma ’di geleŋ lose, ama a baraddi se, a iti kase i kiko.

³ A nagon Dawidi ko ŋutu kanyit kulo aje ’durö-kin köji nu, a se ryeji adi köji aje ’yura, a wate kase ko ŋwajik kase lulyan ko nawate iŋge momokaji.

⁴ A Dawidi ko ŋutu lo gwon ko nye kulo luluje lulujö a gwine gwien tojo ko se gwe ’bak riŋit gwiet köti.

⁵ A wate ti Dawidi murek kune köti iŋge momokaji; karin kase a ko Akinoma na Yejerele ko Abigaila nagon köju a karu ’be na Nabala lo Karmela na.

⁶ A Dawidi gwe ko delya duma parik; kogwon ŋutu kulo jambi adi ti se gugubune gugubu lepeŋ ko ŋurupö, kogwon ŋutu liŋ geleŋ geleŋ gwe ko töilyet lo pape i kulya ti ŋwajik kase lulyan ko nawate. Ama a Dawidi tŋgulukiŋdye töili lonyit ko MATAT ŋun lonyit.

⁷ A Dawidi kulyani ko koane Abyatar ŋuro lo Abimelek adi, Taki nan epoda ni. A Abyatar jakiŋdye nye epoda na.

⁸ A Dawidi muluŋdye ko MATAT adi, Nan ŋona bubulö kepöddu nu teŋ na kamörök le? Nan ŋona de wowokun lepeŋat le? A MATAT nyobbi adi, Kepoddi se; kogwon do ’diri de wowokun se, do ’diri de lwölwökun se.

⁹ A Dawidi iti tu se ko ŋutu kanyit miajin buker kulo, a se ’dure i loro Besor, a ŋutu logon a kölöki bot kulo mönuŋdye nyu.

¹⁰ Ama a Dawidi kepoddi kepöddu ko ŋutu miajin iŋwan kulo, a ŋutu miajin murek kolökine bot logon aje doddya ko gwe ’bak riŋit laŋet na loro Besor.

¹¹ A se ryeji lele ŋuto lo Ejipeto i yöbu, a joŋdi nye ko Dawidi ni, a se tiŋdi lepeŋ ambata, a nyesi nyesu, a tiŋdi lepeŋ pioŋ na mamata,

¹² A se tiŋdi lepeŋ pitönö na ki ’bi na nunutu ko kusik murek ti ludweki ti binyo. A nagon nye aje nyesu nu, a nye rune ru; kogwon lepeŋ a ko nyesu ambata kode möju pioŋ ko perok musala ’bukuluŋ.

¹³ A Dawidi pije lepeŋ adi, Do a ŋuto liŋ a? Do poŋdya ya? A nye nyobbi adi, Nan a titinti lo Ejipeto, ’dupiet lo ŋuto lo Amalek; a duma liŋ iŋge kolokiŋdyo nan bot kogwon nan a gilö suluja i perok musala lo tu.

¹⁴ Yi a tu i mörö i jur lo Loki lo ŋutu ti Kereti, ko lo Yuda, ko i jur lo Loki lo Kaleba, a yi iŋge ’yuŋa Sikelaga.

¹⁵ A Dawidi pije lepeŋ adi, Do ŋona bubulö nyömöddu nan i ŋinu teŋ na kamörök? A lepeŋ waddi adi, Milyeki nan i karin ti ŋun adi do mo ti tatu nan, kode luŋa i wukiŋdya na nan ko duma liŋ i könisi, a nan de nyömö-di do i ŋinu teŋ na kamörök.

¹⁶ A nagon nye aje nyömöddu se nu, mete, a kilu ŋutu aje rekin abur i jur liŋ, a se gwe i nyesu ko i möju ko i gwoja, kogwon toro ’bo jore nagon se a ryakun i jur lo ŋutu ti Pelesete ko i jur lo Yuda kune.

¹⁷ Dawidi rembi se suluja i kwökö tojo ko koriri i ’doro na kolor na lor tomurek lonyit; a lele ŋuto lose gwe ’bayin logon a lwöggu mugun, ka ’de teton miajin iŋwan logon a kija kamilojin a wöki wökön kulo.

¹⁸ A Dawidi ryeji ŋo liŋ nagon ŋutu ti Amalek a joŋ kune; a Dawidi lwöku-ŋdye wate kanyit murek kune.

¹⁹ A nene ŋo gwe ’bayin nagon a likin kode na ’dit ma ’di duma, kode ŋwajik lulyan kode nawate, kode ryakat kode nene ŋo nagon a ’dumaji; a Dawidi nyökuŋdye se liŋ.

²⁰ A Dawidi köti momokaddi teŋon ti yidin ko ti kisuk liŋ; a ŋutu meyaddi kine toro ’bo liŋ kanyit ŋerot, a kulyani adi, Kune a ryakat ti Dawidi.

²¹ A kirut Dawidi ’dure ko ŋutu miajin murek kulo yu, logon köju a doddya a gwe ’bak riŋit i kebbu na Dawidi, a iŋge kölöki i loro Besor kulo; a se iti kaŋo i rum ko Dawidi ko i rum ko ŋutu logon gwon ko nye kulu; a nagon Dawidi gwe nyona ko ŋutu kulo nu, a nye rome ko se.

²² A kirut ŋutu lorok liŋ logon a logon i kiden na ŋutu logon a tu ko Dawidi kulo kulyani adi, Yi ti bulo tiŋdu se nene ŋo i ryakat nagon yi a ryonu, kogwon lepeŋat a ko tu koyi, ka ’de ŋutu liŋ bubulö joŋga wate kase ko lupudiet ko ti se iti.

²³ Ama a Dawidi kulyani adi. Luŋasirik kwe, ta ti bulo koŋdya sona ko ŋo nagon MATAT aje tikin yi kune; lepeŋ aje gaju yi, ko aje pakiŋdya kayaŋ i könisi teŋ na ŋutu logon a po i möro koyi kulo.

²⁴ A ŋa ŋona de lo yiŋge ta i kine kulya? Ti ŋo liŋ kokorakine jojo; ti koresi kase gwe jojo i se logon a tu i mörö ko i se logon a katiyuk ti toro ’bo kulo.

²⁵ A suluje i ŋilu lor tojo ko ŋerot. a nye wuŋe ŋilo kulyaet a saret ko a keri lo ’de ’depa i Yisaraele tojo ko lo lor.

²⁶ A nagon Dawidi aje ’durökin Sikelaga nu, a nye sonyoddi lele swöt lo ryakat kanyit kune ko julin kanyit logon a temejik ti Yuda, kulya adi, Mana ’doket nasu i ryakat na ryakwe i merok ti MATAT;

²⁷ a kine gwe a ti ŋutu lo gwon Betele, ko lo gwon Ramot na jur lo Loki, ko lo gwon Yatir,

²⁸ ko lo gwon Aroer, ko lo gwon Sipamot, ko lo gwon Esetemoa,

²⁹ ko lo gwon Rakala, ko lo gwon i köjinö ti ŋutu ti Yerakmela, ko lo gwon i köjinö ti ŋutu ti Keni,

³⁰ ko lo gwon Korma ko Borasan, ko lo gwon Atak,

³¹ ko lo gwon Keberon, ko i piritön liŋ nagon Dawidi ko ŋutu kanyit kulo a worori kunu.