1 Samuele 3 - Bibilia Buk na Ŋun nagon koti luŋu a

MATAT a luŋgu Samuele

¹ A lo ŋuro Samuele kitakiŋdye MATAT ko Eli i komor. A i kilu perok a MATAT tine jambu ko ŋutu parik kode kwekiŋdya ko se daŋin jore.

² A gwe sona i nu diŋit, a konyen ti Eli aje muswe a nye tine bulö meddya. A na piriki ’e nye kak kanyit i pirit,

³ nagon lombo lo ŋun a ko nyuŋ tatua nu, a Samuele aje piriki kak i kadi na MATAT lukata, i pirit na gwoŋdi saŋduk na Ŋun nu,

⁴ a MATAT luŋgi Samuele, a nye ruŋge adi, Nan malo!

⁵ A nye wöki ko Eli yu, a kulyani adi, Nan malo, kogwon do a luŋgu nan. A nye kulyani adi, Nan a ko luŋgu do; tu pirikine kak. A nye iti tu, a pirikine kak.

⁶ A MATAT luŋgu luŋgu koti adi, Samuele! A Samuele ŋine ki a iti ko Eli yu, a kulyani adi, Nan malo, kogwon do a luŋgu nan. A nye waddi adi, Nan a ko luŋgu do ŋuro liŋ; tu pirikine kak köti.

⁷ Ama Samuele a ko nyuŋ den MATAT, a kulyaet lo MATAT gwe a ko nyuŋ kweki lepeŋ.

⁸ A MATAT köti luŋgu Samuele daŋ tomusala. A nye ŋine ki a iti ko Eli yu, a kulyani adi, Nan malo, kogwon do a luŋgu nan. A Eli kuruŋdye adi ŋilo a MATAT lo luŋgu lo ŋuro.

⁹ Nyenagon a Eli kulyani ko Samuele adi, Iti tu pirikine kak; ko nye koti a luŋgu do, a do ruŋge adi, Kulyani pon MATAT, köliŋönit ilot lo yiyiŋga. Nyena a Samuele iti tu a pirikine kak kanyit i pirit.

¹⁰ A MATAT lo poŋdi, a gwo ’de gwo ’dan, a luŋgu gwoso na diŋitan kunie kune adi, Samuele! Samuele! A Samuele waddi adi, Kulyani pon, kogwon köliŋönit ilot lo yiyiŋga.

¹¹ A MATAT kulyani ko Samuele adi, Mete, nan mo kokoŋdya nene ŋo i Yisaraele, anyen ŋutu liŋ logon mo yiyiŋga ŋina ŋo kilo a swo kase liŋ mo gigiŋge gigiŋga adi birr.

¹² I ŋilu lor nan mo kökonakin Eli ŋo liŋ nagon nan a kulyari i kulya ti kotumit nanyit kune suluja i suluet tojo ko ’dutet.

¹³ A nan takiŋdye lepeŋ adi, nan mo ririŋ kötumit nanyit ŋupi ŋupi kogwon toron nagon nye a den ŋina, kogwon ŋwajik kanyit a lauŋdya nan Ŋun, a nye gwe a ko teŋgu se.

¹⁴ Nyenagon nan aje milyekin kötumit na Eli adi toron na kötumit na Eli mo tine lalai ko rubaŋga kode ko ’doket asut.

¹⁵ A Samuele karaki kanyit i dotoet tojo ko ko ’bure; a kirut lepeŋ ŋaji kötumitön ti kadi na MATAT. A Samuele kujono ni kujono i nyönyökökiŋdyö na Eli kulya ti nu kweyet.

¹⁶ A Eli luŋgu Samuele adi, Samuele, ŋuro liŋ! A nye ruŋge adi, Nan malo.

¹⁷ A Eli pije adi. ŋo a nyo nagon MATAT a takin do? An do ko ’delakin nan se böŋö. Ti ŋun konakiŋdye do nene ŋo naron ko lwölwöŋ kine köti ko do a ’de ’ya nene ŋo köyö i ŋo liŋ nagon nye a takin do kine.

¹⁸ A Samuele nyönyo-kokiŋdye lepeŋ kulya liŋ a tine ’de ’ya kunie ko lepeŋ asut. A Eli kulyani adi, ŋilo a MATAT; ti lepeŋ koŋdi ŋo nagon nye a met adi a na ’but kanyit.

¹⁹ A Samuele ’duŋe ’duŋö, a MATAT gwe ko lepeŋ, a tine kolökin lele lo kulyaesi kanyit i ’doro kak.

²⁰ A ŋutu liŋ ti Yisaraele, suluja Dan tojo Ber-seba iŋge den adi Samuele gwe a nebi lo MATAT.

²¹ A MATAT köti puköki Silo, kogwon nye aje kwekiŋdya mugun nanyit ko Samuele Silo yu ko kulyaet lonyit lo MATAT.